Mga Pioneer sa Matag Yuta
Augusto Lim
Unang General Authority gikan sa Pilipinas
Nagsige og hunahuna si Augusto mahitungod sa pangutana sa iyang anak nga babaye.
Maanindot kadto nga kabuntagon sa Dominggo. Milingkod si Augusto sa iyang balkonahe aron sa pagtagamtam sa kahayag sa adlaw. Ang iyang anak nga babaye, si Mylene, misabak kaniya.
“Tay,” miingon siya, “nganong dili kita moadto sa simbahan sama sa akong mga higala?”
Dili sigurado si Augusto kon unsay itubag.
“Aw,” miingon siya sa katapusan, “ang imong mama ug ako miadto sa lain-laing mga simbahan sa wala pa kami magminyo. Apan pagkahuman mihunong kami. Hinoon, nagtuo gihapon kami sa Dios ug nagtuon sa Biblia.”
Mitando si Mylene. Apan nagsige og hunahuna si Augusto mahitungod sa iyang pangutana. Tingali gikinahanglan niyang dad-on ang iyang pamilya sa simbahan.
Nakahukom si Augusto nga mag-ampo. “Kon gusto nimo nga moserbisyo ko diha sa usa ka simbahan o mobuhat og bisan unsa alang kanimo, pahibaloa lang ko,” misulti siya sa Langitnong Amahan.
Pipila ka adlaw ang milabay, dihay nanuktok sa pultahan. Duha kini ka batan-ong lalaki nga nagsul-ob og puti nga mga polo ug dunay itom nga mga nametag. Miingon sila nga gikan sila sa Ang Simbahan ni Jesukristo sa mga Santos sa Ulahing mga Adlaw.
Dunay daghang mga pangutana si Augusto alang kanila. Sulod sa siyam ka bulan, naminaw siya kanila nga nagtudlo. Sa katapusan, mihukom siya nga magpabunyag. Misaad siya sa Dios nga kanunay niyang buhaton ang iyang labing maayo sa pagsunod ug pagtabang sa uban. Ang iyang asawa, si Myrna, nabunyagan paglabay sa usa ka bulan. Ug ang gamay nga si Mylene nalipay nga moadto sa simbahan!
Si Augusto ug ang iyang pamilya mitabang sa pagpalambo sa Simbahan. Mitabang sila sa pagtukod sa unang chapel sa Simbahan sa Pilipinas. Miserbisyo usab si Augusto isip presidente sa branch sa pipila ka higayon. Bisan tuod og lisod kini, nakahinumdom si Augusto sa saad nga iyang gihimo sa iyang bunyag nga mobuhat sa iyang labing maayo.
Ang katuigan milabay. Mitubo ang pamilya ni Augusto, ug ingon man usab ang Simbahan. Sa dihang na-organisar ang unang stake sa Pilipinas, si Augusto mao ang presidente sa stake. Midako si Mylene ug nagminyo sa templo. Mao usab sa ubang mga anak ni Augusto. Ang uban miserbisyo og mga misyon usab.
Sa katapusan, gitawag si Augusto nga mahimong usa ka presidente sa misyon sa Pilipinas. Gitabangan niya ang mga misyonaryo nga makabaton og hugot nga pagtuo ug magpaambit sa ebanghelyo, sama sa mga misyonaryo kinsa mitudlo kaniya.
Usa ka adlaw, nakadawat si Augusto og tawag sa telepono gikan sa propeta. Mihangyo siya ni Augusto nga moserbisyo isip usa ka General Authority. Nagpasabot kana nga si Augusto motudlo sa ubang mga lider sa Simbahan. Nagpasabot usab kini nga mohatag siya og pakigpulong sa kinatibuk-ang komperensya!
Sa dihang turno na niya nga mamulong, mibarog si Augusto ngadto sa pulpito. Miginhawa siya og lawom. Naghisgot siya mahitungod sa matinud-anong mga miyembro sa Pilipinas. Naghisgot siya mahitungod sa mga misyonaryo didto kinsa nagkugi og maayo. Ug mipaambit siya sa iyang pagpamatuod sa gugma sa Dios.
Samtang milingkod siya og balik, mibati og kalipay si Augusto. Nasayud siya nga ang Langitnong Amahan mitabang kaniya sa pagtuman sa saad nga iyang gihimo atol sa bunyag. Ug bisan unsa pay mahitabo, nasayud si Augusto nga huptan niya kana nga saad alang sa tibuok niyang kinabuhi.
Si Elder Augusto Lim kanhiay presidente sa Templo sa Manila Philippines.
Adunay duha ka templo sa Pilipinas, uban angplano alang sa lima pa.
Ang Pilipinas usa ka nasud sa mga isla sa Timog Silangang Asya.
Nagtrabaho siya isip usa ka abogado.
Siya ug ang iyang asawa, si Myrna, mao ang mga ginikanan sa walo ka anak.
Ang Pilipinas adunay mga 805,200 ka miyembro sa Simbahan.
Paghulagway ni Emily Lui