Ongo Tautehina Heka Pasikalá
Naʻe fai ʻa e talanoa ko ʻení ʻi Kautengi, Saute ʻAfilika. Fakamālō atu kia Samu S. ki hono vahevahe hoʻo talanoá!
Naʻe ʻikai ke ongoʻi ʻe Samu ʻoku fie vaʻinga. Ka naʻá ne fie maʻu ke fakahoko ha faʻu manatu melie mo Sīnati.
“Ko e fāmilí ke taʻengata. … ʻOku ou fakaʻamu ke vahevahe ʻeku moʻuí mo nautolu ʻi he taʻengata hono kotoa” (Ngaahi Himí, fika 192).
Naʻe lele ʻa Samu ʻi he loto ʻataʻataá ʻi heʻene pasikala lanu puluú. Naʻe ʻi mui ʻiate ia hono kiʻi tehina taʻu ua ko Sīnatí, ʻi heʻene kiʻi paiki kulokula.
“Haʻu, ta toe ʻalu!” Ko e lea ia ʻa Samu ʻi heʻena aʻu ki he ngataʻanga ʻo e loto ʻataʻataá. Naʻá ne tafoki ʻo ʻaka ʻi he vave taha naʻe lavá ke ne foki ki muʻa. Naʻe tau mai ʻa e havilí ʻi hono fofongá.
“Samu mo Sīnati!” Na‘e kaila ʻa Samu.
Na‘e kata ʻa Sīnati. Na‘á ne kaikaila mo Samu.
“Samu mo Sīnati! Samu mo Sīnati!”
Naʻá na ʻaka pasikala he loto ʻataʻataá, ʻo fefokifokiʻaki, ʻo aʻu ki he mamate e ongo vaʻe ʻo Samú ke toe ʻaka.
Naʻe fakatau e mānava ʻa Samú mo ne pehē atu “Ta ki‘i mālōlō.”
Naʻe ui mai ʻa Teti mei he faiʻanga vaʻinga punopuná (trampoline), “Mo omi ʻo mālōlō.”
Naʻe tau ʻe Samu ʻene pasikalá pea taki e nima ʻo Sīnatí. Naʻá ne tokoni ki hono kiʻi tehiná ke kaka ki he faiʻanga vaʻinga punopuná. Pea na‘á ne kaka hake ʻo tangutu ‘i he tafaʻaki ‘o Tetí.
“Na‘á ke fiefia?” Ko e ʻeke atu ia ʻe Tetí.
“ʻIo!” Ko Sīnati ange ia.
Naʻe tokoto atu ʻa Samu he faiʻanga vaʻinga punopuná mo e mapuhoí. Naʻe lanu pulū maama ʻa e langí, pea naʻe māfana ʻa e laʻaá.
“Ko ha ‘aho fakaʻofoʻofa eni, ʻikai ko ia?” Ko Teti ange ia.
Na‘e kamo pē ʻa Samu. Naʻá ne kuikui ʻo fanongo ki he hiva ʻa e manupuná kae talanoa ʻa Teti kia Sīnati. Naʻe fakaʻau ke ne fiemohea.
“Samu.”
Naʻá ne fakaʻāʻā hake hono matá. Na‘e punou hifo ʻa Sīnati ki hono fofongá.
“Ko e hā?” Ko e fehuʻi ange ia ʻa Samú.
Tau ō!” Naʻe tuhu ʻa Sīnati ki heʻene kiʻi paikí.
“Tali ai. ʻOku ou mālōlō.”
Na‘e kamata fakafulofula ʻa Sīnati.
Naʻe pehē ange ʻe Samu, “Kātaki. ʻOku ou fuʻu ongosia.”
Na‘e fusi ʻe Sīnati ‘a e nima ʻo Samú. “Haʻu ā!”
“ʻIkai! Na‘á ku ʻosi va‘inga mo koe!”
Naʻe lea ange ʻa Teti, “Samu.”
Na‘e sio atu ʻa Samu kiate ia.
ʻE ʻi ai e ʻaho ʻi he taimi ʻe fuʻu lahi ai ʻa Sīnatí te ne manatuʻi ʻa e taimi ne mo faʻa vaʻinga fakataha aí. ʻE nofo ʻi hono lotó ʻa e ngaahi manatu melie ʻokú mo fakahoko he taimi ní.”
Naʻe sio atu ʻa Samu ki he fofonga ʻo hono kiʻi tehiná.
“Fakamolemole?” Ko e kole ia ʻa Sīnatí.
Naʻe ʻikai ke ongoʻi ʻe Samu ʻoku fie vaʻinga. Ka naʻá ne fie maʻu ke faʻu ha ngaahi manatu melie mo Sīnati.
Naʻá ne malimali. “Sai.”
Naʻe mata fiefia ʻa Sīnati. “ʻOua!”
Naʻe puna hifo a Samu mei he faiʻanga vaʻinga punopuná ʻo tokoni kia Sīnati ke heka ki heʻene paikí. Pea manga hake leva hono vaʻé ki heʻene pasikalá.
Naʻá ne ʻeke ange “kuó ke maau?”
“ʻIo!”
Naʻá na ʻaka pasikala fakataha ʻo kolosi he malaʻé. Naʻá na kaila, “Samu mo Sīnati!”
Naʻe kei helaʻia pē ʻa Samu, ka ko ha faʻahinga ongosia lelei ia. Naʻá ne ongoʻi e mālohi hono ongo vaʻé ʻi heʻene ʻaka pasikala ʻi mui ʻia Sīnatí. Naʻá ne fakakaukau, ʻOku ou fakatauange ‘e manatuʻi ‘eni ʻe Sīnati. Te u manatu‘i ia ʻo ta‘engata.