Ko e ʻEveʻeva Pē ʻi Tu‘á
“Kuó ke ‘i he tepiletí (tablet) he taimi kotoa ko ʻení?
Na‘e lele laine taha hake ha fanga kiʻi lō fakaʻilekitulōnika ‘i he screen ʻo e tepileti ‘a Lailií. Naʻe malimali ʻa Lailī peá ne kamata ke lau fakavave kinautolu. Fitu, valu, hiva … Naʻe hoko ʻeni ko e taha ‘o ʻene ngaahi keimi fika naʻe saiʻia taha aí!
“Ne u pehē na‘á ke valivali ho‘o tohi ʻinisēkité,” naʻe talaange ‘e Mami ‘i heʻene hū atu ki he lokí.
Naʻe sio hake ʻa Lailī. “ʻOi. ʻIo, ne u valivali. Ka na‘á ku ta‘eoliʻia, ko ia na‘á ku vaʻinga keimi leva.”
“Kuó ke vaʻinga ‘i he tepiletí he taimi kotoa ko ʻení?” Ne ʻeke ange ʻe Mami mo ne kiʻi malimali.
Ne kiʻi sio ʻa Lailī ki he uasí. Naʻe fuʻu fuoloa ange ʻa e taimi kuo ʻosí ʻi he taimi naʻá ne fakakaukau ki aí! “ʻOku mahalo pē. Ka ‘oku tokoni ia ke u ako ʻa e fiká.”
“ʻOku sai pē ʻa e fiká ki ho ʻatamaí,” naʻe talaange ʻe Mami. “Ka ʻoku ʻikai sai ki ho ʻatamaí ʻa e fuʻu taimi lahi ʻi he screen. Pe ki he toenga ho sinó. ‘Oku fie maʻu ho sinó ha lahi ʻo e ngaahi me‘a kehe.”
Na‘e kiʻi taʻofi fakataimi ʻa Lailī. “‘Okú ke ʻuhinga ki he me‘akai leleí?”
Naʻe kamo atu ʻa Mami. “ʻIo! Ka ko e kamatá pē ia. ʻOku hā kapau te tau ō ʻo luelue? Mahalo te ke lava ai pē ‘o sio ki ha fanga lō moʻoni.”
“OK!” Naʻe tui ʻe Lailī hono suú. Naʻe tali atu ʻa Mami mo e kiʻi tehina ʻo Lailií, ko Haapa, ʻi he veʻe matapaá.
“ʻOkú ke maau ki ha ʻeveʻeva?” Naʻe fehuʻi ange ʻe Mami.
“ʻIo!”
Na‘a nau luelue atu ki he paʻake ofi maí. Na‘e maamangia ʻa e la‘aá, pea longolongoaʻa ʻa e ngaahi la‘iʻakau ʻi he ‘ulu ʻakaú ʻi hono puhi he havilí. “Hei, sio!” Na‘e tuhu ʻa Lailī ki ha laine ‘o e fanga loó ne nau laka hake ‘i he veʻe halá. “Naʻá ke moʻoni pē, Mami.”
“Ko e toko fiha ‘okú ke sio ki aí?” Naʻe fehuʻi ange ʻe Mami.
Na‘e feinga ʻa Lailī ke ne lau, ka naʻe fu‘u tokolahi. Na‘á ne lele muʻa pea to‘o hake ha foʻi maka ʻileʻila. “ʻOku hangē ha fonu ʻutá (ladybug). Sio ki he fanga kiʻi toti kotoa pē!”
Na‘á ne faʻo ʻa e maká ki hono kató. “Ta ‘ai pē ke pehē ko ha ongo saienisi kitaua,” na‘á ne pehē ange kia Haapa. “Te ta lava ʻo fevahevaheʻaki ʻeta ngaahi ‘iló!”
Ne na ma‘u fakataha mo Haapa ha foʻi maka fakaʻofo‘ofa ʻe taha, ha fo‘i kouni paini, mo ha tengaʻi ‘oke. Na‘a nau sio foki ki ha fanga kiʻi pepe.
“ʻOku fakafiefia ange ʻeni ia ʻi heʻeku keimí!” Na‘e pehē ʻe Lailī.
“Hono ʻikai ke sai ke tau ʻi tuʻa?” Naʻe fehuʻi ange ʻe Mami. “Pea ‘okú ke ʻilo‘i ʻa e konga lelei tahá? ‘Oku lelei ʻaupito ia ki ho ‘atamaí.”
Naʻe hanga hake e ʻulu ʻo Lailií. “Ka na‘á ku pehē ʻe au ʻoku pau ke te ako ‘a e ngaahi meʻa ke mālohi ange ai hoto ʻatamaí.”
“Ko e founga ia ‘e taha. Ka ‘oku tokoni foki mo e ngaahi meʻa kehé ke tupulaki ai. Hangē ko hono ‘akaʻaka e foʻi pulu soká mo hotau fāmilí. Pe ko e talanoa mo e ngaahi kaungāme‘á. Pe ko e fakamoleki ha taimi ‘i tuʻa, hangē ko e taimi ní. ‘Oku fie maʻu ke tau tupulaki mo fakalakalaka ‘i he ngaahi founga kehekehe, ‘o hangē ko Sīsuú.”
Ne vave ʻaupito e ʻalu ʻa e taimí ʻi he fakatotolo ʻe Lailī, Mami, mo Haapa ʻa e paʻaké. ‘I he taimi ne nau a‘u ai ki ʻapí, na‘e fonu ʻa e ongo kato ʻo Lailií ʻi he ngaahi koloa mei he‘enau luelué. Naʻá ne fokotuʻutuʻu laine kinautolu ʻi he falikí ke ne lau kinautolu. . Fitu, valu, hiva …
Naʻá ne malimali leva. Na‘á ne fiefia naʻe ‘i ai ha ngaahi founga lahi mo fakafiefia ke tupulaki ai mo tokangaʻi lelei ʻaki hono sinó.
Ngaahi tā fakatātā ʻa Tammy Lyon