Kau Paionia ʻi he Fonua Kotoa Pē
Semi Peasilī
Ngāue Fakafaifekau Langa ʻi Nuʻu Sila
ʻOku nofo ʻa e ongo faʻu tohí ʻi Uaikato, Nuʻu Sila, mo ʻIutā ,USA.
Naʻe ʻiloʻi ʻe Semi ʻokú ne fai e ngāue ʻa e ʻOtuá.
Naʻe fetuku ʻe Semi ha falukunga papa ʻo tuku ki he feituʻu ʻoku fai ai e langá. ʻI he taimi ko iá, ko e ngaahi pimi papa pē ne ʻosi fokotuʻú. Ka ʻe ʻikai fuoloa kuo hoko ʻa e ngaahi papá mo e ngaahi pimí ko ha fale. Naʻe ʻikai lava ʻa Semi ʻo fakakaukau ki ha founga lelei ange ke fakaʻaongaʻi ai hono ʻaho Tokonakí ka ke tokoni ʻi hono langa ha falelotu foʻou!
Naʻe saiʻia ʻa Semi ʻi hono langa ha ngaahi meʻa. Ka naʻe faingataʻa he taimi ʻe niʻihi kiate ia. ʻI heʻene kei siʻí, naʻe lavea lahi hono ongo nimá ʻi ha fakatuʻutāmaki. Naʻa mo e taimí ni, ʻi he tutupu hake ʻa Semí, naʻe kei fakafefeka pē hono ʻuluʻulutuhú. Taimi ʻe niʻihi naʻe faingataʻa ke toʻo ha ngaahi meʻa pe puke ha ngaahi meʻangāue.
Ne toʻo fakalelei hake ʻe Semi ʻene hāmalá. Naʻe pau ke ne feinga mālohi ange ʻi ha niʻihi ʻo e kau ngāue kehé, ka naʻe ʻikai tokanga ia ki ai. Naʻá ne fie tokoni pē. Naʻá ne ʻiloʻi naʻá ne fai e ngāue ʻa e ʻOtuá. Pea kapau ʻokú ne fai e ngāue ʻa e ʻOtuá, ko e moʻoni ʻe tokoniʻi ia ʻe he ʻOtuá!
Naʻe femoʻuekina ʻa Semi he ngāué ʻi he taimi naʻá ne fanongo ai ki ha taha ʻoku haʻu ʻi mui ʻiate ia. Naʻe pehē ange ʻe he tokotahá, “Ko e ngāue lelei ia ʻokú ke fakahokó.”
Naʻe tafoki hake ʻa Semi. Ko ʻEletā Piesinga! Ko ha taki ia ʻo e Siasí naʻe tokoni ki hono fokotuʻutuʻu ʻo e ngaahi langa ʻi Nuʻu Silá.
Naʻe pehē ange ʻe Semi, “Mālō.”
Naʻe malimali pē ʻa ʻEletā Piesinga. “Te ke fie hoko ko ha faifekau ngāue langa? ʻOku lolotonga ngāue ʻa e kau faifekaú he taimí ni ke langa ha akoʻanga ʻa e Siasí maʻá e toʻu tupú. ʻOku mau fie maʻu ha kau tokoni lahi ange, pea ʻoku ou tui te ke fai ha ngāue maʻongoʻonga.”
Naʻe pehē ange ʻe Semi, “ʻOku ou saiʻia ke fakahoko ia.” Naʻe ʻikai ke ne faʻa tatali ke ngāue maʻá e ʻEikí ʻi heʻene hoko ko ha faifekaú!
ʻI he pongipongi Mōnité, naʻe hoko ʻa Semi ko ha faifekau ngāue langa. Naʻá ne tokoni ke lingi e simá ʻi ha fale ngāue ke ngaohi ʻaki ha ngaahi konga piliki matolu. Naʻe fakaʻaongaʻi e ngaahi konga pilikí ke tokoni ʻi hono langa ʻo e ʻapiakó. Naʻe fakaʻaongaʻi foki hanau niʻihi ke langa ʻaki ʻa e Temipale Hamilitoni Nuʻu Silá!
Naʻe ngāue mālohi ʻa Semi he ʻaho ki he ʻaho, pea mo e taʻu ki he taʻu. Naʻá ne fai maʻu pē hono lelei tahá. Naʻe faifai pē pea kole kia Semi ke ne tokangaʻi ʻa e fale ngaohiʻanga pilikí. Naʻá ne tataki e kau faifekau ʻoku nau ngāue kehé ʻi honau ngaahi fatongiá mo fakapapauʻi kuo lava lelei ʻenau ngāué.
Naʻe maʻu foki ʻe Semi ha fiefia! Naʻá ne kau fakataha ʻi he hiva mo e kau faifekau kehé. Naʻa nau hiva he taimi ʻe niʻihi ke fakalotolahiʻi e niʻihi kehé ke omi ʻo tokoni. Tatau ai pē pe ʻoku langa, hiva, pe fakamaheni ʻa Semi ki ha taha foʻou, naʻe tokoniʻi ia ʻe he ʻOtuá ke ne fakahoko ha ngāue lelei.
Hili ha ngaahi taʻu lahi naʻe ui ʻa Semi ke ʻalu ʻo ngāue fakafaifekau ki ha misiona ʻe taha. Ka ko e taimi ko ʻení naʻe kehe ia. He ʻikai ke ne fakaʻaongaʻi hono ongo nimá ke langa ha ngaahi meʻa. Ka, te ne fakaʻaongaʻi ia ke tokoni ki he kakai ʻi he loto temipalé—ʻa e temipale tatau pē ko ia naʻá ne tokoni ke langá!
ʻI he tuʻu ʻa Semi ʻi he loto temipalé ʻi hono teunga hinehiná naʻá ne ongoʻi nonga. Naʻá ne houngaʻia he ngaahi meʻa lelei kotoa ne tokoniʻi ʻe he ʻOtuá ke fakahoko ʻe hono ongo nimá.
Ko Nuʻu Silá ko ha motu ʻi he ʻŌseni Pasifiki Tongá.
Ko e Temipale Hamilitoni Nuʻu Silá ʻa e fuofua temipale ke langa ʻi he Hemisifia Tongá.
Naʻe laka hake ʻi ha kau tangata ʻe toko 300 tupu ne nau ngāue ke langa e temipalé.
Naʻe tokoni ʻa Semi ʻi heʻene kei siʻí ke tokangaʻi e fanga kosi hono fāmilí.
ʻI heʻene tupu haké, naʻe toe ngāue foki ʻa Semi ʻi he fakataha alēlea ʻo e koló.
Naʻá ne ngāue fakafaifekau mo hono uaifi ko ʻAiliní ʻi he hisitōlia fakafāmilí.