Ko Hono Langa ʻe he Kau Māʻoniʻoní ha ʻApi Foʻou

Hili hono fakafoki mai ʻo e Siasí, naʻe toe tokolahi ange e kakai ne ako ki he ongoongoleleí. Naʻa nau fili ke papitaiso. Naʻe ui kinautolu ko e “Kau Māʻoniʻoni.”

Naʻe hiki hanau niʻihi koeʻuhí ke nau lava ʻo nofo ofi ki he kāingalotu ʻe niʻihi ʻo e Siasí. Naʻe fetokoniʻaki mo fefakamālohiaʻaki e Kau Māʻoniʻoní.

Naʻe ʻi ai mo ha kakai naʻe ʻikai ke nau saiʻia ʻi he Siasí. Naʻa nau feinga ke fakamamahiʻi e Kau Māʻoniʻoní. Naʻa nau fakamālohiʻi kinautolu ke nau mavahe mei honau ngaahi ʻapí.

Naʻe maʻu ʻe he Kau Māʻoniʻoní ʻa e tui ʻe tokoniʻi kinautolu ʻe he ʻOtuá. Neongo naʻe faingataʻa, ka naʻa nau hiki ki ha feituʻu foʻou. Naʻa nau ngāue fakataha ke langa ha kolo foʻou.

ʻI he tuí, te u lava ʻo fehangahangai mo e ngaahi meʻa faingataʻá. Te u lava foki ʻo tokoni ki he niʻihi kehé ʻi he lotolotonga ʻo e ngaahi taimi faingataʻá.