17. Exodo paingon sa Kasadpan

Ang pagsugod sa pagpamahawa sa Nauvoo, Illinois, giplano alang sa Marso—Abril, apan tungod sa mga pagpanghulga sa manggugubot si Presidente Brigham Young mimando nga ang pagbiya sa mga Santos tabok sa Suba sa Mississippi magsugod sa 4 sa Pebrero 1846. Si Presidente Young mipabilin aron sa pagpangalagad sa mga pagtuga sa mga Santos ug wala mobiya sa Nauvoo hangtud sa tunga-tunga sa Pebrero.

Mahinungdanon nga mga Hitabo: Sa wala pa ang iyang kamatayon ang Propeta Joseph Smith nanagna, “Pipila kaninyo moadto ug motabang sa paghimo og mga kapanimuy-an ug motukod og mga dakbayan ug makakita sa mga Santos nga mahimong gamhanan nga mga katawhan taliwala sa Rocky Mountains.” Dul-an sa 12,000 ka mga Santos mipahawa sa Nauvoo gikan sa Pebrero ngadto sa Septyembre 1846. Human ang mga Santos mibiya sa Winter Quarters ug mga nahimutangan sa kaulahian, sila giorganisar ngadto sa mga pundok sa mga tagnapulo, mga tagkalim-an, ug mga tagginatus, ubos sa usa ka kapitan sa pundok (D&P 136:3). Pagka Septyembre 1846 mga manggugubot nga gibanabana sa 800 ka mga tawo nga gisangkapan og unom ka mga kanyon misulong sa Nauvoo. Human sa pipila ka mga adlaw nga panag-away, ang nahabilin nga mga Santos napugos sa paghural aron pagluwas sa ilang mga kinabuhi ug makahigayon sa pagtabok sa suba. Lima ngadto sa unom ka gatus ka mga lalaki, mga babaye, ug mga bata mitabok sa suba ug nagkampo sa daplin sa suba. Si Presidente Brigham Young mipadala og mga pundok sa moluwas uban sa mga sangkap aron sa pagpabakwit niining “kabus nga mga Santos.”