Ko e Teuteu ki he Toetuʻú
“Lotu ki he Tamaí ‘i hono huafa, ʻi he loto-ma‘a mo e nima maʻa” (2 Nīfai 25:16).
“Lītia, ‘ā hake,” Naʻe talaange ʻe Mama. “Ko e Tuʻapulelulu Ma‘á eni!” ‘I Lūsia ʻi he feituʻu ne nofo ai ‘a Lītiá, ko e Tu‘apulelulu Maʻá ko ha ‘aho makehe ia ke teuteu ki he Toetuʻú.
Na‘e teka hake ‘a Lītia ʻo sio atu ki tuʻa ʻi hono matapā sioʻatá. Ne kei fakapoʻuli pē ʻa tuʻa.
Naʻe talaange ʻe Lītia, “Mama, ʻoku ou fu‘u helaʻia. ‘E lava ke u kiʻi mohe ʻo fuoloa ange pea toki ngāue ʻanai?”
Ne malimali ange ʻene faʻeé mo tangutu hifo he funga mohengá. “‘Oku ʻi ai e ‘uhinga ʻoku tau ʻā pongipongia ʻaupito ai he ‘aho ní. ʻOkú ke ʻilo pē ko e hā ia?”
Naʻe fakakaukau lahi ʻa Lītia, ka naʻe ‘ikai ke ne ʻilo.
“ʻOku tau ngāue mālohi ke ngaohi hotau ‘apí ke maʻa he ‘ahó ni ke ne fakamanatu mai kiate kitautolu ʻa e taimi na‘e fufulu ai ʻe Sīsū ‘a e vaʻe ‘o ʻEne kau ākongá. Na‘á Ne ʻofa mo tokoni‘i e niʻihi kehé, pea ‘oku tau fie tokoni ‘i hotau ʻapí ʻo hangē ko ia na‘e fakahoko ʻe Sīsuú. Ko e ‘aho ní ko e ʻaho ia ke manatuʻi ai ʻa Sīsū!” Ko ʻene faʻeé ange ia.
Na‘e fie tokoni ʻa Lītia ‘o hangē ko Sīsuú, ko ia na‘á ne tuʻu fakavave ki ʻolunga mei he mohengá. ‘I he toenga ʻo e ‘ahó, naʻá ne ngāue mālohi. Na‘á ne fakamaʻa ʻa e falikí, fō e ʻū valá, mo tokoni ke kuki ʻa e me‘akaí. ‘I he fakaʻosinga ‘o e ʻahó, na‘á ne ongoʻi fiefia. Ne maʻa ʻaupito e meʻa kotoa pē.
ʻI he ʻaho hono hokó naʻe Falaite Lelei. Ne ngaohi ʻe Lītia mo ʻene ongomātuʻá ha ngaahi foʻi fua‘imoa Toetuʻu. Ne nau hokaʻi ha fanga ki‘i ava ʻi he nge‘esí pea tukuange ʻa e ʻioke kotoa pē ki tuʻa. Ne nau tā ha ngaahi sīpinga ‘i he ngaahi foʻi fuaʻimoá pea vali e sīpinga takitaha ʻaki e teʻelangó (wax). Hili ia pea nau unu e ngaahi fua‘imoá ʻi ha meʻa fakalanu lanu kulokula maama, vāleti, mo e lanu mata. Na‘e saiʻia ʻaupito ‘a Lītia he fōtunga fakaʻofoʻofa ʻo e ʻū sīpinga vilovilo kotoa pē.
ʻI he taimi naʻe mōmoa ai e ngaahi foʻi fuaʻimoá, ne takai‘i ʻe Lītia ha ʻū laʻitā iiki ʻo hono fāmilí pea faʻo ʻa e laʻitā ʻe taha ʻi he fuaʻimoa takitaha. Ko e Falaite ko ‘ení, ko ha ʻaho ia ke feohi fakataha ai mo manatu‘i ʻa e feilaulau ‘a Sīsuú. Ko e ‘aho ia ʻo e uiké naʻe pekia ai ‘a Sīsuú. Na‘e fakamanatu ange ʻe he ngaahi foʻi fuaʻimoá kia Lītia ʻa e faʻitoka na‘e tokoto ai ʻa Sīsuú. Na‘e fakahoko ʻe he fāmili ‘o Lītiá honau lelei tahá ke manatuʻi Ia.
ʻI he Tokonaki Tapú, na‘e ngaohi ʻe he fineʻeikí ʻa e kulich (mā Toetuʻu). Ko ha tukufakaholo mahuʻinga ia ʻo e Toetuʻú ʻi Lūsia ʻa e ngaohi ʻo e kulich. Na‘e feinga maʻu pē ‘a e kakaí ke nau ʻapasia ‘i he taimi naʻe ta‘o ai ʻa e kulich. Na‘e fakakaukau ʻa Lītia ki hono fāmilí, toetuʻu ʻa Sīsuú, pea mo e ngaahi meʻa naʻá ne houngaʻia aí. Na‘e faingofua ange ke ne fakakaukau ki he ngaahi meʻa fakalaumālié ‘i he taimi ne maʻa mo nonga ʻaupito ai hono falé.
Na‘e faifai pea Sāpate Toetuʻu! Ne fiefia ʻaupito ʻa Lītia. Ne ʻaʻahi atu hono kāingá. Na‘a nau kai fakataha e meʻakai ifo naʻá ne tokoni ke ngaohí. Na‘e ʻi ai ha ngaahi foʻi pai, kulich, sōsisi, mo e siisi. ‘I heʻenau kaí, ne nau vahevahe ʻenau ngaahi fakamo‘oní mo talanoa ki he ngaahi meʻa ne nau houngaʻia aí.
Hili e maʻu meʻatokoni efiafí ne nau fakahoko ha vaʻinga makehe. Ne toʻo ʻe he tokotaha takitaha ha foʻi fuaʻimoa kuo ʻosi teuteuʻi pea tātāʻi ia ʻi ha foʻi fuaʻimoa ʻe taha. Ko e tokotaha ko ia ne ʻuluaki mafahi ʻene fuaʻimoá ne foʻi ia he vaʻingá. Ne tete ʻa e nima ʻo Lītiá ʻi heʻene lolomi ʻaki ʻene foʻi fuaʻimoá ʻa e fuaʻimoa hono kāsiní. Naʻá ne kaila, “ʻAi ā foki fua‘imoa!” Ne mafahi kongokonga ʻene foʻi fuaʻimoa lanu vāleti māmá. Na‘e ‘i he ngaahi ngeʻesi fuaʻimoa mafahifahí ha laʻitā ʻo hono fāmilí.
Na‘e malimali ʻa Lītia ʻi he‘ene sio ki he laʻitaá. Na‘e ʻikai ke ne tokanga ki heʻene foʻi ‘i he vaʻingá. Na‘e fakafonu ʻe ha ongo‘i māfana, mo fiefia ʻa hono lotó. Kuó ne ngāue mālohi ke teuteu ki he Toetuʻu ko ‘ení ʻaki ʻene tokoni mo e ‘ofa ki hono famili. Koe‘uhi ko e Toetuʻu ‘a Kalaisí, te nau lava ke toe moʻui kotoa!
Ngaahi tā fakatātā ‘a Sofia Cardoso