Ko e Palopalema ‘i he Pātí
ʻOku nofo ʻa e taha naʻá ne faʻú ʻi Kolienitesi, ʻĀsenitina.
Ne ʻi ai e fakakaukau ʻa e Lusi ʻoku fie ʻalu ki he pātí. Ka na‘á ne kei ongoʻi ta‘e fiemālie pē.
“Fakakaukauʻi ia ʻi ho ʻatamaí; pea … toki fehuʻi mai kiate au pe ʻoku totonu ia” (Tokāteline mo e Ngaahi Fuakava 9:8). ʻOku hoko ʻa e talanoá ni ʻi Kolienitesi, ʻĀsenitina.
Naʻe ongoʻi fiefia ʻa Lusi. Ne fakaʻosiʻosi e taʻu fakaakó pea ne lahi ha ngaahi meʻa ne hoko. He ʻikai fuoloa kuó ne ʻosi mei he kalasi onó. ʻI he taʻu hono hokó, te ne ʻi he ako maʻolungá!
Ne fakaʻohovale kiate ia e lahi ʻo ‘ene tupú. Na‘á ne tupu lahi ange, pea naʻe ‘ikai ke ne toe kei siʻi. Na‘e fakafiefia ʻa e ngaahi liliu ko iá, ka naʻá ne toe kiʻi ongo‘i manavasiʻi.
Na‘á ne fakakaukau leva ke talanoa ki ai mo ʻene ongomātu‘á.
Ne pehē ange ʻe Papá, “Ko ha taimi faka‘ofoʻofa eni ‘i hoʻo mo‘uí. “Ko ha taimi ia kia koe ke ke ako, fai ho lelei tahá pea lavaʻi e ngaahi taumuʻa te ne tokoniʻi koe ke ke hoko ko e tokotaha ʻoku ʻafioʻi ʻe he ʻOtuá te ke lava ʻo aʻusiá.”
Na‘e pehē atu leva ʻe Mamá, “Ka ʻoku hoko mai ʻa e moʻuí he ʻaho ʻe taha ʻi he taimi. “Te ke tupu pea hoko ko e tokotaha ko iá ‘i he kiʻi fili lelei kotoa pē te ke faí.”
Ne tokoni ia ka Lusi ke ongo‘i sai ange. Na‘á ne fiefia he ‘ikai ke fie maʻu ke ne tupu hake he taimi pē ʻe taha.
‘I ha ʻaho ‘e taha ʻi he akó, ne talaange he ngaahi kaungāme‘a ʻa Lusí ki ai ʻe teu ke fakahoko haʻanau paati fakaʻosi ako. Naʻa nau fuʻu loto-vēkeveke ʻaupito. ʻE ‘i ai ha ma‘u meʻatokoni efiafi, hiva, ngaahi maama pea pehē foki mo ha hulohula!
Ka ‘i he fakafanongo ʻa Lusi ki he talanoa ‘a hono kaungāmeʻá fekauʻaki mo e pātí, na‘e kamata ke ne ongoʻi ta‘e-fiemālie. Ne ʻikai ke ne ongoʻi ko ha faʻahinga paati ia te ne lava ʻo ongoʻi ai ʻa e Laumālie Māʻoniʻoní.
Ne ʻeke ange he taha hono kaungāmeʻá, “Te ke haʻu ki ai, he koaa Lusi?”
Ne talaange leva ʻe hono kaungāmeʻa kehe ʻe taha, “Kuo pau ke ke haʻu! Te u talaange ki heʻeku ongomātu‘á ke fakalea ki hoʻo ongomātu‘á. Pea te na tukuange koe ke ke haʻu.”
“Mahalo pē.” Ne ongoʻi ʻe Lusi naʻe tokakovi hono keté. “Te u … Te u toki tala atu.”
Na‘e fakamoleki ʻe Lusi e toenga ‘o e fakaʻosinga e uiké ki hono fakakaukauʻi ʻo e pātí. Na‘á ne fakakaukau ki ai lolotonga ʻene akoako tā pianó. Na‘á ne fakakaukau ki ai lolotonga ʻene vaʻinga mo hono kiʻi tuongaʻane kei pēpeé. Tatau ai pē pe ko e hā na‘á ne faí, naʻe ‘i hono ʻatamai ia.
Naʻe ʻi ai ʻene fakakaukau ke ʻalu ki he pātí. Ka na‘á ne kei ongoʻi ta‘e fiemālie pē. Ne ʻikai tuku e ongoʻi manavasiʻi ʻi hono keté.
“ Hija, ʻokú ke sai pē?” Ne ʻeke ange ʻe Mamá ʻi he hoʻatā Sāpaté. Na‘á ne helu ʻaki hono louhiʻinimá ‘a e louʻulu loloa, fakapōpō‘uli ʻo Lusí.
Ne pehē ange ʻe Lusi, “ʻOku …”
“‘Okú ke kei fakakaukau pē ki he pātí?”
Ne pehē ange ʻe Lusi, “ʻOku ʻikai te u ʻilo e meʻa ke faí. ʻOku ou fie ʻalu. Ka ‘oku ou ʻilo ʻe ‘ikai ke u ongoʻi fiemālie ai.”
Ne malimali pē ʻa Mamá. Na‘á ne pehē atu leva, “ʻOku ou ‘ilo te ke fai ha fili lelei. Fakakaukau ki ai, fai ho‘o filí, pea talaange ki he Tamai Hēvaní ʻa e fili kuó ke faí. Te Ne tokoni atu ke ke ‘ilo pe ‘oku totonu. Te ke ongo‘i ia ʻi ho lotó.”
Na‘e kamokamo pē ʻa Lusi. Na‘á ne mihiʻi lahi ‘ene mānavá peá ne ʻalu ki hono lokí ke lotu.
Ne fanafana ʻa Lusi, “Tamai Hēvani. Na‘e fakaafeʻi au ‘e hoku kaungāmeʻá ki ha paati, ka ‘oku ʻikai ke u ongo‘i fiemālie ki ai. Te u talaange kiate kinautolu he ʻikai lava ke u ʻalu atu. Ko e meʻa totonu eni ke faí?”
Ne haʻu kia Lusi ha ongoʻi māfana mālohi. Naʻe ʻikai ke ne toe ongoʻi puputuʻu. Na‘á ne ongoʻi hangē na‘á ne fonu ʻi ha māmá! Na‘á ne ʻilo‘i naʻá ne fai e fili totonu.
‘I he hū mai ‘a Lusi mei hono lokí, naʻá ne fā‘ofua lahi kia Mamá.
Ne talaange ʻe Lusi, “Ne u fakakaukau he ʻikai te u ʻalu.”
Naʻe pehē ange ʻe Mamá, “ʻOku ou laukau ʻaki koe.”
Ne fāʻofua foki mo Papá kia Lusi. Naʻá ne pehē ange, “ʻOku ʻi ai ʻeku fakakaukau.” Tau ʻai pē ʻe tautolu haʻatau paati fakaʻosi ako. Te tau kai ʻaisikilimi mo fakafiefia fakafāmili!”
Ne malimali ʻa Lusi. Na‘á ne saiʻia ‘i he ʻaisikilimí! Pea na‘á ne saiʻia ‘i hono ʻiloʻi te ne lava ʻo fai e me‘a ʻoku totonú, ʻo tatau ai pē ʻi he taimi naʻe faingata‘a aí. ‘I he fili siʻisiʻi mo lelei kotoa pē naʻá ne faí, te ne lava ʻo tupu hake ʻo hoko ko e tokotaha ne ʻafioʻi ʻe he ʻOtuá te ne lava ʻo aʻusiá. ●
Tā fakatātā ʻa Tammie Lyon