Ko ha Kalauni Faiʻaho
ʻOku nofo ʻa e tokotaha naʻá ne faʻú ʻi Kololato, USA.
“Ko au ʻeni ʻi ʻapi!” Ko e ui atu ia ʻa Tetí. Naʻe vave ʻene ʻi apí ko e faiʻaho ʻo Uaietí. ʻOku hoko e taʻu nima ʻo Uaietí he ʻahó ni!
Na‘e lele atu ʻa Uaieti kiate ia. Naʻe fāʻofua atu ki ai ʻene Tetí. Naʻe pehē ange ʻa Teti, “ʻI he ʻosi ʻa e maʻu meʻatokoni hoʻataá, te ta ō ki he pāká.”
“Ko kitaua pē?” Ko e fehuʻi ange ia ʻa Uaietí. Naʻá ne ʻofa heʻene faʻeé mo hono kiʻi tuofefine ko Maliá, ka ko e taimi ʻe niʻihi naʻá ne fie fakahoko ha ngaahi meʻa mo Teti pē.
Naʻe pehē ange ʻe Teti, “Ko kitaua pē.”
Naʻe ngaohi ʻe Mami ha meʻatokoni hoʻatā mo e ngaahi meʻa kotoa ʻoku manako ai ʻa Uaietí. Naʻá ne ngaohi foki mo ha kalauni mei ha pepa lanu koula mo e meʻa ngingila.
Naʻe ulo e mata ʻo Uaietí mo ne ʻeke ange, “Ko e ʻai ia maʻaku?”
Naʻe tali ange ʻe Mami, “ʻIo.”
Ko ha faiʻaho makehe ia!
Naʻe tui ʻe Uaieti ʻa e kalauní ki he pāká. Naʻe toutou homo mei hono ʻulú, ka naʻe ʻikai tokanga ia ki ai. Na‘á ne fehuʻi ange, “Teti, ʻoku hanga nai ʻe hoku kalauni faiʻahó ʻo ʻai au ke u makehe?”
Naʻe malimali pē ʻa Teti. “ʻOku fakafiefia ʻa e kalauni faiʻahó, ka ʻoku ʻikai ko e meʻa ia ʻokú ne ʻai ke ke makehé. ʻOkú ke makehe koeʻuhí ko e foha koe ʻa e ʻOtuá! Pea ʻoku pehē pē mo e taha kotoa. ʻOku ʻuhinga ia ʻoku makehe foki mo e taha kotoa.”
Naʻe vaʻinga ʻa Teti mo Uaieti ʻi he malaʻe vaʻingá. Na‘e fakapaheke hifo ‘a Uaieti he meʻa fakapaheké.
“ʻOkú ke pehē te u lava mo au ʻo fakapaheke hifo?” Ko e fehuʻi ange ia ʻa Tetí.
Na‘e makiʻiki‘i ʻa Uaieti. “ʻOkú ke fuʻu lahi koe.”
Naʻe kaka hake ʻa Uaieti ʻi he tuʻungá ke toe fakapaheke hifo. Naʻe ʻi muʻa ʻiate ia ha kiʻi taʻahine. Naʻá ne manavasiʻi ke fakapaheke hifo. Naʻe fakakaukau ʻa Uaieti ki he founga naʻe makehe ai ʻa e tokotaha kotoa pē ki he Tamai Hēvaní.
Naʻá ne pehē ange, “Te ke lava pē ʻo fakahoko ia!”
Naʻá ne fakapaheke hifo. Pea pehē pē foki mo Uaieti.
“Fakaʻofoʻofa ia!” Ko e lea atu ia ʻa Uaietí. Naʻá ne malimali mai kiate ia pea naʻá ne malimali ange foki.
Ko e anga‘ofá ʻokú ne ʻai ʻa Uaieti ke fiefia! Naʻá ne ʻiloʻi ʻoku makehe ʻa e tokotaha kotoa pē, ʻo tatau ai pē pe naʻe ʻi ai hanau kalauni faiʻaho pe ʻikai.