Minahal kong mga Higala,
Niining tuiga ang Dominggo sa Lukay anaa sa katapusang Dominggo sa Marso. Mao kana ang panahon nga kita magsaulog sa adlaw nga si Jesus mibiyahe ngadto sa Jerusalem sakay sa usa ka asno. Ang mga tawo miwara-wara og mga dahon sa lukay ug misinggit, “Hosanna!” Pipila ka adlaw ang milabay, si Jesus nag-antus ug namatay alang kanato. Dayon nabanhaw Siya! Nanghinaut kami nga malingaw kamo niining espesyal nga panahon sa paghinumdom unsay gihimo sa Langitnong Amahan ug ni Jesus alang kanato (tan-awa sa Juan 3:16). Tungod Kanila, kitang tanan mabuhi pag-usab!
Uban sa gugma,
Ang Higala
P.S. Pila ka pahina mahitungod ni Jesus ang inyong makit-an dinhi niini nga isyu?
Paghimo og Imong Kaugalingon
Nakat-onan nako giunsa ni Nephi paghimo og usa ka barko (Pebrero 2020), mao nga gusto kong maghimo og barko sa akong kaugalingon mismo aron makasabot kon unsay gibati ni Nephi. Sa sinugdanan lisud kini, apan akong nakat-onan nga dili mohunong ug mosalig sa Ginoo sama sa gibuhat ni Nephi.
Ian D., 9 anyos, Veracruz, Mexico
Diin Kami Magbasa sa Higala
Ganahan kami nga magbasa sa Higala! Nakatabang kini kanamo sa pagbati nga wala kaayo mag-inusara tungod kay kami lang ang mga miyembro sa Simbahan sa among siyudad. Gibasa namo kini sa German ug Dutch tungod kay ang among mama taga-Netherlands ug ang among papa taga-Germany.
Lars ug Torben S., 5 ug 3 anyos, Lower Saxony, Germany
Gusto Kami nga Makakita sa Templo
Nagpuyo kami duol sa Templo sa Barranquilla Colombia ug mobisita kami niini matag duha ka semana. Nakatabang kini kanamo sa paghinumdom sa mga pakigsaad nga among himoon uban sa Langitnong Amahan.
Primary sa Puerto Colombia Branch, Colombia