O Loo Faalogoina Pea le Pese a Tamā
Ua misia tele e Leah lona tama.
“E soloiesea foi e le Atua loimata uma i o latou mata” (Faaaliga 21:4).
Na faapa’ū e Leah lana ato a’oga ina ua ia savali atu i lona potu. Sa tolotolo atu i luga o lona moega ma fusi mau lona aluga i lona manava. Sa le talitonu o ia i le tala a Ashley na fai e uiga i lona tama.
Na maliu le tama o Leah i le pule i le ola i nai masina talu ai. Ua ia misia tele o ia. Ua ia misia lava ana meatballs lauiloa. Ua ia misia le auala na te faafiafia ai Tina. Ma ua ia misia lona matamata atu ia te ia a’o ta lana kitara.
I nisi o taimi pe a faanoanoa o ia, e faalogologo ai Leah i ana musika. Sa ia tusia foi ni tusi ia te ia. Na ia teuina nei tusi i le pusa o faamanatu i lana kapoti lavalava. O le pusa lava lea e tasi na te teuina ai mata tioata a Tama, o lona pulou pesipolo tuai, ma isi mea na fiafia i ai o ia. O se auala na te manatuaina ai o ia.
Ae sa le’i lagona e Leah lona fia faalogologo i musika pe tusia ni tusi i le taimi nei. Sa faanoanoa o ia, ae sa pei e ita foi. Sa atili ona ia oomiina le aluga ma amata ona tagi.
Na tātā lemu e Tina le faitotoa. “O OK oe?” O le fesili lea a Tina.
Na fogi le isu o Leah ma nofo i luga. Sa saofai Tina i ona tafatafa i luga o le moega.
“Na fai mai e Ashley se tala le lelei,” o le tala lea a Leah. “E uiga ia Tama.” Na faaauau le maligi o loimata o Leah. “Na fai mai e le mafai ona alu o ia i le lagi ona o le auala na ia maliu ai.”
“Oi, la’u pele,” o le tala lea a Tina, ma fusi atu ia Leah. “E le moni lena mea.” Na ia solo ese loimata o Leah. “Ina ua maliu lou tama, na ma’i lona faiai. E malamalama le Tama Faalelagi i lagona o Tama ma le mea na tiga ai o ia.”
“O ia o se tamā lelei,” na fai mai ai Leah. “E alofa le Tama Faalelagi ia te ia ma o loo fesoasoani ia te ia, e sa’o?
“O Tama o se tagata maoa’e , Leah. Na alofa tele o ia ia te oe.” Sa solo ese e Tina ona lava loimata. “Ma e alofa le Tama Faalelagi ia te ia. Ou te iloa e alofa o Ia.”
“Ae faapefea ona e iloa?” Sa fesili ai Leah.
“Ona ou te tatalo i ai i nisi taimi,” o le tala lea a Tina. ”Ma e ui lava e tiga lo’u matuā misia o ia, ou te lagona foi i nisi o taimi le filemu.
Sa lue le ulu o Leah.
“Ou te faamalie atu i le tala a Ashley na fai atu ia oe,” o le tala lea a Tina. “Ou te iloa o Ashley o se tasi o au uo mamae, ma na tiga tele lena mea mo oe.”
“Ioe.” Sa filemu Leah mo se minute. Ona ia fesili lea, “E mafai ona fai faatasi se ta tatalo?”
“Ioe.”
Na tootutuli i lalo Tina ma Leah. Ona amata lea ona tatalo Leah. “Tama Faalelagi, ua ou misia lava lo’u tama. O manuia o ia? Faamolemole fesoasoani mai ia te a’u ia ou maua se lagona lelei. I le suafa o Iesu Keriso, amene.”
Na tatala atu e Leah ona lima ma toe fusi atu ia Tina. Na ia faalogoina sina fiafia teisi. Sa ia faalogoina pea le faanoanoa, ae sa le’i toe popole o ia i lona tama. Sa ia iloa sa alofagia o ia e le Tamā Faalelagi, ma sa ia iloa e alofa foi o Ia ia te ia.
“Faafetai, Tina.” Sa manavanava loloa Leah. “E mafai ona e fesoasoani mai ia ou talanoa atu ia Ashley?”
“O se manatu manaia tele lena,” na fai atu ai Tina. “Ou te manatu sa le’i mafaufauina e ia e faatiga i ou lagona, ae o le a lelei tele lona iloa ai o le mafuaaga na afua ai ona e tiga ona o le tala na ia faia. O le a ou valaau i lona tina ma vaai pe mafai ona la omai taeao tatou talanoa.”
“Lelei,” o le tala lea a Leah. “Ou te manatu o le a ou maua sina taimi filemu mo a’u,”
Sa lue le ulu o Tina. “Faailoa mai pe a i ai se mea e te manaomia.”
Sa ki e Leah musika a lona tama. Na moeiini ona mata ma faalogologo i le taina o lana kitara. Ona ia avane lea o se pepa ma amata ona tusia se tusi mo ia.