Lotuʻi ‘o e Foʻi Maá
ʻOku nofo ʻa e tokotaha naʻá ne faʻú ʻi ʻIutā, USA.
‘Okú ke ‘ilo fēfē kapau ‘oku folofola atu ‘a e Laumālie Mā‘oni‘oní kiate koe?
“Falala ki he Laumālie ko ia ʻoku tākiekina ke faileleí” (Tokāteline mo e Ngaahi Fuakava 11:12).
“Te ke ʻilo fēfē ʻa e taimi ʻoku folofola mai ai ʻa e Laumālie Māʻoniʻoní kiate koé?” Na‘e sio hake ʻa Kava mei heʻene folofolá.
Na‘e malimali ʻa Teti mo tuku hifo ‘ene tohi Haʻu, ʻo Muimui ʻIate Aú . “‘E lava ke folofola atu ʻa e Laumālie Mā‘oniʻoní kiate koe ‘i ha ngaahi founga lahi. Taimi ‘e niʻihi ko ha ongo, pe ko ha fakakaukau ‘oku hū hake ʻi hoʻo ngaahi fakakaukaú.”
Na‘e fakafulofula ʻa Kava. “Ka ʻokú ke ʻilo fēfē ko e Laumālie Māʻoniʻoní ia?”
Ne pehē atu ʻa Mami, “Mahalo ʻe lava ke tau fai ha lotu ke tokoni‘i kitautolu ke maʻu ‘a e talí.”
Na‘e fai ʻe ha taha ʻo e ongo tuofāfine ʻo Kavá ʻa e lotú. Hili ia pea nau fononga atu ki he akó. Na‘e fakakaukau ʻa Kava ki heʻene fehuʻí he kotoa ʻo e ‘ahó.
‘I he taimi naʻá ne a‘u ai ki ʻapí, naʻe namu ifo ‘a e falé. “Mā!” Ko e kaila ia ʻa Kavá.
Ne pehē ange ‘e Mami, “ʻOku tonu ia. Ne u ngaohi ha mā ke tau vahevahe mo e ni‘ihi kehé.”
Naʻe sio ʻa Kava ki hono ongo tuofāfiné. Naʻe mingiʻi hake ʻe ʻEva hono ihú. Na‘e hikiʻi hake ‘e Seini hono ongo kemó. “Ko ho‘o ʻuhingá ‘e ʻikai ke mau kai ia?” Ko e fehuʻi ange ia ʻa Seiní.
Na‘e pehē ange ʻe Teti, “Ne ma fie maʻu ke akoako ke fakafanongo ki he Laumālie Mā‘oniʻoní.” “Ko ia ai ne maʻu ʻe Mami ha foʻi fakakaukau.”
Te nau takitaha lotu ke fehuʻi ki he Tamai Hēvaní pe ko hai te ne fie maʻu ke ongo‘i ʻoku ‘ofaʻi ia ‘i he ʻaho ní. Hili ia pea te nau ‘oange ki he tokotaha ko iá ha mā.
Naʻe tūʻulutui ‘a Kava ʻi hono veʻe mohengá. Na‘á ne fie maʻu ke fanongo ki he Laumālie Mā‘oniʻoní, ka naʻe ongo fēfē e leʻo ʻo e Laumālie Māʻoniʻoní. Na‘á ne mihiʻi lahi ‘ene mānavá pea kuikui hono matá.
“Tamai Hēvani, ko hai ‘oku fie maʻu mā ‘i he ʻaho ní?”
Na‘e feinga ʻa Kava ke fakafanongo ki he Laumālie Mā‘oniʻoní, ka na‘e ʻikai ke ne fanongo ki ha faʻahinga me‘a. Na‘á ne manatuʻi hake ʻene fakalaka mai he ʻapi ʻo Sisitā Sāmitá ʻi heʻene foki mai ki ʻapi mei he akó. Na‘á ne taʻata‘alo mai maʻu pē kiate ia. Mahalo pē naʻá ne saiʻia he maá. Tōatu!
Naʻe tufa atu ʻe Mami ha fanga kiʻi kaati ke hiki ai ha ngaahi fakamatala maʻá e kakai te nau ʻaʻahi ki aí. Naʻe tohi ʻe Kava, “Siʻi Sisitā Sāmita, ne u fai ha lotu ke sio pe ko hai ha taha ʻoku totonu ke u foaki ki ai ʻa e mā ko ʻení. Ne u tatali ai ki ha ue‘i fakalaumālie, pea FAKAʻOHOVALE! naʻá ku fakakaukau kiate koe. ‘Ofa atu, Kava.”
‘I he taimi ne fakaʻuli atu ai ʻa Mami ki he fale ʻo Sisitā Sāmitá, ne toʻo mai ʻe Kava ʻene foʻi maá pea lue atu ki he matapā ʻi muʻá. Naʻá ne ongoʻi loto-siʻi. Fēfē kapau na‘e ʻikai ke sai‘ia ʻa Sisitā Sāmita ia he maá? Fēfē kapau ko e fakakaukau pē ia ʻaʻana ke ‘aʻahi ki aí kae ʻikai ko e Laumālie Māʻoni‘oní?
Naʻe manatuʻi leva ʻe Kava ʻa e meʻa ʻe taha naʻe lea ki ai ʻa Mamí. Na‘á ne pehē kapau ko ha fakakaukau lelei pe angaʻofa, ‘oku ʻikai fie ma‘u ke ke hohaʻa pe ko hoʻo fakakaukau pē ia ʻa koe. ‘Oku lelei maʻu pē ke fai ha ngaahi ngāue angaʻofa! Ne mihiʻi lahi ʻe Kava ʻene mānavá pea fakatatangi e fafangu he matapaá.
Naʻe fakaava hake ʻe Sisitā Sāmita e matapaá. “Mālō e lelei, Kava! Ko e hā ʻoku ʻomi ai koe ki hení?”
Na‘e ʻoange ‘e Kava ʻene foʻi maá. Na‘á ne sio ki hono ongo suú, pea foki hake kia Sisitā Sāmita. “‘Okú ke saiʻia he mā ngaohi ʻi ‘apí?”
“Ko hoku manakó ia!” Naʻá ne malimali leva. “Mālō ʻaupito.”
Naʻe malimali foki mo Kava. “Mālō!” Ne lahi ange ʻa e ngaahi meʻa ne haʻu ki heʻene fakakaukaú. Na‘á ne muimui ki he ueʻi ko iá ʻi he taimi pē ko iá. “‘Oku ʻafioʻi ʻe he Tamai Hēvaní ko hoʻo manakó ia. ʻOkú ne ʻofa lahi ‘iate koe!”
Na‘e kamata ke loʻimataʻia e mata ʻo Sisitā Sāmitá. “‘Oku ou fiefia ʻoku lava ke Ne falala atu ka koe ke fanongo kiate Ia.”
Ne ongo‘i fiefia lahi ʻa Kava. Na‘á ne taʻata‘alo kia Sisitā Sāmita pea foki ki he kaá. Na‘á ne ʻiloʻi leva he taimí ni ko hono foaki ‘a e maá kia Sisitā Sāmitá ko ha ueʻi ia mei he Laumālie Mā‘oniʻoní. Na‘á ne fiefia ke toe fakafanongo ki he Laumālie Māʻoni‘oní! ●
Tā fakatātā ʻa Hollie Hibbert