Mei he Kau Palesitenisī ʻUluakí

Kuó Ne Toe Tuʻu!

Fai ʻe Palesiteni Henry B. Eyring

Tokoni Ua ʻi he Kau Palesitenisī ʻUluakí

To‘o mei he “Kuó Ne Toe Tuʻu,” Ensign pe Liahona, ‘Epeleli 2013, 4–5.

‘Oku ʻomai ʻe he Toetu‘u ʻo Sīsū Kalaisí ‘a e ʻamanaki leleí. Naʻá ne ʻomi kiate au ʻa e ʻamanaki leleí ʻi he mālōlō ʻeku faʻeé, ʻi ha ʻaho ʻo e faʻahitaʻu māfaná ʻi Sune ʻo e 1969 . Naʻá ku loto-mamahi koe‘uhi he ne u māvae fakataimi meiate ia.

Ka na‘á ku ongoʻi fiefia ‘i hono talamai ‘e he Laumālie Māʻoni‘oní kiate au ʻoku mo‘oni ʻa e Toetu‘ú. ‘Oku ou lava ke sioloto atu pē ʻe fēfē ha‘aku toe feʻiloaki mo ʻeku faʻeé mo e ngaahi ʻofaʻanga kehé ʻi ha ʻaho.

Naʻe toetuʻu ʻa Sīsū Kalaisi. Koe‘uhi ko Ia, ʻe toetuʻu ʻa e fānau kotoa ʻa e Tamai Hēvaní kuo fāʻeleʻi ki he māmaní ʻi ha sino he ʻikai toe mate.

Toetu‘u: Ko e taimi ne toe foki mai ai ʻa e laumālie ‘o Sīsuú ki Hono sinó hili ʻEne pekiá. Koe‘uhi ko Sīsū, ko e tokotaha kotoa pē kuo pekia te nau toetu‘u foki mo kinautolu ʻi ha ‘aho.

ʻOku ou fakamoʻoni ko Sīsū ʻa e Kalaisi kuo toe tuʻú, ko hotau Fakamoʻui, mo hotau faʻifaʻitakiʻanga haohaoa pea mo e tataki ki he moʻui taʻengatá.

Palesiteni Henry B. Eyring

Ko e Talanoa ʻo e Toetuʻú

Kosi ‘o toʻo ʻa e ‘ū kātí pea fakapipiki kinautolu ki ha laʻipepa. Fakaavaava ʻa e ngaahi avá pea nono‘o fakataha ʻaki ha afo. Kuó ke maʻu he taimí ni ha tohi talanoa ʻo e Toetuʻú!

1. 

   Naʻe hāʻele atu ‘a Sīsū Kalaisi ki he kolo ko Selusalemá ʻi ha ‘asi. Naʻe fakahikihiki‘i ia ʻe he kakaí mo fola ha ngaahi lauʻi paame ʻi he kelekelé. (Vakai, Maʻake 11:1–11.)

2. 

   Naʻe ʻaʻahi ʻa Sīsū ki he temipalé. Naʻá Ne fakamoʻui ʻa e kakai naʻe kuí mo e pipikí. (Vakai, Mātiu 21:12–14.)

3. 

   Naʻe totongi ʻe he kau taula‘eiki loto-meheká ʻa e taha ʻo e kau ākonga ‘a Sīsū Kalaisí, Siutasi ʻIsikaliote, ʻaki ha koini siliva ʻe 30 ke ne ʻoange Ia kiate kinautolu. (Vakai, Mātiu 26:14–16.)

4. 

   Na‘e taumafa ʻa Sīsū ʻi he maʻu me‘atokoni ʻo e Laka Atú fakataha mo ‘Ene kau ākongá. Naʻá Ne ʻoatu kiate kinautolu ʻa e sākalamēnití ke tokoniʻi kinautolu ke nau manatuʻi Ia. (Vakai, Mātiu 26:19–20, 26–28.)

5. 

   Na‘e hāʻele ‘a Sīsū ki Ketisemani ke lotu ki he Tamai Hēvaní. Naʻe kamata ai ke Ne mamahi koeʻuhi ko ‘etau ngaahi angahalá. Naʻe ō atu ha kakai mo ha ngaahi heletā ‘o nau puke pōpula Ia. (Vakai, Mātiu 26:36–50.)

6. 

   Na‘e mamahi ʻa Sīsū pea pekia ‘i he kolosí. Na‘e fakatokoto hono sinó ʻi ha fonualoto mo ha maka lahi ʻi mu‘a he matapaá. (Vakai, Mātiu 27:27–35, 57–60.)

7. 

   Ne teka‘i ʻa e maká ‘e ha ongo ʻāngelo. Na‘á na fakahā kia Mele Makitaline mo ha kau fafine kehe naʻe toetu‘u ʻa Sīsū. Na‘e hā ʻa Sīsū ki he kau fafiné, pea na‘a nau hū kiate Ia. (Vakai, Mātiu 28:1–10.)

8. 

   Na‘e hā ʻa Sīsū ki He‘ene kau ākongá. Na‘a nau ala ki hono sino toetuʻú. Na‘á Ne folofola ange ke akoʻi ʻEne ongoongoleleí ki he tokotaha kotoa pē. Naʻe toe tuʻu ʻa Sīsū Kalaisi, ko ia te tau pehē mo kitautolu foki! (Vakai, Luke 24:36–43; Mātiu 28:16–20.)

Vakai Haʻu, ʻo Muimui ʻIate Au Maʻá e Tokāteline mo e Ngaahi Fuakava 29 mo e Toetuʻú.

Ngaahi tā fakatātā ‘a Siteliana Toneva