To‘a ko ‘Ōlivá
ʻOku nofo ʻa e taha naʻá ne faʻú ʻi Kalefōnia, USA.
“Ahhhh!” Ko e kaila ia ʻa ‘Ōlivá. Na‘á ne puna ki he mohenga ʻo Mami mo Tetí. “ʻOku tuli au ʻe ha fuʻu manu fakailifia!”
Naʻe talaange ʻe Mami, “Naʻá ke misi fakailifia pē. ʻOku ʻikai moʻoni e fuʻu manu fakailifiá ia.” Naʻá ne kuku mai ia. Ne na fāʻofua ma‘u.
Na‘e tetetete ʻa ‘Ōliva. “Naʻe lōloa ʻaupito. Ne lanu engeenga hono ongo foʻi matá mo nifo lanu mata. Naʻá ku fai ha lotu. Ka ne u kei sio pē ʻoku haʻu!”
Na‘e pehē ange ʻe Teti, “‘Oku ou fiefia ʻi ho‘o kole ki he Tamai Hēvaní ha tokoní. Ko e hā mo ha meʻa kehe te ke lava ʻo fai?”
“Ko e hā hoʻo ʻuhingá?” Naʻe pehē ange ʻe ‘Ōliva.
“Manatu‘i e taimi naʻá ke fai ai ha lea ‘i he Palaimelí? Naʻá ke lotu ki ha tokoni. Ka ko ia kotoa pē naʻá ke faí?”
Naʻe talaange ʻe ʻŌliva, “Naʻá ku akoako hono fakahokó. Na‘á ku tuʻu ‘i muʻa ‘i he sioʻatá. Na‘á ku toutou fakahoko ʻeku leá.”
“Pea naʻá ke fai ha lea lelei ʻaupito!” Ko Teti ange ia.
“Pea manatu‘i e taimi naʻá ke fakamoleki ai ʻa ho‘o kā meʻava‘ingá?” Ko e lea ange ia ʻa Mamí. “Naʻá ke lotu ke ke ‘iloʻi ia. Hili ia pea naʻá ke kei ʻi ho tuí pē?”
“ʻIkai. Na‘á ku kumi mo kumi. Ne u kumi ʻi hoku lalo mohengá. Pea ne u vakai leva ‘i mui he seá.”
“Pea naʻe maʻu ia!” Ko e tali ange ia ʻa Mamí.
Naʻe pehē ange ʻe Teti, “Ko ia ai, ʻe fēfē haʻo tuli e fuʻu manu fakailifiá?”
Na‘e fakakaukauloto ʻa ‘Ōliva ʻokú ne tui ha teunga tau.
Naʻá ne pehē, “‘Uluakí, lotu.”
“Sai. Hoko leva ki he hā?”
“‘Te u lava ʻo fai ha ngaahi mānava lahi. Pea te u lava leva ʻo hivaʻi ʻa e ʻFānau Au ʻa e ʻOtua.ʼ”
“Ko ha palani lelei ia!” Ko e lea ange ia ʻa Mamí. “Foki leva ʻo mohe he taimí ni.”
‘I he pongipongi hokó naʻe lele ‘a ʻŌliva ke talanoa kia Mami mo Teti.
Na‘á ne pehē ange, “Ne u toe misi ki he fuʻu manu fakailifiá. Ka ne u fai ha lotu pea muimui ki he‘eku palaní. Pea na‘e ʻalu leva ‘a e fuʻu manu fakailifiá!”
Na‘e talaange leva ʻe Teti, “‘Oku ou fiefia lahi kuo ʻalu ʻa e fuʻu manu fakailifiá. Ta ʻoku tali moʻoni pē ʻe he Tamai Hēvaní hoʻo ngaahi lotú.” ●