¶ 1 BEA nae toki tali e Bilitati mei Suaa, o ne behe,

2 E fefe hono fuoloa bea ke fakagata ae lea? tokaga, bea te mau toki lea.

3 Koeha kuo lau ai akimautolu koe faga manu, bea lau koe uli i ho ao?

4 Oku ne haehae a eia be i he ene ita: e liaki ia mamani koeuhi ko koe? bea e hiki ae fuu makatuu mei hono botu?

5 Koe mooni, e tamate‘i ae māma oe agahala, bea e ikai ulo ae kalofiama o ene afi.

6 E fakabouli ae māma i hono fale, bea e tamate‘i a ene māma fakataha mo ia.

7 E fakaabiabi ae lakaaga o hono malohi, bea e li ki lalo ia e he ene fakakaukau aana.

8 He ko hono kau va‘e oona kuo ne li ia ki he kubega, bea oku ne eveeva i he fuga tauhele.

9 E moua ia e he hele i hono muiva‘e, bea e ikuna ia e he kaihaa.

10 Kuo ai ae tauhele kiate ia i he kelekele, moe sokitanu kiate ia i he hala.

11 E fakamanavahe‘i ia e he gaahi mea fakailifia mei he botu kotoabe, bea e fakaveevave ia.

12 E kai e he fiekaia a hono malohi, bea e tali ofi ae fakaauha ki hono vakavaka.

13 E fakaauha eia ae malohi o hono jino: io, koe uluaki fanau oe mate te ne fakaauha ene malohi.

14 E li kitua mei hono fale a hono falalaaga, bea koia e omi ia ki he tu‘i oe fakailifia.

15 E nofo ia i hono fale, he oku ikai oona ia: e tūtū‘i ki hono abi ae sulifa.

16 E momoa mei lalo hono gaahi aka, bea e motuhi mei oluga a hono vaa.

17 Ko hona manatu‘i e auha mei he fonua, bea e ikai hano higoa i he hala.

18 E kabuji ia mei he māma ki he bouli, bea e tulia ia mei he mamani.

19 E ikai ma‘u eia ha foha be mokobuna i hono kakai, e ikai toe ha niihi i hono gaahi fale.

20 Ko kinautolu e muimui iate ia te nau ofo ki hono aho, o hage koe ilifia anautolu naa nau feagai.

21 Koe mooni oku behe be ae gaahi nofoaga oe agahala, bea ko eni ae botu o ia oku tae ilo‘i ae Otua.