Haʻu, ʻo Muimui ʻIate au
Taimi Fiefia ʻi he Folofolá
ʻOku fakafekauʻaki e ngaahi fakakaukau ko ʻení mo e Haʻu, ʻo Muimui ʻIate Au—ma‘á e Fakafoʻituituí mo e Ngaahi Fāmilí ʻi he uike kotoa pē.
Tuʻu ʻi he Ngaahi Potu Toputapú
Ki he Tokāteline mo e Ngaahi Fuakava 45
-
Hiva ʻa e “Fili e Hala Totonú” (Tohi Hiva ʻa e Fānaú, 82)
-
Naʻe akoʻi ʻe Sīsū Kalaisi ʻoku totonu ke tau “tuʻu ʻi he ngaahi potu toputapú” (Tokāteline mo e Ngaahi Fuakava 45:32). Ko e potu toputapú ko ha feituʻu pē ʻoku tau maʻu ai e Laumālie Māʻoniʻoní.
-
Hiki mo ho fāmilí ha ngaahi meʻa ʻe tokoni ke ke tuʻu ai ʻi he ngaahi potu toputapú, ʻo hangē ko e angaʻofá pe lotú. ʻOku teuteuʻi fēfē kitautolu ʻe he ngaahi meʻa ko iá ki he hāʻele mai ʻa Sīsū Kalaisí? Fakapipiki ʻa e lisí ʻi ha feituʻu te ke toutou sio ki ai.
Taimi Talēnití
Ki he Tokāteline mo e Ngaahi Fuakava 46–48
-
Hiva ʻa e “ʻOku ou Feinga ke Hangē ko Sīsuú” (Tohi Hiva ʻa e Fānaú, 40).
-
Naʻe foaki mai ʻe he Tamai Hēvaní kiate kitautolu takitaha ha ngaahi meʻafoaki fakalaumālie (vakai, Tokāteline mo e Ngaahi Fuakava 46:11–26). ʻA ia ko hono ʻuhingá naʻá Ne foaki mai ha ngaahi talēniti makehe maʻatautolu. ʻOku makehe pea mahuʻinga ʻa e taha kotoa ki he Tamai Hēvaní!
-
Fakakaukau ki he ngaahi meʻafoaki ʻokú ke maʻú. Hili ia pea fokotuʻu ha fakaʻaliʻali talēniti fakafāmili! Vahevahe mo e niʻihi kehé ʻa e ngaahi meʻafoaki kuo foaki atu ʻe he Tamai Hēvaní.
Muimui ki he Māmá
Ki he Tokāteline mo e Ngaahi Fuakava 49–50
-
Hiva ʻa e “Ako’i Au Ke u ‘Eva He Maamá” (Tohi Hiva ʻa e Fānau, 70).
-
Naʻe akoʻi ʻe Sīsū Kalaisi, “Ko e meʻa ko ia ʻoku mei he ʻOtuá, ko e māmá ia” (Tokāteline mo e Ngaahi Fuakava 50:24). ʻOku hangē ʻa e ongoongoleleí ko ha maama ʻokú ne tataki kitautolu mei he fakapoʻulí mo e puputuʻú.
-
Fufuuʻi ha meʻa ʻi ha loki fakapoʻuli pea feinga ke kumi ia. Toe kumi ki ai ʻaki ha kasa pe kiʻi maama siʻisiʻi. ʻOku tokoniʻi fēfē koe ʻe he ongoongoleleí ke ke ʻilo ho halá?
Faitotonu!
Ki he Tokāteline mo e Ngaahi Fuakava 51–57
-
Hiva ʻa e “Faitotonu Neongo ʻa e Luma,” (Ngaahi Himí, fika 145).
-
Naʻe akoʻi mai ʻe Sīsū ʻoku totonu ke tau “ngāue faitotonu” mo e niʻihi kehé (Tokāteline mo e Ngaahi Fuakava 51:9). ʻOku ʻuhinga ia ke tala ʻa e moʻoní pea angalelei ki he niʻihi kehé.
-
Fakakaukau ki ha ngaahi tūkunga te ke ala fehangahangai mo ia ʻi he moʻui fakaʻahó—hangē ko hono kumi ha paʻanga ne mole pe mole ha meʻa naʻá ke kole. Ngāueʻi ʻa e meʻa te ke fakahokó ke “ngāue faitotonu” ai.
Ngaahi Tohinoa Fakamālō
Ki he Tokāteline mo e Ngaahi Fuakava 58–59
-
Hiva ʻa e “ʻOku ou Fakamālō Atu ʻe Tamai” (Tohi Hiva ʻa e Fānaú, 9).
-
Naʻe akonaki ʻa Sīsū, “Ke ke fakafetaʻi ki he ʻEikí ko ho ʻOtuá ʻi he ngaahi meʻa kotoa pē” (Tokāteline mo e Ngaahi Fuakava 59:7).
-
Faʻu ha ngaahi tohinoa fakamālō mo ho fāmilí! Pelu fakataha ʻa e ngaahi laʻipepá ʻo hangē ha tohí pea teuteuʻi ʻa e takafí. Tohi pe tā ha meʻa ʻe tolu ʻokú ke houngaʻia ai ʻi he pō kotoa kimuʻa peá ke mohé.