Tekisī Pē ʻe Taha
ʻOku nofo ʻa e taha naʻá ne faʻú ʻi Kalolaine Tokelau, USA.
Naʻe lotu ʻa e ongo tamaiki fefiné, “Tokoniʻi kimautolu ke maʻu ha tekisī pē ʻe taha koeʻuhí ke mau lava ‘o aʻu ki he lotú he ʻahó ni.”
“ʻOku ou fiefia maʻu pē ʻi heʻeku ʻalu ki he lotú” (Childrenʻs Songbook,157).Naʻe hoko ʻa e talanoá ni ʻi Kenitapulia, Sipeini.
“ʻE Fēfē haʻatau aʻu ki he lotú he ‘ahó ni?” Na‘e fehuʻi ʻe he kiʻi tokoua ʻo ‘Eli, ko Pepá. “‘Oku ʻi ai ha fuʻu ‘uha lahi!”
Naʻe talaange ʻe ʻEli, “ʻOua te ke tokanga ki ai. ʻOku tau loto-toʻa!”
Na‘e tokoni ʻa ‘Eli kia Pepa ke fakamaʻu hono koté. Na‘á ne tui hake leva hono puti ʻuha ʻoʻoná.
Na‘e lue ʻa ‘Eli mo Pepa ki tu‘a mo Mami mo Papa. Ne toe lahi ʻaupito ange ʻa e ʻuhá. Naʻe fulihi ʻe he havilí honau fakamalú ke ʻalu ʻa loto ki tu‘a. Ne ʻikai ke toe fuʻu loko ongo‘i loto-toʻa ʻa ʻEli.
“Ko e hā ʻoku totonu ke tau faí?” Ko e fehuʻi ange ia ʻa ʻElí. Na‘e fuʻu mālohi e matangí ke lue ki he pasí.
Na‘e pehē ange ʻe Papa “Te tau ō tekisī leva.”
Naʻe pehē ange ʻe Mami, “Fakakaukau sai ia. Tau ō!”
Na‘a nau lue atu he hala naʻe tāfeá. Ne ‘ikai ha tekisī pe ʻū kā naʻe lele fakalaka hake ʻiate kinautolu. Na‘a mo e panadería (fale taʻo mā) ne tāpuni.
Ne faifai pea na‘a nau sio ki he feituʻu naʻe tau ai ʻa e ʻū tekisī ke fakaheka e kakaí. Ka na‘e ʻikai ha meʻa ‘i he tauʻanga tekisī fika ʻuluakí.
“ʻOiauē!” Ko e lea ia ʻa Pepá.
“Está bien. ʻOku sai pē,” ko e lea ange ia ‘a ʻElí. “‘E lava pē ke ʻi ai ha taha. Ka ʻoku teʻeki ai pē ke tau lava ʻo sio ki ai.”
Na‘a nau lue atu ʻo ofi ange. Na‘e ʻikai foki mo ha meʻa ʻi he tauʻanga hono hokó.
Ne ʻeke ange ʻe Pepa, “Ko e hā leva he taimi ní?”
Naʻe pehē ange ʻe ʻEli, “ʻOku ou ʻilo. Tau lotu.”
Ne lotu leʻo siʻi ʻa e ongo tamaiki fefiné. “Nuestro Padre Celestial, kātaki tokoniʻi kimautolu ke maʻu ha tekisī pē ʻe taha koeʻuhí ke mau lava ‘o aʻu ki he lotú he ʻahó ni. ‘Oku mau feinga ke fili ki he totonú, pea ʻoku hanga ʻe he ʻuhá ni ʻo ʻai ke faingataʻa ia. En el nombre de Jesucristo, amén.” Ne kei ako lea faka-Sipeini ʻa ʻEli, ko ia ai naʻá ne tuifio fakataha ʻa e lea faka-Pilitāniá mo e faka-Sipeiní.
Na‘a nau toe kiʻi lue atu pē. Na‘e hala pē foki mo e tauʻanga hono hokó.
Naʻe kaila atu ʻa Papa ʻi he havilí, “Mahalo ‘oku totonu ke tau foki ki ‘api.”
Ne pehē atu ‘e Mami, “ʻOku pīponu hotau va‘e!”
Naʻe pehē ange ʻe ʻEli, “Tau luelue atu pē ke toe kiʻi mamaʻo atu. ‘Oku tau fie maʻu ha tekisī pē ‘e taha.”
Ne lava ke nau sio he taimí ni ki he tauʻanga fakaʻosí.
Na‘e tau ai, ha tekisī ʻoku moʻui hono maama lanu matá!
Na‘e heka vave hake ʻa ‘Eli mo Pepa ki he tekisií. Ne tokoni ʻa Mami ke fakatokaleleiʻi hifo hona ‘ulú. Naʻe pehē ange ʻe Papa ki he fakaʻulí, “‘Oku mau kole fakamolemole atu hono fakavivikuʻi hoʻo ngaahi seá.”
Na‘a nau aʻu atu ki he falelotú pea fakafe‘iloaki ki honau kaungāmeʻá ʻaki ʻenau besos mo abrazos (feʻiloaki mo e fāʻofua).
Naʻe pehē ange ‘e Mami, “‘Oku ʻikai ke u tui ne ma‘u hatau tekisī. ¡Que suerte!”
Naʻe lea atu ʻa ʻEli, “‘Oku ʻikai ko ha monū‘ia. Naʻá ma lotu mo Pepa ke tokoni‘i kitautolu ʻe he Tamai Hēvaní ke aʻu ki he lotú. Pea naʻá Ne fanongo mai!” ●
Tā fakatātā ʻa Patricia Geis