Ae Faapefea Pe Ana Ou Le Alu?
O le aafiaga na tamau ai i lou mafaufau ma lou agaga le mafuaaga na tatau ai ona ou i ai iina i lena afiafi.
Sa toeitiiti lava a ou faia se faaiuga ou te le alu i lena afiafi. Sa ou iloaina o se po o manatuaga e ono fesoasoani ia te au e taulima ai le maliu o lou tina, ae na ou iloa foi o le afiafi o le a aumaia ai le loimata maligi ao faaauau ona ou faanoanoa ma faavauvau i lona maliu.
Ina ua latalata mai le po o manatuaga, sa faapea ona ou sauni ai ou te alu e ui lava sa ou faalotolotolua muamua. Sa tonu ia te au o le i ai iina o le a lelei lea mo au.
O le po o manatuaga, lea sa faamamaluina ai nai tagata sa lei leva ona maliliu, sa faia i le falemaliu lea na taulimaina ia fuafuaga o le falelauasiga o lou tina. E ese mai i le faatonu o le falemaliu ma lona aiga, sa ou le iloaina se tagata i totonu o le potu. I le taimi o le afiafi, sa faitau mai ai igoa o tagata taitasi ua maliliu, ma na tutu e se sui o le aiga se moligao itiiti e manatua ai lena tagata.
Ina ua maea le sauniga, sa ou tu i luga e alu atu i le mea na i ai le taumafataga māmā. Sa o ese uma i latou sa nonofo i ou tua, sei vagana ai se tamaitai olomatua na pipi’i i se masini manava ma saofai i tafatafa o lana nofoa savali. Na ou lagonaina lona faanoanoa ma lona tiga. Sa ou lagona foi e tatau ona ou opo atu ia te ia.
Ou te lei iloa pe o a ni ona lagona e uiga i se tagata ese e tuuina atu ia te ia se opo, ae sa ou mulimuli i lenei uunaiga faatauvaa. Sa ou alu atu ia te ia ma o’u lima na faaloaloa atu. Sa aapa mai ona lima uma ia te au ma toso atu au i lalo ia te ia. Sa sogi o ia i lou alafau ma fai mai, “Faafetai lava mo lou iloaina sa ou manaomia se opo. O oe o se agelu.” Ona ma talatalanoa lea mo ni nai minute.
O lenei aafiaga na tamauina ai i lou mafaufau ma lou agaga le mafuaaga na tatau ai ona ou i ai iina. Mata e i ai se isi tagata e tuuina atu i lenei tina se opo i lena afiafi pe ana ou le alu? O le a ou le iloa lava, ae ou te iloa na uunaia au e opo o ia, ma ona sa ou faia, sa matuai faamanuiaina uma ai i maua.