Naʻe Tohi ʻe Koe
Loto-to‘a ʻi he Kuaeá
Fai ‘e Scarlett H., taʻu 9, ʻOkisifootisaia, ‘Ingilani
‘I heʻeku kei ʻi he kalasi uá, ne u ʻalu ʻi he taimi kai hoʻataá mo hoku ngaahi kaungāmeʻá ki he kuaea ʻi he Tuʻapulelulu kotoa pē. Ne mau hiva‘i ha ngaahi hiva, ʻo fakahoko ia ʻi he ngaahi ʻasemipilií, pea ne mau fiefia ʻaupito.
‘I ha ʻaho ʻe taha ne mau kamata ako ha foʻi hiva fo‘ou. ‘I he taimi naʻá ku fanongo ai ki aí, ne u fanongo ki he tākuanoa ʻaki e huafa ʻo e Tamai Hēvaní. Naʻe fakatupu loto-mamahi kiate au.
ʻI he tuku ‘a e akó ne u talaange ki he‘eku faʻeé fekauʻaki mo ia. Na‘á ku talaange ki ai ko e foʻi hivá na‘e tākuanoa ai ʻa e huafa ʻo e Tamai Hēvaní. Na‘á ne pehē ʻe lava ke u kole ki he kau faiakó pe ʻe lava ke u puʻaki ha meʻa kehe. Ne u ʻilo‘i ko e meʻa ia naʻe totonu ke u fakahokó, ka naʻá ku manavasiʻi ‘aupito.
ʻI ha Tuʻapulelulu ʻe taha ne u fakapapauʻi ‘i hoku ʻatamaí ke u ʻahiʻahi pē. Na‘á ku talaange ki heʻeku faiakó ʻa e ongo ne u maʻú mo e mahuʻinga makehe ʻa e huafa ʻo e ʻOtuá kiate aú. Ne u kole ange kiate ia pe ʻe lava ke u puʻaki ha meʻa ʻe taha. Na‘e talamai kiate au ʻe he kau faiakó ‘e lava ke u puʻaki ha ngaahi lea kehe. Na‘á ku ongoʻi fiemālie lahi ange, pea ne u ʻilo‘i naʻe tokoni‘i au ʻe he Tamai Hēvaní.
Hili ha ngaahi uike si‘i mei ai, ne talamai he kau faiakó ʻe hiva kotoa ʻa e kuaeá ʻi ha ngaahi lea kehe ʻi he foʻi konga ko ia ʻo e foʻi hivá. ‘I he ʻasemipilī, ne u tu‘u hangatonu ʻi he‘eku hivá. Na‘á ku fiefia ʻi he lava ke u tokoniʻi hoku ngaahi kaungāmeʻá mo ‘eku kuaeá ke ʻikai tākuanoa ʻaki e huafa ‘o e Tamai Hēvaní.
Tā fakatātaaʻi ʻe Colleen Madden