Ua Faasoa atu e Ana Lana Molimau

Saunia e Jane McBride

(E faavae i se tala moni)

E alala le tusitala i Colorado, ISA.

Sa saofai filemu Ana i lana vasega Peraimeri. Sa tilotilo atu o ia i le ata o Iesu o loo uuina e Sister Albo.

“E i ai se tasi na te iloa o le a le molimau?” O le fesili atu lea a Sister Albo.

Na sii i luga le lima o Ana. “Ae le o le fai atu tatou te iloa e moni le Ekalesia?”

“O sona vaega lena .” Na ataata Sister Albo. “A faasoa atu a tatou molimau, tatou te faasoa atu mea ua tatou iloa pe talitonu i ai e moni e uiga ia Iesu Keriso ma le Ekalesia. O le a le mea ua e iloa e moni, Ana? ”

Sa mafaufau i ai Ana. “Ou te iloa e alofa Iesu ia te a’u!”

“Ioe, e alofa o Ia. Ua ia te oe se molimau e alofa Iesu ia te oe. ”

Ina ua uma le lotu, sa fesili atu Tina, “O le a se mea na e aoaoina i le Peraimeri ananei, Ana?”

“Sa ou aoaoina ai le uiga o le molimau. O afea e mafai ai ona ou faasoa atu la’u molimau?”

“Soo se taimi e te manao ai!” Na fai mai ai Tama. “E mafai ona tatou faia la tatou lava sauniga molimau i afiafi faaleaiga.”

Sa fiafia Ana i lena manatu. “E mafai foi ona tatou laei i o tatou ofu o le Aso Sa!”

Ina ua oo i le taimi o le afiafi faaleaiga, sa faamaulu e Ana lona ofu e fiafia tele i ai.

“Susu maia i la tatou lotu molimau faaleaiga,” na fai mai ai Tama.

Sa muamua alu le tuagane o Ana, o Ethan. “Ou te iloa e moni le talalelei. Ou te iloa o Iosefa Samita o se perofeta. Ou te iloa o Russell M. Nelson o lo tatou perofeta i aso nei. Ou te iloa o loo soifua Iesu Keriso.”

Ona oo lea i le taimi o Ana. Na tu o ia i luga. “Ou te alofa tele ia Iesu. Ou te iloa e alofa o Ia ia te a’u. E popole o Ia ia te au ma e faafiafia ia te a’u. I le suafa o Iesu Keriso, amene.” Sa lagona e lona loto le mafanafana.

Sa opo o ia e Tina. “Faafetai lava, Ana. Sa ou lagonaina lou alofa tele ia Iesu.”

Sa ataata Ana. “O le faasoaina atu o la’u molimau ou te fiafia ai.”