Gikan sa Unang Kapangulohan

Siya Nabanhaw!

Ni Presidente Henry B. Eyring

Ikaduhang Magtatambag sa Unang Kapangulohan

Gipahiangay gikan sa “Siya Nabanhaw,” Liahona, Abril 2013, 4–5.

Ang Pagkabanhaw ni Jesukristo naghatag kanato og paglaum. Nakahatag kini nako og paglaum panahon sa ting-init niadtong 1969 sa dihang namatay ang akong inahan. Naguol ko tungod kay temporaryo ko nga mahibulag gikan kaniya.

Apan nalipay ko dihang ang Espiritu Santo misulti kanako nga ang Pagkabanhaw tinuod. Akong mahulagway kon unsa ang kahimtang nga makita pag-usab ang akong inahan ug ang ubang minahal ugma damlag.

Si Jesukristo nabanhaw. Tungod Kaniya, tanang mga anak sa Langitnong Amahan nga natawo sa kalibutan mabanhaw sa lawas nga dili na gayud mamatay.

Pagkabanhaw: Sa dihang ang espiritu ni Jesus mibalik ngadto sa Iyang lawas human Siya namatay. Tungod ni Jesus, ang tanan kinsa namatay mabanhaw usab ugma damlag.

“Mopamatuod ko nga si Jesus mao ang nabanhaw nga Kristo, atong Manluluwas, ug atong hingpit nga ehemplo ug giya sa kinabuhing dayon.”

Presidente Henry B. Eyring

Ang Istorya kabahin sa Pasko sa Pagkabanhaw

Guntinga ang mga kard, ug ipapilit kini sa mas baga nga papel. Lungagi ug bugkusi og higot. Karon kamo adunay usa ka libro sa sugilanon sa Pasko sa Pagkabanhaw!

1. 

   Si Jesukristo misulod sa Jerusalem nga nagsakay sa asno. Mga katawhan midayeg Kaniya ug mipahimutang og mga lukay diha sa yuta. (Tan-awa sa Marcos 11:1–11.)

2. 

   Si Jesus mibisita sa templo. Siya miayo sa mga tawo nga bakol ug buta. (Tan-awa sa Mateo 21:12–14.)

3. 

   Ang nasina nga mga pari misuhol sa usa sa mga disipulo ni Jesukristo, si Hudas Iskariote, og 30 ka pilak nga sinsilyo aron sa pagtugyan Kaniya ngadto kanila. (Tan-awa sa Mateo 26: 14–16.)

4. 

   Si Jesus nakigpangaon uban sa iyang mga disipulo sa pagkaon sa Pagpalabay. Si Jesus mihatag kanila sa sakramento aron matabangan sila nga mahinumdom Kaniya. (Tan-awa sa Mateo 26:19–20, 26–28.)

5. 

   Si Jesus miadto sa Getsemani aron mag-ampo sa Langitnong Amahan. Didto Siya misugod sa pag-antus alang sa atong mga sala. Miabut ang mga tawo nga nanagdala og mga espada ug midakop Kaniya. (Tan-awa sa Mateo 26:36–50.)

6. 

   Si Jesus nag-antus ug namatay sa krus. Ang Iyang lawas gipahimutang sa lubnganan nga dunay dagkong bato sa atubangan sa pultahan. (Tan-awa sa Mateo 27: 27–35, 57–60.)

7. 

   Giligid sa mga anghel ang bato og layo. Gisultihan nila si Maria Magdelena ug ang ubang mga babaye nga si Jesus nabanhaw. Si Jesus mipakita ngadto sa mga babaye, ug sila misimba Kaniya. (Tan-awa sa Mateo 28:1–10.)

8. 

   Si Jesus mipakita sa Iyang mga disipulo. Gihikap nila ang Iyang nabanhaw nga lawas. Siya misulti kanila nga tudloan ang tanan sa Iyang ebanghelyo. Si Jesukristo mibangon pag-usab, busa kita usab! (Tan-awa sa Lucas 24:36–43; Mateo 28:16–20.)

Tan-awa sa Dali,Sunod Kanako alang sa Doktrina ug mga Pakigsaad 29 ug Pasko sa Pagkabanhaw.

Mga paghulagway ni Steliyana Doneva