Vahe 32
1 Oku ita a Elihu kia Jobe mo hono kaiga e toko tolu. 6 Koe mea i he ikai ha‘u moe motua ae boto, koia oku ne lea malohi, ka koe talavou be. 11 Oku ne valoki‘i akinautolu koe mea i heenau tae lea totonu kia Jobe. 16 Oku ne holi ke lea.
¶ 1 NAE tuku ai e he kau tagata e toko tolu ni e nau lea atu kia Jobe, koeuhi nae maonioni ia i hono mata oona.
2 Bea nae tubu ae ita a Elihu koe foha o Balakela koe tagata Busa, i he kaiga o Lame: nae tubu ene ita kia Jobe, koeuhi naa ne fakatonuhia‘i ia eia kae ikai koe Otua.
3 Nae ita foki ia ki hono kaiga e toko tolu, koeuhi nae ikai te nau faa talia a Jobe, ka kuo nau talatalaaki‘i ia.
4 Ka nae tatali a Elihu kae oua ke oji ae lea a Jobe, koeuhi naa nau motua iate ia.
5 Bea i he vakai a Elihu kuo ikai ha tali i he gutu oe kau tagata e toko tolu ni, nae tubu ene ita.
6 Bea nae lea a Elihu koe foha o Balakela koe tagata Busa, o ne behe, Oku ou jii au, kae motua akimoutolu; koia neu manavahe ai, o tae fie fakaha a hoku loto.
7 Neu behe, E lea ae gaahi aho, bea e akonekina ke boto e he gaahi ta‘u lahi.
8 Ka oku ai ae laumalie i he tagata: bea oku foaki kiate ia ae ilo lahi e he fakamānava ae Mafimafi.
9 Oku ikai boto ae houeiki kotoabe: bea oku ikai ilo e he mātua ae fakamāu.
10 Koia neu behe ai, Fanogo mai kiate au; teu fakaha foki hoku loto.
11 Vakai, neu tatali ki hoo mou gaahi lea; naaku fakafanogo ki hoo mou gaahi fakamatala, i he lolotoga ho mou hakule ki haa mou lea.
12 Io, neu tokaga‘i akimoutolu, bea vakai, kuo ikai ha taha iate kimoutolu kuo ne lava‘i a Jobe, be tali ene gaahi lea:
13 Telia naa mou behe, Kuo mau ilo‘i ae boto: oku li hifo ia e he Otua, kae ikai koe tagata.
14 Bea koeni, nae ikai te ne lea fakatotonu mai kiate au: bea e ikai teu tali aki ia a hoo mou gaahi lea.
15 Nae ofo akinautolu, o ikai te nau toe lea: bea fakalogo be.
16 Bea kuou tatali, (he nae ikai te nau lea, kae tutuu be, o ikai toe lea:)
17 Bea neu behe, Teu tali foki e au i hoku lakaga, teu fakaha foki hoku loto.
18 He oku ou bito i he gaahi lea, oku fakagau‘e‘i au e hoku laumalie.
19 Vakai, oku tatau hoku loto moe uaine tae hano ava; o hage koe gaahi hina oe uaine foou, oku toe jii bea mahaehae.
20 Teu lea kau fiemalie: teu faai hoku lougutu o tali.
21 Ofa ke oua naaku filifilimanako ki ha taha, bea oua naaku ai ae higoa fakalabu ki ha tagata.
22 He oku ikai teu ilo ke ai ae higoa labu; telia naa ave fakavave ai au e hoku Tubuaga.