Fakaafe ‘o e Nima Fietokoní
Te Ke Lava ‘o Tokoni Hangē ko Sīsuú!
‘I he taimi na‘e ‘i māmani ai ‘a Sīsuú, na‘á Ne tokoni‘i ‘a e tokotaha kotoa pē na‘á Ne ‘afio ki aí. Na‘á Ne fafanga ‘a kinautolu na‘e fiekaiá. Na‘á Ne fakafiemalie‘i ‘a kinautolu na‘e loto-mamahí. Na‘á Ne ako‘i ‘Ene ongoongoleleí ki he tokotaha kotoa pē. Na‘e kole mai ‘e Sīsū ke tau muimui ‘iate Ia. ‘I he taimi ‘oku tau papitaiso aí, ‘oku tau palōmesi ke feinga ke fai ‘a e me‘a na‘á Ne faí.
‘I he ‘aho ní ‘oku fie ma‘u ha kakai tokolahi ‘i he māmaní ‘etau tokoní. ‘Oku ta‘elata ha ni‘ihi. ‘Oku fiekaia ha ni‘ihi. Ne pau ke mavahe ha ni‘ihi mei honau ngaahi ‘apí. Kuo te‘eki ai ke fanongo ha ni‘ihi ki he ongoongoleleí. ‘E lava ke tau takitaha fai ha me‘a ke tokoni.
Ko e Me‘a ‘e Lava ke Fai ‘e Ho‘o Nima Fietokoní
‘E lava ke liliu ‘e he fānaú ‘a e māmaní ‘aki ‘enau ngaahi loto-‘ofá mo e nima fietokoní. Fakafuofua ki he ta‘u ‘e 100 kuo ‘osí, ne tokoni ‘a e fānau Palaimelí ke langa ha falemahaki ‘i Sōleki Siti, ‘Iutā, USA. Ko e uike kotoa pē, na‘a nau ‘omi ‘a e ngaahi lau sēniti ma‘á e falemahaki fo‘oú. ‘I he taimi na‘e fakaava ai ‘i he 1922, na‘e ui ia ko e Falemahaki ‘a e Fānau Palaimelí. Ko hono ‘uhingá he na‘e tokoni ‘a e fānaú ke langa māmālie ia!
‘I ho‘o vakavakai holó, te ke ma‘u ha kakai tokolahi te ke lava ‘o tokoni‘i. Te ke lava ‘o vahevahe e ongoongoleleí ‘i he founga ho‘o mo‘uí mo tokoni‘i e ni‘ihi kehé. ‘E lava ke ke tokoni kiate kinautolu ke nau ongo‘i e ‘ofa ‘a e Tamai Hēvaní.
Ko ha Fakaafe ke Tokoní
Ko e ta‘ú ni ‘oku mau fakaafe‘i koe ke ke faka‘aonga‘i homou loto ‘ofá mo e nima fietokoní ke tokoni‘i e ni‘ihi kehé. ‘Oku ha‘u ‘a e ongo‘i fiefia ‘okú ke ma‘u ‘i he taimi ‘okú ke tokoni‘i ai ha tokotahá mei he Laumālie Mā‘oni‘oní. ‘Okú ne ‘ai koe ke ke ‘ilo ‘oku fiefia ‘aupito ho‘o Tamai Hēvaní ‘i ho‘o ngaahi ngāué!
Tā fakatātā ʻa Liz Brizzy