2. Bungtod sa Cumorah ug Dapit sa Manchester-Palmyra

Magtan-aw paingon sa amihanan, kini nga hulagway nagpakita sa Bungtod sa Cumorah, sa Manchester, New York. Ang bungtod makita diha sa ubos sa tuo nga ngilit sa hulagway ug mosaylo og dyutay sa tunga paingon sa itaas sa hulagway. Ang puti nga monumento nga makita diha sa amihanan nga tumoy sa bungtod nagpasidungog sa anghel Moroni ug sa pagtungha sa Basahon ni Mormon. Ang Bungtod sa Cumorah nahimutang hapit lima ka mga kilometro sa habagatang silangan sa Sagrado nga Kakahoyan. Duol sa itaas sa hulagway mao ang Palmyra, unom ug tunga ka kilometro ang gilay-on. Ang umahan sa Smith ug ang Sagrado nga Kakahoyan nahimutang sa itaas sa wala nga kilid sa hulagway.

Mahinungdanon nga mga Hitabo: Ang pamilya ni Propeta Joseph Smith mipuyo niini nga dapit sa panahon sa Unang Panan-awon (JS—K 1:3). Niadtong A.D. 421, si Moroni milubong sa hugpong sa bulawan nga mga palid sa Bungtod sa Cumorah nga naglangkob sa sagrado nga kasaysayan sa iyang mga katawhan (P. ni M. 1:1–11; Morm. 6:6; Moro. 10:1–2). Kining mao gihapon nga Moroni misulti kang Joseph Smith kon asa makita ang mga palid—ngadto paingon sa amihanang tumoy sa bungtod, diha sa kasadpan nga dapit, duol sa ibabaw. Si Moroni mihatag niini ngadto kaniya niadtong 1827 (D&P 27:5; 128:20; JS—K 1:33–35, 51–54, 59).