Haʻu, ʻo Muimui ʻIate Au

ʻOku ʻalu fakatatau ʻa e ngaahi fakakaukau ko ʻení mo e Haʻu, ʻo Muimui ʻIate Au—ma‘á e Fakafoʻituituí mo e Ngaahi Fāmilí he uike kotoa pē.

home evening ideas

Lau ‘a e Tokāteline mo e Ngaahi Fuakavá

Ki he Tokāteline mo e Ngaahi Fuakava 1

• Hiva ʻa e “Fekumi Kei Siʻi Ki he ʻEikí” (Tohi Hiva ʻa e Fānaú, 67).

• Na‘e uiuiʻi ʻe Sīsū Kalaisi ‘a Siosefa Sāmita ke tokoni ke toe fokotuʻu Hono Siasí. Na‘á ne foaki kia Siosefa ha ngaahi fakahinohino makehe naʻe hiki hifo kae lava ke tau lau ia he ‘ahó ni (vakai, Tokāteline mo e Ngaahi Fuakava 1:17, 30).

• ‘I he peesi 24, kumi ha saati laukonga ke tokoniʻi koe ke lau ‘a e Tokāteline mo e Ngaahi Fuakavá ʻi he kotoa ʻo e taʻú! Lau mo valivali ‘a e ʻuluaki kongá ke ke kamata ʻaki.

Mālohi ‘o e Lotú

Ki he Siosefa Sāmita—Hisitōlia 1:1–26

• Hiva ʻa e “Ko e Fua Lotu ‘a Siosefá” (Ngaahi Himi, fika 14).

• Naʻe ʻi ai ha fehuʻi ʻa Siosefa Sāmita . ‘I he taimi naʻá ne lotu aí, naʻe hā mai ʻa e Tamai Hēvaní mo Sīsū ʻo folofola ange kiate ia (vakai, Siosefa Sāmita—Hisitōlia 1:15–19).

• ʻOku fanongo foki ʻa e Tamai Hēvaní ki hoʻo lotú! ʻOkú Ne faʻa tali mai ʻo fakafou ʻi he Laumālie Mā‘oniʻoní. Fili ha talanoa kau ki he lotú (vakai, peesi 12, 36, pe 46) pea lau fakataha ia. Na‘e tali fēfē ʻe he Tamai Hēvaní ‘a e lotu ʻi he talanoá? Kuó Ne tali fēfē kiate koe?

Ngaahi Haati Fakafāmilí

Ki he Tokāteline mo e Ngaahi Fuakava 2, Siosefa Sāmita—Hisitōlia 1:27–65

• Hiva ʻa e “Family History—I Am Doing It” (Childrenʻs Songbook, 94).

• Naʻe fekau ʻe he ʻEikí ʻa ‘Ilaisiā ke liliu hotau lotó ki he kau mēmipa hotau fāmilí ne moʻui ‘i muʻa ‘iate kitautolú (vakai, Tokāteline mo e ngaahi Fuakava 2:2). ‘I he taimi ʻoku tau liliu ai hotau lotó ki hotau ngaahi fāmilí, ‘oku tau manatu kiate kinautolu pea fai e ngāue fakatemipalé maʻanautolu.

• Kosi ʻo toʻo ha ngaahi foʻi pepa haati. Hiki taki taha ai e hingoa ʻo ha mēmipa ‘o e fāmilí. Taufetongi ‘i hono pukepuke hake ʻa e ngaahi foʻi hātí pea vahevahe ‘a e ngaahi talanoa fekauʻaki mo e tokotaha kotoa pē. Te ke lava ʻo kole ki hoʻo ongomātu‘á ke fai ha ngaahi talanoa kau ki heʻenau mātu‘á pe ngaahi kuí.

Muimui ki he Takí, Muimui ‘i he ‘Otuá

Ki he Tokāteline mo e Ngaahi Fuakava 3–5

• Hiva ʻa e “Tauhi ʻa e Ngaahi Fekaú” (Ngaahi Himi 195).

• Naʻe ako ʻe Siosefa Sāmita ʻoku mahuʻinga ange ʻa e muimui ki he ngaahi fakahinohino ʻa e ʻOtuá ʻi hono fai e meʻa ʻoku fie maʻu ʻe he kakai kehé (vakai, Tokāteline mo e Ngaahi Fuakava 3:5–8).

• ʻI he taimi ní fai ha kiʻi vaʻinga! Fili ha toko taha ke hoko ko e takí. ‘Oku ʻoange ‘e he takí ki he tokotaha kotoa pē ha ngāue ke fai, hangē ko e luelue ‘i he lokí pe pasipasi tuʻo tolu. Fakaangaanga ke fai ‘a e meʻa ʻoku kole atu ‘e he takí, kae ʻikai ko e me‘a ʻoku fai ‘e he kakai ʻoku mou feohí!

Lotu pea Ngāue Tokoní

Ki he Tokāteline mo e Ngaahi Fuakava 6–9

• Hiva ʻa e “Fekumi, Fifili pea mo Lotu” (Tohi Hiva ʻa e Fānaú, 66).

• ‘I he taimi ʻoku tau fie ma‘u ai ke fai ha ngaahi ngāue leleí, ʻe tokoni‘i kitautolu ʻe he Tamai Hēvaní. Te tau lava ‘o fehuʻi kiate Ia pe ko hai te tau lava ‘o tokoniʻí, pea te Ne tali mai (vakai, Tokāteline mo e Ngaahi Fuakava 6:5, 8).

• Lau ʻa e “Ko e Lotuʻi ʻo e Fo‘i Maá” ʻi he peesi 16. Hili iá peá ke lotu ke ‘iloʻi pe ko hai ‘e lava ke ke tokoniʻí, pea fai ha ngāue ʻofa ma‘anautolu!

Tā fakatātā ʻa Katy Dockrill