Pagpangandam alang sa Pasko sa Pagkabanhaw
“Mosimba sa Amahan diha sa iyang ngalan, uban ang maputli nga mga kasingkasing ug limpyo nga mga kamot” (2 Nephi 25:16).
“Pagmata na, Lydia,” miingon si Mama. “Huwebes sa Pagpanglimpyo na karon!” Sa Russia, diin nagpuyo si Lydia, ang Huwebes sa Pagpanglimpyo mao ang usa ka espisyal nga adlaw aron sa pagpangandam sa Pasko sa Pagkabanhaw.
Miligid si Lydia ug mitan-aw sa bintana. Ngitngit pa sa gawas.
“Ma, kapoy kaayo ko,” miingon si Lydia. “Puwede nga matulog usa ko og taas-taas ug unya na motrabaho?”
Mipahiyom si mama ug milingkod sa higdaanan. “Adunay rason nga mobangon kita og sayo kaayo karon. Nahibalo ka ba unsa karon?”
Si Lydia naghunahuna og maayo, apan wala siya makahibalo.
“Kita maningkamot og maayo nga malimpyo ang atong balay karon aron pagpahinumdom kanato sa dihang si Jesus mihugas sa tiil sa Iyang mga disipulo. Siya mihigugma ug miserbisyo sa uban, ug kita gusto nga moserbisyo sama sa gibuhat ni Jesus sa atong panimalay. Karon ang adlaw sa paghinumdom ni Jesus!” Miingon si Mama.
Si Lydia gusto nga moserbisyo sama ni Jesus, mao nga siya mibangon sa higdaanan. Sa tibuok adlaw, mitrabaho siya og maayo. Iyang gilimpyohan ang salog, nanglaba, ug mitabang sa pagluto og pagkaon. Sa pagtapos sa adlaw, mibati siya nga mapasigarbuhon. Limpyo kaayo ang tanang butang.
Ang sunod adlaw mao ang Biyernes Santo. Si Lydia, si Mama ug si Papa naghimo og mga itlog sa Pasko sa Pagkabanhaw. Gilungagan nila og gamay ang kabhang ug unya gihuho ang pughak sa itlog. Gidrowingan nila og mga desinyo ang mga itlog ug gipahiran og pasinaw ang desinyo. Dayon ilang gituslob ang mga itlog sa hayag nga pula, tapol, ug berde nga tina. Nagustohan ni Lydia ang tanang nagliyok-liyok nga mga desinyo.
Sa dihang nauga na ang mga itlog, si Lydia nagbukhad og mga litrato sa iyang pamilya ug gibutangan og usa ang matag itlog. Karong Biyernes mao ang adlaw nga magkauban ug maghinumdom sa sakripisyo ni Jesus. Mao kini ang adlaw sa semana dihang namatay si Jesus. Ang mga itlog nagpahinumdom ni Lydia sa lubnganan diin gipahimutang si Jesus. Ang pamilya ni Lydia mibuhat sa ilang labing maayo aron sa paghinumdom Kaniya.
Sa Balaang Sabado, naghimo si Mama og kulich (pan sa Pasko sa Pagkabanhaw). Ang Paghimo og kulich mao ang usa ka importante nga mga tradisyon sa Pasko sa Pagkabanhaw sa Russia. Ang mga tawo kanunayng maningkamot nga may balaang pagtahud kon ang kulich giluto. Si Lydia naghunahuna mahitungod sa iyang pamilya, sa Pagkabanhaw ni Jesus, ug sa mga butang nga siya mapasalamaton. Mas sayon ra kadtong hunahunaon ang mahitungod sa espiritwal nga mga butang kon ang iyang balay limpyo kaayo ug malinawon.
Sa katapusan Dominggo na sa Pasko sa Pagkabanhaw! Naghinam-hinam kaayo si Lydia. Ang iyang mga ig-agaw miadto aron mobisita. Silang tanan nangaon sa lamiang mga pagkaon nga siya mitabang sa pagluto. Dihay mga pie, kulich, mga sausage, ug mga keso. Samtang nangaon sila, mipaambit sila sa ilang mga pagpamatuod ug naghisgut mahitungod sa mga butang nga sila mapasalamaton.
Human sa panihapon nagdula sila og espesyal nga mga dula. Ang matag tawo nagkupot og usa ka giadornohan nga itlog ug gipangka kini batok sa laing itlog. Kon si kinsang tawo nga unang mabuakan sa itlog mapildi sa dula. Ang mga bukton ni Lydia nangurog samtang giduot niya ang itlog batok sa iyang ig-agaw. “Sige, itlog!” misinggit siya. Ang itlog niya nga hayag nga tapol nabuak. Anaa didto sa nabuak nga tipaka ang litrato sa iyang pamilya.
Mipahiyom si Lydia samtang nagtan-aw sa litrato. Baliwala ra niya nga napildi siya sa dula. Usa ka mainiton, malipayon nga pagbati mipuno sa iyang kasingkasing. Siya nagkugi og maayo sa pag-andam alang niining Pasko sa Pagkabanhaw pinaagi sa pagtabang ug paghigugma sa iyang pamilya. Tungod sa Pagkabanhaw ni Kristo, silang tanan mabuhi pag-usab!
Mga paghulagway ni Sofia Cardoso