Kau Paionia ʻi he Fonua Kotoa Pē
ʻOkositō Limi
Fuofua Taki Mā‘olunga mei he ʻOtu Motu Filipainí
Naʻe fakakaukau maʻu pē ʻa ʻOkositō ki he fehuʻi ʻa hono ʻofefiné.
Ko ha pongipongi Sāpate fakaʻofoʻofa. Ne tangutu ʻa ‘Okositō ʻi hono falefakatoló ke fiefia ‘i he laʻaá. Naʻe kaka hake ki hono fungá ʻa hono ʻofefine, ko Mailiní.
“Tatay (Teti),” na‘á ne pehē, “ko e hā ʻoku ‘ikai ke tau ʻalu ai ki he lotú hangē ko hoku ngaahi kaungāme‘á?”
Naʻe ʻikai ke fakapapauʻi ʻe ʻOkositō ʻa e meʻa ke ne lea ʻakí.
Naʻe faifai peá ne pehē atu, “ne ma takitaha ʻalu ki ha lotu kehekehe mo hoʻo faʻē kimuʻa peá ma malí. Ka naʻe hili iá ne ʻikai ke ma toe ō. Ka, ʻokú ma kei tui pē ki he ʻOtuá mo ako ʻa e Tohi Tapú.”
Na‘e kamo pē ʻa Mailini. Ka na‘e kei fakakaukau pē a ‘Okositō fekauʻaki mo ʻene fehu‘í. Mahalo pē naʻá ne fie ma‘u ke ʻave hono fāmilí ki he lotú.
Naʻe fakakaukau ʻa ʻOkositō ke ne lotu. “Kapau ‘okú ke finangalo ke u ngāue ʻi ha siasi pe fai ha fa‘ahinga meʻa maʻau, toki fakahā mai pē ke u ʻiloʻi,” na‘á ne talaange ki he Tamai Hēvaní.
Hili ha ngaahi ‘aho siʻi mei ai, na‘e tukituki mai ha taha he matapaá. Ko ha ongo talavou ne na sote hina mo hona pine hingoa lanu ‘uliʻuli. Naʻá na pehē ko ha ongo faifekau kinaua mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Ne lahi ha ngaahi fehuʻi ʻa ʻOkositō maʻanaua. ‘I ha māhina ʻe hiva, na‘á ne fakafanongo ki heʻena akoʻí. Ne faifai peá ne fili ke papitaiso. Na‘á ne palōmesi ki he ʻOtuá te ne fakahoko ma‘u pē hono lelei tahá ke talangofua mo tokoni ki he niʻihi kehé. Ne papitaiso mo hono uaifí, ʻa Maienā, hili ha māhina ‘e taha mei ai. Pea naʻe fiefia ʻa kiʻi Mailini ke ʻalu ki he lotú!
Ne tokoniʻi ‘e ʻOkositō mo hono fāmilí ke tupulaki ʻa e Siasí. Na‘a nau tokoni ki hono langa ʻo e fuofua falelotu ʻo e Siasí ‘i he ʻOtu Motu Filipainí. Ne tuʻo lahi foki e hoko ʻa ʻOkositō ko ha palesiteni fakakolo. Neongo na‘e faingataʻa, ka naʻe manatuʻi ʻe ʻOkositō e palōmesi naʻá ne fakahoko ‘i hono papitaisó ke ne fakahoko hono lelei tahá.
Ne ʻosi mei ai ha ngaahi taʻu. Naʻe tupulaki ʻa e fāmili ʻo ʻOkositoó, pea pehē foki ki he Siasí. ‘I he taimi naʻe fokotu‘u ai e fuofua siteiki ʻi he ‘Otu Motu Filipainí, ne hoko ʻa ʻOkositō ko e palesiteni fakasiteikí. Naʻe tupu hake ʻa Mailini peá ne mali ‘i he temipalé. Na‘e pehē mo e fānau kehe ʻa ‘Okositoó. Ne ngāue fakafaifekau foki mo ha niʻihi.
Naʻe faifai pē, ne ui ʻa ʻOkositō ke hoko ko ha palesiteni fakamisiona ʻi he ‘Otu Motu Filipainí. Na‘á ne tokoniʻi ‘a e kau faifekaú ke nau maʻu ʻa e tuí mo vahevahe ‘a e ongoongoleleí, ʻo hangē pē ko e ongo faifekau ne na ako‘i iá.
‘I ha ʻaho ‘e taha, naʻe maʻu ʻe ʻOkositō ha telefoni mei he palōfitá. Na‘á ne kole ange kia ‘Okositō ke hoko ko ha Taki Māʻolunga. Naʻe ʻuhinga ia ʻe pau ke akoʻi ‘e ʻOkositō ʻa e kau taki kehe ʻi he Siasí. Na‘e ʻuhinga foki ia ʻe pau ke ne fai ha lea ‘i he konifelenisi lahí!
‘I he hoko hono taimi ke leá, ne kaka hake ʻa ʻOkositō ki he tuʻunga malangá. Naʻá ne fakamanava loloa. Na‘á ne lea fekauʻaki mo e kāingalotu faivelenga ‘i he ʻOtu Motu Filipainí. Na‘á ne lea fekauʻaki mo e kau faifekau ‘i ai ne nau ngāue mālohi ʻaupitó. Pea na‘á ne vahevahe ʻene fakamo‘oni ki he ʻofa ‘a e ʻOtuá.
ʻI heʻene tangutu ki laló, ne ongoʻi fiefia ʻa ʻOkositō. Na‘á ne ʻilo‘i kuo tokoni‘i ia ʻe he Tamai Hēvaní ke ne tauhi ʻa e palōmesi na‘á ne fakahoko ʻi heʻene papitaisó. Pea tatau ai pē pe ko e hā e meʻa ne hokó, na‘e ʻilo ‘e ʻOkositō te ne tauhi ‘a e palōmesi ko iá ‘i he toenga ʻo ‘ene moʻuí.
Naʻe palesiteni ʻa ‘Eletā ʻOkositō Limi ʻi he Temipale Manila Philippines.
‘Oku ʻi ai ha temipale ʻe ua ʻi he ʻOtu Motu Filipainí, mo e ngaahi palani ki he nima kehe.
Ko e ʻOtu Motu Filipainí, ko ha fonua ‘o e ʻotu motu ʻi ‘Ēsia Tonga-hahake.
Naʻá ne ngāue ko ha loea.
ʻOkú ne hoko mo hono uaifi, ko Maienā, ko ha mātuʻa ki ha fānau ʻe toko valu.
‘Oku ʻi ai ha kāingalotu ʻe toko 805,200 nai ‘o e Siasí ʻi he ‘Otu Motu Filipainí.
Tā fakatātaaʻi ʻe Emily Lui