Vahe 2
1 Oku toe ha‘u a Setani ki he ao oe Otua, o toe ma‘u ke ahiahi‘i a Jobe. 7 Oku ne ta‘i aki ia ae gaahi hagatamaki mamahi. 9 Oku valoki a Jobe ki hono unoho, koe mea i he ene ue‘i ia ke ne lauikov‘i ae Otua. 11 Oku fakafiemalie ia e hono kaiga e toko tolu i he fakalogobe.
¶ 1 BEA nae toe ai ae aho nae fakataha ai ae gaahi foha oe Otua ke fakaha akinautolu i he ao o Jihova, bea nae ha‘u ai foki a Setani mo kinautolu ke fakaha ia i he ao o Jihova.
2 Bea behe e Jihova kia Setani, Kuo ke ha‘u mei fe? Bea tali e Setani kia Jihova, o behe, Mei he eku fakatakamilo a mamani, mo eku fealuaki fano i ai.
3 Bea nae behe e Jihova kia Setani, Kuo ke tokaga‘i a eku tamaioeiki ko Jobe, he oku ikai hano tatau i mamani, koe tagata haohaoa mo agatonu, oku manavahe ia ki he Otua, bea afe mei he kovi? bea oku ne kei kuku mau be ene agatonu, ka naa ke ue‘i au ki ai, ke fakaauha ia tae hano uhiga.
4 Bea nae tali e Setani kia Jihova, o behe, Koe kili ma ae kili, io, e foaki e he tagata ene mea kotoabe ke ne moui ai.
5 Kae mafao atu eni ho nima, o ala ki hono hui mo hono kakano, bea te ne lauikovi‘i koe i ho fofoga.
6 Bea nae behe e Jihova kia Setani, Vakai, oku i ho nima ia; ka ko ene moui be e tabu.
¶ 7 Bea alu ai a Setani mei he ao o Jihova, o ne ta‘i aki a Jobe ae gaahi hagatamaki mamahi, o fai mei hono aofi va‘e o a‘u ki hono tumuaki.
8 Bea ne too eia ae koga ibu maumau o teletele aki ia; bea tagutu ia i he efuefu.
¶ 9 Bea behe ai e hono unoho kiate ia, Oku ke kei kuku hoo agatonu? lea kovi ki he Otua, ka ke mate.
10 Ka nae behe eia ki ai, Ko hoo lea oku hage koe lea a ha taha i he kau fefine vale. Io i he te tau ma‘u koa ae lelei mei he nima oe Otua, bea ikai te tau ma‘u moe kovi? I he gaahi mea ni kotoabe nae ikai agahala a Jobe i hono lougutu.
¶ 11 Bea i he fanogo ae kaiga e toko tolu o Jobe ki he kovi ni kotoabe kuo to kiate ia, naa nau ha‘u mei ho nau botu taki taha; ko Elifasi mei Timani, mo Bilitati mei Suaa, mo Sofaa mei Neama: he kuo nau talaga ke nau fakataha ke nau mamahi mo ia mo nau fakafiemalie‘i ia.
12 Bea i he e nau haga hake kiate ia mei he mamao, o ikai ilo ia, naa nau tagi le‘o lahi; bea naa nau taki taha haehae hono bulubulu, mo li ae efu ki oluga ki ho nau ulu.
13 Bea naa nau nonofo mo ia i he kelekele i he aho e fitu moe bo e fitu, bea nae ikai jii lea ha taha ki ai: he naa nau vakai kuo lahi aubito ene mamahi.