ʻOfa kia Kulenimā mo Kulenipaá
ʻOku nofo ʻa e tokotaha naʻá ne faʻú ʻi Kololato, USA.
Naʻe lava fēfē ke ʻofa ʻa Souī ki ha tokotaha ne teʻeki ai ke na fetaulaki?
“ʻE liliu ʻa e loto ʻo e fānaú ki heʻenau ngaahi tamaí” (Tokāteline mo e Ngaahi Fuakava 2:2).
Na‘e uʻu ‘e Souī ʻene kūkisí. “Ummm.”
Ne pehē atu ʻa e tuongaʻane lahi ʻo Souī ko Siakí, “ʻOku tatau tofu pē ʻeni mo e kūkisi ʻiloa ʻa Kulenimaá. Na‘á ne ngaohi e kūkisi ifo tahá!”
Ne mate ‘a e ongomātuʻa ‘a Tetí kimu‘a pea fāʻele‘i ʻa Souií. Ne talanoa maʻu pē hono ngaahi tuongaʻané, tokouá mo e tokoua ‘aki lahí fekauʻaki mo Kulenimā mo Kulenipā.
Ne pehē ange ʻe Teti, “Ko ha taha kuki tōtōatu hoʻo kulenimaá. ‘Oku ou manatu ʻofa ki he ngaahi ma‘u meʻatokoni efiafi ne na faʻa teuteuʻi mo Kulenipā he Sāpate kotoa pē. Na‘á na faʻa fakaafe‘i maʻu pē ʻa e fāmilí hono kotoa.”
Naʻe mei fēfē nai kapau ne u maheni mo Kulenimā mo Kulenipā? Na‘e fakakaukau pehē ʻa Souī.
Na‘e fakafanongo ʻa Souī ki hono fāmilí ʻi heʻenau fai ha ngaahi talanoa lahi ange kau ki heʻene ongo kuí. Na‘á ne saiʻia ʻaupito ke fanongo kau kia naua, ka naʻá ne toe kiʻi ongo‘i tuenoa foki. Ne ʻikai haʻane ngaahi manatu melie ke vahevahe.
Hili ha ngaahi ‘aho siʻi mei ai na‘á ne ʻi he ʻapi ʻo hono tokoua ʻaki lahi ange ko Lilí. Na‘e ʻi he funga mohenga ‘o Lilí ha tamapua tupenu.
“‘Okú ne talavou ʻaupito!” Ko e lea atu ia ʻa Souií. Na‘á ne kiʻi ala atu pē ki he kofu ʻo e tamapuá.
Na‘e pehē ange ʻe Lili, “Ne foaki mai ʻe Kulenimā ia maʻaku. Na‘á ne fai maʻu pē ‘a e ngaahi meʻa lelei hangē ko iá. ʻOku ou fuʻu ‘ofa ki ai.”
Ne pehē atu ʻe Souī, “‘Oku ou ʻofa mo au ki ai.” Peá ne fakafulofula. Naʻe anga fēfē ʻene ‘ofa ki ha taha naʻe te‘eki ai ke feʻiloaki mo ia?
‘I he uike hono hokó ne fakakaukau maʻu pē ʻa Souī kau ki heʻene ongo kuí. Ko e taimi kotoa pē ne talanoa ai ha taha fekauʻaki mo kinauá, na‘á ne ongoʻi ha konga naʻe pulia ʻi hono lotó.
ʻI ha pō ʻe taha ne talaange ʻe Souī kia Teti, “Ne teʻeki ai ke u fetaulaki mo Kulenimā mo Kulenipā. Ko e hā e ʻuhinga ‘oku ou fuʻu loto-mamahi aí he kuó na mālōlō?”
Ne malimali ʻa Teti. Peá ne tuku atu ha kiʻi mānava leʻo siʻi. “Ne ʻofa ho‘o ongo kuí ‘i hona fāmilí ʻo lahi ange ʻi ha toe me‘a.” Ne ki‘i hangē ʻoku liliu e ongo hono leʻó. “‘Oku ou ʻilo naʻe ‘ikai ke liliu ia ʻi he hili ‘ena mālōloó. ʻOkú na ʻofa lahi ʻaupito ʻia koe. Pea ‘okú na poupou kiate koe ʻi hoʻo tupu haké.”
Na‘e fisipaaʻi ‘e Teti hono ngaahi foʻi tuhú. “Hei, ʻoku ʻi ai ʻeku fakakaukau. Mahalo ʻoku totonu ke tau fai ha lēsoni fakafāmili makehe ke tokoni kia koe ke ʻilo lelei ange kau ki hoʻo ongo kuí.”
Naʻe pehē ange ʻe Souī, “‘Oku ongo sai ia.”
Ne toe malimali ʻa Teti. “‘E lava ke ke ako ha ngaahi meʻa fakafiefia kehekehe, hangē ko e faʻa tohi ʻe Kulenimā ha fanga kiʻi hiva fakaoli ki hono makapuná.”
Naʻe faka‘amu ʻa Souī ne ʻi ai haʻane foʻi hiva mei heʻene kuifefiné.
‘I he pō hono hokó, naʻe fakataha mai ‘a e fāmilí ke nau vahevahe ha ngaahi talanoa manakoa lahi ange kau kia Kulenimā mo Kulenipā. Na‘a nau vahevahe foki mo e niʻihi ʻo e ngaahi hiva fakaoli na‘e tohi ʻe Kulenimaá!
‘I he fakaʻosi ‘o e lēsoní, naʻe tafoki hake ‘a Mami kia Souī. Na‘á ne pehē ange, “ʻOku ou ‘ilo kuó ke faʻa fakakaukau lahi kau ki ho‘o ongo kuí. Te ke fetaulaki mo kinaua ʻi ha ʻaho. Lolotonga iá, naʻá ma fakakaukau mo Teti mahalo ʻe tokoni ʻeni ke ke ongoʻi vāofi ange kia kinaua.” Na‘e ʻoange ‘e Teti ha laʻitā ʻo Kulenimā mo Kulenipā kia Souī.
Ne ongo‘i fiefia ʻa Souī ʻi he‘ene sio ki he laʻitā ʻo ‘ene ongo kuí. ʻE ʻi ai pē ha ‘aho ʻe faifai pea te ne fetaulaki mo kinaua! ●
ʻOku ou manako ke ako kau ki hoku fāmilí. ‘Oku ou fie ʻilo ki hoku fāmilí mo ʻilo ʻa e hisitōlia ‘o ʻeku ngaahi kuí. ‘Oku ou fiefia ʻoku lava ke tokoniʻi au ʻe he kakai kehé ke u ‘ilo lahi ange kau ki hoku fāmilí.
ʻEnisou R., taʻu 9, Lio Kalanite to Sulu, Palāsila
Tā fakatātā ‘a Joanne Lew Vriethoff