Asiosio Taufaafefe
E alala le tusitala i Vermont, ISA.
Sa tutupu mea taufaafefe i le lalolagi atoa. O le a se mea e mafai ona faia e Iosia?
“Pe a outou auauna atu i o outou uso-a-tagata, ua nao lo outou auauna atu lava lea i lo outou Atua.” (Mosaea 2:17).
Ina ua faalogo Iosia i le asiosio, sa fefe o ia. Sa mafaufau pea lava o ia i ata na ia vaaia—o ata o le asiosio ma ata o mea uma na faaleagaina ai. I se tasi o ata, na vaai ai Iosia i se teineitiiti laitiiti i seevae pa’u lanu piniki. Sa foliga e tutusa le la matutua ma o loo tu i luga o se faaputuga lapisi i le mea sa i ai lona fale. O le a le mea o le a tupu ia te ia? I tagata uma lava ua leai ni o latou fale?
“E matuai e foliga fia moe a,” o le tala lea a Tina i le taeao na sosoo ai. “O lelei ou faalogona?”
Sa faamimigi Iosia.
Sa tago atu Tina i ona foliga. “E leai se fiva. Pe tatau ona toe siaki poo a mai oe i le taimi o le aiga o le taeao? O loo fai panikeke a Tama.”
I le umukuka, sa tu Tama i autafa o le ogaumu, ma feliuai panikeke. Sa fai ma ia autilotilo atu pea i lana telefoni.
“Sa tele ni mea na faaleagaina mai le asiosio,” o lana tala lea. “E faitau afe e le o maua lava se eletise.”
“Ou te faamoemoe o le a vave ona latou toe mauaina,” o le tala lea a Tina. Sa la talanoa pea ma Tama e uiga i le asiosio. Sa saofai Iosia i le laulau. Sa ia tuu lona ulu i ona lima.
“O LELEI oe la’u, pele?” O le fesili lea a Tama.
Sa ea ae i luga Iosia. “Ua ou fefe,” o lana tala lea. “O le a oo mai se asiosio ia i tatou? Ou te le manao e lelea ese lo tatou fale.” Na amata ona tagi o ia.
Sa saofai i lalo Tina ma tuu lona lima e fusi ai Iosia.
“Tatou te le iloa pe o le a i ai se mea taufaafefe o le a tupu ia i tatou, ae e mafai ona tatou faalagolago i le Tama Faalelagi e fesoasoani ia i tatou e tusa lava po o le a le mea e tupu.”
“Ae faapefea ia tagata uma na i ai i le asiosio?” Na fai mai ai Iosia. “Aisea na le fesoasoani ai le Tama Faalelagi ia i latou?”
“ O loo fesoasoani le Tama Faalelagi ia i latou,” o le tala lea a Tama. Sa ia tuuina se faaputuga tele o ni panikeke i luga o le laulau. “O le a Ia le taofia mea leaga uma mai le tutupu, ae o le Tama Faalelagi e fesoasoani e le aunoa i Ana fanau.”
“E faapefea?” Na fai mai ai Iosia.
“Ia, o nisi taimi na te auina mai ai ni vavega laiti, pe fesoasoani i tagata ia lagona le mafanafana, po o le musuia o isi tagata e fesoasoani atu.”
Sa luelue le ulu o Tina. “E tele taimi, e fesoasoani ai le Tama Faalelagi i isi tagata e ala mai ia i tatou.”
“Manatua le taimi na i ai se mu a le au Johnson ma sa tatou valaauliaina i latou e nonofo faatasi ma i tatou? Sa e faasoa atu i ai lou potu, “o le tala lea a Tama.
“Ma sa lua taaalo ma le pepe ina ia mafai ona matou fesoasoani ia i latou i le toe fausiaina o lo latou fale,” na faaopoopo mai ai Tina. “O se fesoasoani tele lena. O lea la ua toe foi atu le au Johnson i lo latou fale.”
Na ataata Iosia. Sa fiafia o ia e fesoasoani i le au Johnson. Pe o se fesoasoani lena a le Tama Faalelagi e ala atu ia te ia?
“Ma sa i ai foi le ‘aiga o supokeli e saili ai tupe mo tagata i le mafuie,” o le tala lea a Tama.
“Sa ou fesoasoani e salu le fola,” o le tala lea a Iosia.
“Ioe, sa e faia,” na fai atu ai Tama.
“Ae faapefea ia tagata e latalata i le asiosio?” o le fesili lea a Iosia. “E mafai ona tatou fesoasoani atu ia i latou?”
“Ou te manatu o loo musuia oe e le Tama Faalelagi e fesoasoani atu. O le a se mea e te manatu e mafai ona tatou faia? na fesili ai Tina.
“Pe o le a fesoasoani le tupe mo lo’u aso fanau?” o le tala lea a Iosia. “O loo i ai pea ia te a’u.”
“Ioe, o le a fesoasoani,” o le tala lea a Tina. “O loo ia te a’u ma Tama sina tupe e mafai foi ona ma auina atu.”
Sa tilotilo atu Iosia i panikeke. Sa foliga manaia mai. “E mafai ona ou faia le tatalo?”
“E mafai lava ona e faia,” o le tala lea a Tama.
Sa punou le ulu o Iosia. Sa ia faafetai atu i le Tama Faalelagi mo a latou meaai ma mo le fesoasoani e le aunoa i Ana fanau. Ona tatalo lea o Iosia mo tagata ua afaina i le asiosio. Sa ia talosaga ina ia iloa atili auala e mafai ai e ia ma lona aiga ona fesoasoani atu ai.
Mulimuli ane, na telē se u a Iosia i panikeke. Sa tele ni auala e fesoasoani ai! Ma sa sili atu ona lelei faalogona o Iosia.
Ata na tusia e Kasia Dudziuk