¶ 1 KOIA oku ou kole kiate koe e Jobe, fakafanogo ki he eku gaahi fakamatala, mo ke tokaga ki he eku lea kotoabe.

2 Vakai, kuou faai eni a hoku gutu, kuo lea a hoku elelo i hoku gutu.

3 Teu lea au mei he totonu o hoku loto: bea e mahino ae ilo e lea aki e hoku lougutu.

4 Nae gaohi au e he Laumalie oe Otua, bea koe mānava oe Mafimafi kuo ne foaki ae moui kiate au.

5 Kabau te ke faa tali au, bea fokotuu hokohoko be hoo gaahi lea, tuu hake i hoku ao.

6 Vakai, oku ou tatau mo koe i he ao oe Otua: kuo gaohi foki au mei he umea.

7 E ikai fakamanavahe‘i koe e haaku fakailifia, bea e ikai mamafa a hoku nima kiate koe.

8 Koe mooni kuo ke lea i hoku teliga, bea kuou ogo‘i ae le‘o o hoo gaahi lea, o behe,

9 Oku ou maa tae ha agahala, oku ou maonioni; bea oku ikai ha hia iate au.

10 Vakai, oku ne kumi ae mea keu kovi ai, oku ne lau‘i au ko hono fili,

11 Oku ne ai hoku va‘e ki he mea fakamau va‘e, oku ne vakai‘i a hoku aluga kotoabe.

12 Vakai eni, oku ikai te ke tonuhia: teu talia koe, he oku lahi ae Otua ki he tagata.

13 He koeha oku ke fai ai mo ia? koeuhi oku ikai fakaha eia ae uhiga o ene gaahi gaue.

14 Ka oku lea ae Otua o tuo taha, io o tuo ua, ka oku ikai tokaga‘i ia e he tagata.

15 I he miji, i he mea ha mai oe bouli, i he to ae mohe mau ki he kakai, i he tule mohe i he mohega;

16 Oku ne toki fakaogo ae teliga oe kakai, o ne buluji a ho nau akonaki‘i,

17 Koeuhi ke ne taofi ae tagata mei he ene gaue aana, bea fufu ae fielahi mei he tagata.

18 Oku ne taofi mai hono laumalie mei he luo, mo ene moui ke oua naa auha i he heleta.

19 Bea oku ne tautea foki ia aki ae mamahi i hono mohega, mo hono gaahi hui aki ae mamahi lahi:

20 Koia oku fehia ai ene moui ki he ma, mo hono laumalie ki he mea kai ifo lelei.

21 Oku fakaaau o oji a hono kakano, o ikai iloa; bea oku tuu mai hono gaahi, hui nae ikai ha mai.

22 Io, oku unuunu atu hono laumalie ki he fai toka, mo ene moui ki he kau fakaauha.

23 Kabau e iate ia ha faifekau, koe fakamatala, koe taha mei he toko taha afe, ke fakaha ki he tagata ene maonioni:

24 Oku toki aloofa ai ia kiate ia, o ne behe, Fakamoui ia mei he alu hifo ki he luo: kuou ilo‘i ae huhui.

25 E moui lelei hake hono jino i ha tamajii: e toe foki ia ki he gaahi aho o ene kei jii:

26 E lotu ia ki he Otua, bea e tokaga ia ki ai: bea e mamata ia ki hono fofoga i he fiefia: he te ne totogi ki he tagata a ene maonioni.

27 Oku ne vakai ki he kakai, bea ka behe e ha taha, kuou agahala, bea fakakehe aia oku totonu, bea kuo taeaoga ia kiate au;

28 E fakahaofi eia a hono laumalie ke oua naa alu hifo ki he luo, bea e mamata ene moui ki he māma.

29 Vakai, oku faa fai e he Otua ae gaahi mea ni kotoabe koeuhi koe tagata,

30 Ke ne toe omi ai hono laumalie mei he luo, bea ne fakamāma ia aki ae māma oe moui.

31 Tokaga, e Jobe, fakafanogo kiate au: ke ke logo be, kau lea.

32 Kabau oku ai hao lea, tali mai: lea, he ko hoku loto ke ke tonuhia.

33 Kabau oku ikai, fakafanogo kiate au: ke ke logo be, kau akonekina koe ke ke boto.