Ko ha Pōpoaki Mei he Palōfitá
ʻOku Ou ʻOfa Atu
Toʻo mei he “Restoration Conversations with President Russell M. Nelson,” video collection, Gospel Media library.
Na‘e fakataha ʻa Palesiteni Nalesoni mo ha fānau Palaimeli ‘i ha fale ʻakau ‘i Palemaila, Niu ‘Ioke, USA. ‘Oku hangē ko e fale naʻe nofo ai ʻa Siosefa Sāmita he taimi naʻá ne maʻu ai ʻa e ʻUluaki Mata-Meʻa-Hā-Maí. Ko e niʻihi ʻeni ʻo e ngaahi meʻa ne vahevahe ange ʻe Palesiteni Nalesoni ki he fānaú.
Ko e Fānau Kotoa ʻa e ʻOtuá
‘Oku ʻikai mahu‘inga ʻa e feitu‘u naʻe fā‘eleʻi ai koé pe ko e feituʻu ʻokú ke haʻu mei aí pe lea fakafonua ʻokú ke lea ʻakí. Ko e fānau kotoa pē kitautolu ‘a e Tamai Hēvaní, pea te tau tupu hake ke hangē ko Iá.
Ngāué mo e Ngaahi Palé
‘Oku fie maʻu ha ngāue lahi mo e ako lahi ʻi he hoko ko ha palōfitá. ʻOku fie maʻu e ngāué ki he meʻa kotoa pē ʻoku kau ki he hoko ʻo tatau ange mo e Fakamoʻuí. ʻI he taimi ne finangalo ai ʻa e ʻOtuá ke ʻoange ʻa e Fekau ʻe Hongofulú kia Mōsesé, ko e fē ʻa e feituʻu naʻá Ne folofola kia Mōsese ke ʻalu ki aí? ʻI ʻolunga ‘i he Moʻunga ko Sainaí. Ko ia naʻe pau ke lue ʻa Mōsese ki he tumuʻaki ʻo e moʻunga ko iá ke maʻu mai e Fekau ʻe Hongofulú. ʻOku hōifua e ʻEikí ki he ngāué koeʻuhi ʻoku ʻomi ʻe he ngāué ʻa e ngaahi pale ʻe ʻikai lava ʻo maʻu ka ne taʻeʻoua ia.
Ko e Fāmili ʻo e Palōfitá
Ko ha ongomātu‘a kimaua ki ha fānau ʻe toko hongofulu, ko ha ngaahi ʻofefine faka‘ofoʻofa ‘e toko hiva mo ha foha ʻe taha. Ko e toko ua ‘i homa ngaahi ʻofefiné ʻokú na ‘i hēvani he taimí ni. Na‘á na maʻu ha ki‘i taimi nounou ʻi he māmaní, pea ‘okú na poupou mai mei hēvani kia kimautolu. ‘Oku mau fakataha ‘i he mali temipalé, ʻa ia ko hono ʻuhingá te mau fakataha ‘o taʻengata hili ʻemau ki‘i taimi ʻi he māmaní.
Ko ha Founga ki he Fiefiá
‘Oku hangē ʻa e ngaahi folofolá ko ha tohi feimeʻatokoní. Kapau ‘oku ʻikai maʻu haʻo tohi feimeʻatokoni, peá ke kamata pē ʻo tuifio e mahoaʻa mo e huʻakau mo e fuaʻimoa, mahalo ʻe ʻikai maʻu haʻo foʻi keke lelei. Kuo foaki mai ‘e he ʻOtuá maʻatautolu ha founga ki he fiefiá, pea ‘oku ui ia ko e ngaahi fekaú.
Ko e fo‘i lea fekau ʻoku ongo ia hangē ko ha tuʻutu‘uni, ʻo hangē ʻoku talamai pē kiate kitautolu ʻa e meʻa ke faí. Ka ko ha founga nounou ia ki he akó. Hangē ko ‘ení, kuó ne fekau mai ke ʻoua na‘a tau inu kava mālohi pe ifi tapaka mo e ngaahi meʻa fakatu‘utāmaki kehe. Ko e hā hono ʻuhingá? Koe‘uhi ke ke moʻui fuoloa mo fiefia ange ai. ‘Okú ke pehē ne u moʻui ʻo aʻu ki he ta‘u 95 kapau ne u ifi tapaka mo inu kava mālohi? ʻIkai. Pea ʻoku ou fiefia. ʻOku ou lava ke sikī mo hoku ngaahi makapuná.
Ko Ha me‘a Fakaofo
‘Oku ʻuhinga ‘a e fakatomalá ki heʻetau feinga ke kiʻi lahi ange, ʻi he ʻaho kotoa pē ke fai ha kiʻi ngāue lahi ange ke hoko ʻo hangē ko e ʻEiki ko Sīsū Kalaisí. ʻOku ou kei fakatomala pē. ʻI he ‘aho kotoa pē ʻoku ou feinga ke ako lahi ange pea hoko ʻo tatau ange mo e finangalo ʻa e ʻEikí ke u faí. Pea ʻoku ʻikai ko ha tautea ia. Ko ha faingamālie fakafiefia ia. ʻI he pongipongi ʻo e ʻaho kotoa pē, ʻoku ou tuʻu vave hake mei hoku mohengá mo pehē, “ʻOi, ʻe hoko ha meʻa fakaofo ʻi he ʻahó ni! Te u hoko ʻo tatau ange mo Sīsū.” ●
Tā fakatātā ʻa David Habben