Usa ka Piano para kang Prophet
Kini nga istorya nahitabo didto sa Greater Accra, Ghana.
Usa ka batang lalaki nga ginganlan og Prophet adunay duha ka importante nga tumong.
“Ang musika maoy usa ka pinulongan nga masabtan sa tanan” (Songbook sa mga Bata, iii).
Si Prophet ganahan og musika. Ganahan siya ilabi na sa mga kanta sa Primary ug mga himno sa Simbahan. Gikanta-kanta niya ang mga tono sa tibuok adlaw. Gihunahuna niya ang iyang kaugalingon nga naglingkod sa usa ka piano, nga nagpatukar sa iyang paborito nga mga kanta. Gihunahuna usab niya ang iyang kaugalingon nga nagtudlo sa ubang mga tawo kon unsaon sa pagtukar.
Adunay usa lang ka problema. Wala siyay piano.
Usa ka adlaw adunay interbyu si Prophet uban sa iyang bishop.
“Nakahimo na ba ka og bisan unsa nga mga tumong alang sa programa sa Kabataan ug Kabatan-onan?” nangutana ang bishop.
“Oo,” miingon si Prophet. “Gusto ko nga makat-on sa pagtukar sa piano.”
“Maayo kana nga tumong,” miingon ang bishop.
“Ug kon makab-ot nako kana nga tumong,” miingon si Prophet, “ako adunay lain nga tumong dayon. Gusto nako nga motudlo sa laing 20 ka tawo kon unsaon sa pagtukar.”
“Aduna kay duha ka maayong tumong,” miingon ang bishop.
“Ug aduna koy problema,” miingon si Prophet. “Wala koy piano.”
“Aw, tan-awon nato unsay atong mabuhat.”
Sa simbahan pagkasunod Dominggo, ang bishop misulti ni Prophet nga nakakita siya og usa ka magtiayon nga misyonaryo kinsa makatudlo kaniya. Magdala sila og mga piano keyboard alang kaniya ug sa uban para sa pagbansay. Gusto silang motudlo sa daghang tawo kon unsaon sa pagtukar sa piano.
Ang bishop nakig-istorya sa mga tawo. Si Prophet nakig-istorya sa mga tawo. Ang pamilya ni Prophet nakig-istorya sa mga tawo. Sa wala madugay ang tibuok ward naghisgot mahitungod sa mga leksyon sa piano. Mao usab ang uban.
“Daghan sa akong mga higala kinsa dili mga miyembro gusto usab nga makat-on,” misulti si Prophet sa bishop.
“Welcome sila, siyempre,” miingon ang bishop. “Mohatag ang mga misyonaryo kanimo og usa ka libro ug motabang kanimo nga makat-on sa mga leksyon. Ug human nga makat-on ka, makatabang ka nila sa pagtudlo sa tanan.”
“Kana mao gayud ang akong ikaduhang tumong!” Miingon si Prophet.
Sa wala madugay nagbansay si Prophet uban sa mga misyonaryo. Ganahan siya sa pagkat-on unsa ang gipasabot sa matag nota ug makadungog niini nga naghiusa aron makahimo og usa ka kanta. Duha sa iyang mga higala sa simbahan, si Kelvin ug si Alexander, nagkat-on usab. Human sa usa ka bulan, ang tulo ka mga lalaki nagsugod na usab sa pagtudlo.
Kada adlaw, ang batang mga lalaki mitudlo og mga klase bahin sa keyboard diha sa gambalay sa Simbahan. Sa sinugdanan adunay mga 10 ka estudyante, dayon 20, dayon 50!
“Makalingaw kini.” Miingon si Kelvin usa ka adlaw paghuman sa klase.
“Nagtuo ako nga ang Langitnong Amahan malipayon tungod kay nagtabang kita sa uban nga makat-on,” miingon si Alexander.
Mitando si Prophet. Ang iyang tumong nagtabang na sa daghan kaayong tawo.
Apan adunay lain nga butang nga nakapalipay ni Prophet. Samtang ang ubang mga estudyante nagbansay og mga kanta sa Primary, nagkat-on usab sila mahitungod sa Langitnong Amahan. Pipila kanila mihangyo ni Prophet kon makakat-on sila og dugang mahitungod sa Simbahan.
Ug sa pagkatinuod, pipila sa mga tawo kinsa unang nakakat-on mahitungod sa Simbahan tungod sa mga leksyon sa piano nagpabunyag.
“Karon sa mga miting,” miingon si Prophet, “kaming tanan magkaubang moapil ug manganta sa mga kanta nga among gimahal.”
Mga paghulagway ni Violet Lemay