Soká mo e Sāpaté
Naʻe hoko ʻa e talanoa ko ʻení ʻi Honitulasi.
“Ko eTokonakí ko ha ʻaho makehe. Ko e ʻaho ia ʻoku tau teuteu ia ki he Sāpaté” (Tohi Hiva ’a e Fānaú, 105).
Naʻe fakafeʻātungiaʻi ʻe he ʻaho Tokonaki ʻo Samuelá ʻa hono Sāpaté.
Naʻe manako ʻa Samuela he sio televīsone mo Papá, tautautefito ki he ngaahi ʻaho Tokonakí. Naʻe ngāue mālohi ʻa Papa he uiké kakato. Ka ‘i he ʻaho Tokonakí, ne ngaohi ʻe Mamá ʻa e pastelitos ti piña (ngaahi pai fakafonuʻaki ʻa e fainā) pea naʻa nau sio TV fakataha.
ʻI ha pō Tokonaki ʻe taha, naʻá na fakakaukau ke na mamata ʻi ha partido ti fútbol (vaʻinga soka). Ka naʻe kamata tōmui ʻa e vaʻingá, pea ʻe lele ia ʻi ha taimi lōloa. ʻI he ʻosi ʻa e konga ʻuluakí, ko e kaí ko e 0-0. Naʻe fie maʻu ʻe Samuela ke kei sio pē. Ka naʻe ʻikai ke ne lava ʻo taʻofi ʻe ne mamaó.
“Taimi e mohé, Samuelito,” ko e fakamanatu lelei ange ia ʻa Mamá. “ʻOku fie maʻu ke ke mohe ka ke lava ʻo ʻāʻā ʻi he lotú ʻapongipongi.”
Naʻe pehē ange ʻe Samuela, “Kātaki Mamá. Ko e ongo timi lelei taha ʻeni ʻi Honitulasi!”
Naʻe sio atu ʻa Papá ki he uasí. “Sai. Te ke lava ʻo hokohoko atu hoʻo sió. Ka ʻoku fie maʻu ke ke ʻā he taimí ʻapongipongi.”
Naʻe toe fakafiefia ange ʻa e vaʻingá ʻi he konga hono uá. Naʻe ʻāʻā lelei ʻa Samuela he taimí ni! Naʻá na fakatou fakakaekae mo Papá. ‘Uluakí, naʻe ‘i ai ha ʻaka mei he tulikí. Ka naʻe fakahaofi eni he leʻo koló. Naʻe kai e timi ʻe tahá, pea toe kai mo e timi ʻe tahá. Kimuʻa pea fakatokangaʻi ʻe Samuelá, kuo ʻosi e vaʻingá. Na‘e ʻosi ia ‘i ha māhanga 1-1.
Naʻe fuʻu helaʻia ʻaupito ʻa Samuela he pongipongi hono hokó pea ʻikai ke ne fie tuʻu mei he mohengá. Ka naʻá ne ʻiloʻi naʻe mahuʻinga ʻa e maʻu lotú.
Naʻe kamata ke mohe ʻa Samuela lolotonga e houalotu sākalamēnití. Naʻe toutou kamo hono ʻulú. Naʻe ʻene ia ʻe Mamá ke tokoni ke ne ʻāʻā. Ka naʻá ne fuʻu ongosia pea ʻikai tokanga ia ki he kau leá. Naʻe pehē ʻe Papá, “‘Oku ou tui ʻoku fakafe‘ātungiaʻi ʻe ho‘o Tokonakí ʻa hoʻo Sāpaté.”
‘I he Palaimelí, naʻe talanoa ʻa e faiako ʻa Samuelá fekau‘aki mo hono tauhi ʻo e ʻaho Sāpaté ke māʻoniʻoní. Naʻá ne ʻeke mai pe ko e hā ʻe lava ke fai ʻe he fānaú ke makehe ai e ʻaho Sāpaté. Naʻe fakakaukau ʻa Samuela ʻi ha kiʻi taimi siʻi. Peá ne pehē mai, “ʻAlu ʻo mohe he taimi totonú ʻi he Tokonakí!”
ʻI heʻenau foki ki ʻapi hili ʻa e lotú, naʻe talanoa ʻa Samuela kia Mamā mo Papá. Naʻe pehē ʻe Samuela, “Naʻá ku fiefia ke sio he vaʻingá ʻanepō. Ka naʻe totonu pē ke u mohe kimuʻa. ʻOku ou tui ʻoku totonu ke tau fakaʻaongaʻi e konga ʻo e Tokonakí ke teuteu ai ki he Sāpaté.”
Naʻe pehē ange ʻe Papá, “Oku ou tui ki ai.”
Naʻe kamo ʻa Mama. “Mo au foki.”
ʻI he Tokonaki hono hokó, naʻe toe ʻi ai ha foʻi vaʻinga ʻe taha ʻi he TV.
“Ko e hā ʻoku totonu ke tau fakahoko he pōní?” Ko e ʻeke ia ʻa Papá. “ʻOku toe tōmui pē ʻa e vaʻingá.”
Naʻe pehē ange ʻe Mamá, “Te tau lava ‘o sio ʻi ha foʻi faiva.”
“Pe ko ʻetau ‘alu ʻo ‘eveʻeva,” ko Samuela ange ia.
“‘Oku sai pē ʻa e ʻeveʻevá kiate koe?” Ko e fehuʻi ange ia ʻa Papa kia Mamá.
Naʻe pehē ange ʻe Mamá, “ʻIo. Ko e meʻa lelei ke fakataha ʻa e fāmilí.”
Naʻe pehē ʻe Samuela, “Pea ʻi heʻetau foki mai ki ʻapí, te tau lava kotoa ʻo mohe lelei. Pea te tau mateuteu leva ki he Sāpaté!”