‘Uluaki ʻAho ʻo Seikení
Ko e hala totonú nai ‘eni? Naʻe ongo‘i puputuʻu ʻa Seikeni.
“Naʻá ku kumi kia Sihova, peá ne ongoʻi au, ʻo ne fakamoʻui au mei heʻeku manavahē kotoa pē” (Saame 34:4). ‘Oku hoko ʻa e talanoa ko ʻení ʻi Soiongiki-tu, Kōlea Tonga.
Naʻe tā ha hiva fiefia ʻi he tuʻu hake ʻa Seikeni mo ʻene faʻeé mei hona seá ʻi he falevaʻinga he akó. Ne talanoa fiefia ha tamaiki kehe mo ‘enau ngaahi mātuʻá pea tētē mo ha ngaahi fo‘i pula ngingila ʻi he ngaahi tafaʻaki holisí.
Ko e ‘aho ʻuluaki ‘o e akó ‘apongipongi, pea ʻi Kōlea Tongá naʻe ō maʻu pē ʻa e tamaiki ako foʻoú ki ha polokalama makehe ke fakafiefiaʻi e kamata ʻo e akó. Naʻe ongoʻi fiefia ʻa Seikeni ʻi heʻene fanongo ki he ngaahi hivá mo e kau leá. Naʻe ʻikai ke ne faʻa tatali ke kamata ʻene akó.
Hili e polokalamá, naʻe lue atu ʻa Seikeni mo ʻene faʻeé ʻi he ngaahi holo ʻo e ʻapiakó. ‘I heʻena a‘u atu ki hono lokiakó, ne fetaulaki ʻa Seikeni mo ‘ene faiakó. Naʻá ne ngali angalelei ʻaupito.
Hili iá ne lue atu ki tuʻa ʻa Seikeni mo ʻene faʻeé ki he māfana ʻo e laʻā ʻi he fa‘ahitaʻu failaú. Ne ngali fiefia foki e laʻaá mo e langí ke kamata e akó.
‘I he pongipongi hono hokó, naʻe lue atu ʻa Seikeni mo ʻene fa‘eé ki he ʻā ʻo e ʻapiakó. Naʻe fāʻofua maʻu ʻene faʻeé kiate ia. Naʻá ne pehē ange “ʻOku ou ʻofa ʻia koe.” “ʻMaʻu ha ʻaho ʻuluaki lelei.”
Naʻe pehē ange ʻe Seikeni, “ʻIo. ʻOku ou ʻofa ʻia koe foki!” Na‘á ne taʻata‘alo fakamāvae mo tafoki ke lue ki hono lokiakó, ʻo hangē ko ia kuó na ‘osi fakaangaanga ki aí.
‘I he lue atu ʻa Seikeni he holó, naʻe kamata ke ne hoha‘a. Ko e hala totonú nai ‘eni? Na‘e tuʻu ‘a Seikeni ʻo sio takai holo. Na‘á ne tafoki pea lue atu ʻi ha holo kehe. Na‘e ʻikai fuoloa kuo ongoʻi puputuʻu e me‘a kotoa.
Ne mihiʻi lahi ʻe Seikeni ʻene mānavá. Na‘á ne ʻilo‘i naʻá ne ʻosi ‘i he holo ko ʻení ‘aneafi. Ne hoko atu pē ʻene lué ʻo ne hū atu ʻi ha ongo matapā lalahi.
Ka na‘e ʻikai ke sio ‘a Seikeni ki hono lokiakó, ʻū tesí, kaungāme‘á mo ʻene faiako angaleleí. Na‘á ne sio ki he fale vaʻingá. Pea ne ‘ikai ha kakai pe ngaahi foʻi pula he taimí ni. Ka ko ha fuʻu loki lahi pē ne ‘atā.
Na‘e loʻimata‘ia ʻa Seikeni. Naʻá ne feinga ke ʻoua ‘e hohaʻa, ka na‘á ne manavahē. Naʻe ʻikai ke ne ʻilo e founga ke maʻu ai ʻene lokiakó. Naʻá ne tūʻulutui ke lotu. “Tamai Hēvani, ‘oku ou hē. Kātaki ‘o tokoniʻi ʻa Mami ke haʻu ‘o kumi au mo tokoniʻi au ke u a‘u ki heʻeku kalasí.”
Ne tuʻu ʻa Seikeni ki ʻolunga. Na‘á ne toe toutou mānava lahi. Hili iá naʻá ne tali leva.
Hili pē ha ngaahi miniti siʻi, naʻe lue mai ʻa Mami ʻi he tuliki falé. “Seikeni!” Na‘á ne lele ki ai ʻo kuku mai ia. “Ko e hā e meʻa ne hokó?”
Naʻe kamata tangi ʻa Seikeni. Na‘á ne fuʻu fiefia ke sio kia Mami. Na‘á ne pehē, “Ne ʻikai ke u ʻilo ʻeku lokiakó. Ko ia ai na‘á ku lotu ke ke haʻu ʻo kumi au.”
Ne holoholo‘i ʻe Mami hono loʻimatá mei hono ongo kouʻahé. Naʻá ne pehē ange, “ʻOku ou fiefia ʻi hoʻo fai ha lotú. Ne u lue foki atu ki ʻapi. Ka ne u maʻu ha ongo ʻoku totonu ke u tafoki ʻo lue mai ke fakapapau‘i ʻokú ke ma‘u hoʻo lokiakó. ‘I he taimi naʻe ‘ikai ke ke ʻi ai aí, ne u fakasio takai holo. Pea na‘á ku maʻu koe!”
ʻI heʻena lue atu ʻi he holo totonú ne puke ʻe Seikeni e nima ʻo Mamí. Kuo ʻosi tuku e tangi ʻa Seikení. Na‘á ne ʻilo‘i kuo tali ʻe he Tamai Hēvaní ‘ene lotú, pea naʻe lelei e meʻa kotoa pē. ‘I heʻena a‘u atu ki he lokiakó, naʻá ne fanongo atu ki loto ki he kakata mo e fiefia ʻa e longa‘i fānau kehé.
“Seikeni! ‘Oku mau fiefia lahi ke sio kiate koe,” ko e lea ange ia e faiako ʻa Seikení ʻi heʻene hū atu ki lotó.
Ne pehē ange ʻe Seikeni ʻi haʻane kiʻi punou hifo, “Mālō.” Na‘á ne toe fāʻofua kia Mami. Ta ko ē ʻe hoko pē ko ha ʻuluaki ʻaho ako lelei.
Tā fakatātā ʻa Shane Clester