Tohi ʻe Koe
Ko ʻEku Fuofua ʻAukaí
Fakahoko ʻe ʻĀlisi A., ta‘u 9, ʻInitiana, USA
Naʻá ku mamata mo hoku fāmilí kia Palesiteni Nalesoni ʻi heʻene lea ʻi he TV ʻaki ha meʻa naʻá ne tohoakiʻi ʻeku tokangá. Naʻá ne pehē ʻe ʻi ai ha ʻaukai fakaemāmani lahi!
Ne u fie ʻaukai, ka ne teʻeki ai ke u fakahoko ia kimuʻa. Ne toki kamata e mahaki fakaʻauha COVID-19, pea naʻa mau nofo maʻu pē ʻi ʻapi. Naʻá ku ʻilo kuo pau ke u fakahoko ʻeku tafaʻakí. Naʻe ʻikai lava ʻeku faʻeé ʻo ʻaukai he naʻá ne fāʻeleʻi ha pēpē ʻi he ngaahi māhina siʻi kuo hilí. Naʻe fuʻu kei siʻi hoku kiʻi tehiná mo hoku ngaahi tuongaʻané ke ʻaukai. ʻOku mahino ko au pē mo ʻeku tamaí.
Naʻá ku loto pē ke u ʻaukai he houa kai pongipongí pē koeʻuhí ko e fuofua taimi ʻeni ke u ʻaukai aí, pea naʻe ʻikai te u ʻiloʻi pe ko e hā e loloa te u lavaʻí. Ne u maʻu ha meʻatokoni lelei he pō Tokonakí, hili iá ne fai ʻe hoku fāmilí ha lotu maʻaku mo ʻeku tamaí ke kamata ʻema ʻaukaí.
ʻI he ʻaho hono hokó naʻa mau lotu pē ʻi ʻapi, ʻa ia ko e meʻa ia naʻa mau fakahoko talu mei he kamata ʻa e mahaki fakaʻauhá. Naʻá ku feinga ke tohoakiʻi ʻeku tokangá mei he foʻi moʻoni ko ia naʻe maʻu meʻatokoni hoku tehiná pea naʻá ku fuʻu fiekaia ʻaupito. ʻI he tuku ʻa e lotú, naʻá ku tā ha ngaahi himi ʻi he pianó. Kimui angé ne u vakai ki he uasí, pea naʻe ofi ʻaupito ki he kai hoʻataá! Na‘e ʻikai ke u ʻilo ʻe vave pehē ʻa e ʻalu ʻa e taimí. Naʻe ngalo ʻaupito ʻiate au ʻoku ou ʻaukai!
Ne u fakakaukau ke fai ha lotu ke vete ʻaki ʻeku ʻaukaí. Lolotonga ʻeku lotú, naʻá ku ongoʻi e Laumālié ʻo mālohi ange ʻi ha toe taimi kimuʻa. Naʻá ku ongoʻi ʻe lelei ʻa e meʻa kotoa. Ko ha aʻusia fakaʻofoʻofa ia.
Talu mei he ʻuluaki ʻaukai ko iá mo ʻeku fai ʻa e ʻaukai kotoa pē naʻe kole mai ʻe he palōfitá ke tau fakahokó, pea talu mei ai mo ʻeku ongoʻi mālohi maʻu pē ʻa e Laumālié.