Na o Tusiga Faatekinolosi: Faaaofia ai
Pe a E Le Iloa se Tala e Fai
Ina ua maliu lo ma atalii i le pule i lona ola, sa i ai iina ni fesoasoani musuia e faamafanafana ia i matou.
O le fitu tausaga ua mavae, na maliu ai lo ma atalii o Tanielu e ala i le le pule i le ola.
I le aso o lona maliu, ma te lei iloa le mea sa i ai o ia. Sa matou valaau atu i ana uo uma, o falemai, ma leoleo, ae sa leai se tasi na vaai ia te ia. Sa tauivi Tanielu ma le atu o le mafaufau ma le manatu e pule i le ola mo le lima tausaga, o lea sa ma lagonaina ai ma lou toalua se lagona e uiga i le mea atonu lava na tupu. Mulimuli ane, sa fesootai ai lo’u toalua, o Celi, ma lē na la potu faatasi, [loma atalii] sa mauaina i totonu o lona potu.
E Aofia Ai i Latou Na Faanoanoa
Ou te manatu o le aveesea o se tamaitiiti atonu o se mea sili lea ona faigata e tupu i se matua. Ma e leai se mea e mafai ona aveesea lena tiga, ae o tagata o loo siomia oe e mafai ona faia ni mea se tele e fesoasoani ai ia te oe i lou faavauvau. I lena taimi matautia, matou te lei oge aiga, uo, po o se fesoasoani. Mai le po muamua na matou iloa ai ua maliu o ia, na aapa mai ai loa tagata. Na o mai o matou tuaoi, o uo a Tanielu, ma o matou taitai o le Ekalesia. Na aumai e tuafafine o le Aualofa ia taumafataga, ma sa lava foai a tagata ma foai le mailoa mo o matou manaoga.
Mulimuli ane sa tau mai e lo matou epikopo e toatele tagata na mananao e fesoasoani ae sa latou le iloa pe faapefea. Ma sa latou fesili atu ia te ia, “O le a se mea e mafai ona matou faia mo le au Hunts?”
E le o taimi uma e tupu ai, ae o nisi taimi pe a faalogo tagata e uiga ia Tanielu, latou te le iloa se tala e fai mai pe faapefea foi ona taulima i matou. Ou te manatu e pei ona tatou le iloa pe faapefea ona tatou talanoa atu i se tasi e tautala i se isi gagana. Tatou te le iloa se tala e fai atu po o le popole e uiga i le fai atu o le mea sese, ma nai lo lena, aua lava nei o tatou talanoa atu iai latou. Ae faamolemole ia aapa atu. O le aveesea e tuuatoatasi ma e mafai ona faaesea. O le mea moni sa siomia i matou e le toatele o e na aapa mai sa faia se suiga tele.
Matou Te Le Popole Mo Tanielu
O le mea e tasi tatou te talisapaia o le tele o tala na matou faalogo i ai e uiga i lo ma atalii. Matou te le popole mo Tanielu. Sa matou iloa le ituaiga o tamaitiiti sa i ai o ia. Ua tatou iloa sa ma’i o ia, ma ua matou iloa “e vaai Ieova i le loto” (1 Samuelu 16:7). Ma sa tele le loto o Tanielu. Ua matou iloaina. Ae o le faalogo atu i tagata o ta’u mai ni a latou lava tala e uiga ia Tanielu sa matagofie.
O Nate Olsen o se tasi o uo a Tanielu. Sa uo talu mai le vasega tausaga muamua. Ina ua vave ona toe foi mai Nate i le fale mai lana misiona mo mafuaaga faafomai, sa vave lava ona valaaulia e Tanielu o ia la te fai ‘aiga i le aoauli. Sa tau mai e Nate ia i maua le auala na i ai Tanielu iina e faalogo, alofa, ma faamalosiau — i se taimi na lagona ai e Nate le le mautonu ma le tuua toatasi. E pei ona fai mai Nate, o Dan o se ituaiga tagata e matuai alofa moni lava i tagata.
E Mafai Ona Tatou Faatagaina Isi i Totonu
E taua le avea ma se tagata e te i ai ma tautino atu o oe o se tagata. O nisi taimi e manaomia ai ona tatou fai atu mo se fesoasoani, ma aapa atu — e tusa lava pe o loo tatou tiga. E mafai ona tatou faatagaina isi e o mai ia i tatou ma iloa pe o ai i tatou.
O le fitu tausaga mulimuli ane, o loo faigata lava. O nisi taimi e faafuasei lava ona amata ona tagi Celi, ma faapea mai, “ua ou misia lava la’u pepe. Ua ou misia lava la’u pepe. ” Ae ua ia faailoa mai sa faamafanafanaina o ia i na taimi — o le mafanafana faaleagaga. O le mafanafana faaleagaga o se fesootaiga atoatoa. O le sailia o le faamafanafanaga faaleagaga o le auala sili lea e lagona ai le auai atoatoa. Ma o lenei faamafanafanaga faaleagaga e aofia ai agelu faaletagata o e lagona le musuia e o mai e fesoasoani.
Sheri L. Dew, o le sa avea muamua ma Fesoasoani Lua i le Au Peresitene Aoao o le Aualofa, i se tasi taimi na ia faasoa mai se tala e uiga i se Pulega Aoao o le na fesili pe faapefea ona iloa pe o i ai se tasi o se soo moni o Iesu Keriso. O le tali na ou le mautonu ai muamua, ae o le taimi nei ua ou matua ioeina lava: “o le auala e mafai ona e iloa ai pe liua moni se tagata ia Iesu Keriso o le auala o le a mafai ai e lena tagata ona taulimaina isi.”1 O le ala faaKeriso e taulimaina ai isi o le i ai o le faaaloalo, alofa, ma le agaalofa — tusa lava po o ai i tatou po o le a foi le mea o loo tatou aafia ai.