Fesoasoani i Tamaiti ia Saunia mo le Papatisoga

Saunia e Lucy Stevenson Ewell

Mekasini a le Ekalesia

E mafai ona tatou agaga tatalo, loto i ai, ma onosai a o tatou fesoasoani i a tatou fanau e uia lenei laasaga i le ala o le feagaiga.

illustration of baptism

Ata na tusia e Bryan Beach

O le papatisoina ma faamauina o se laasaga faagaeetia lea mo tamaiti i le Ekalesia. A’o tulimatai atu le toatele i nei sauniga, e masani foi mo tamaiti ona lagona le popole po o le fefe.

I le avea ai ma se tusitala mo le Uo, o le mekasini a le Ekalesia mo tamaiti, ua ou faalogo ai i le tele o tala e uiga i tamaiti o e fefefe e le o saunia i latou e osia lenei feagaiga. O nisi e popole e faapea, e le o i ai se latou molimau e lava le malosi. O nisi e fefefe i le vai. Ma ua lagona e nisi se u’una’iga malosi tele ina ia atoatoa.

O ni nai auala nei e fesoasoani ai i lau tama ia lagona le saunia ma le mautinoa e uia le isi laasaga i le ala o le feagaiga.

Aoao Atu ma le Loto i Ai

E mafai ona faigofie le mafaufau o le papatisoga o se sauniga faapitoa e faailoga ai se tulaga taua o le olaga o se tagata pe na o se mea e tupu pe a atoa le valu tausaga o lau tama. Ae o le mea moni, o le papatisoga o se filifiliga paia, o lona uiga e tatau ona latou malamalama i le mafuaaga e taua ai. O le aoao atu ma le loto i ai o i latou e mafai ona fesoasoani ia faia ai le papatisoga ia sili atu le anoa (ma faaitiitia le taufaafefe). Aoao i latou i le ala e te aoaoina ai soo se tagata e a’oa’o e uiga i le Ekalesia ao lei papatisoina.

E taua mo i tatou le a’oa’o atu o fanau e uiga i feagaiga o le a latou osia i le papatisoga. O le tala fiafia e faapea, e le o se mea lenei e tatau lava ona tatou taumafai e fai i se po pe o totonu o se vaiaso e tasi. O le suesue i le talalelei o se aiga i le aluga o taimi o le auala sili lea e fesoasoani ai i lau tama e saunia e osia lenei feagaiga. E i ai ni nai mea e sili ona aoga e taulai i ai ao latalata mai le papatisoga a lau tama:

• I se faaupuga faigofie, ia talanoaina pe faapefea ona avea le papatisoina o se folafolaga ia mulimuli ia Iesu Keriso.

• Faitau e uiga i le papatisoga i mau, e pei o le Mosaea 18:8–10. Faamalamalama atu ia fuaiupu ina ia malamalama i ai lau tama ma mafai ona ia toe aoaoina atu manatu ia te oe. Mo se faataitaiga, sa faamatalaina e se tasi o teineitiiti na papatisoina talu ai nei i i Hawaii, ISA, le “tauave o avega a le tasi” o le “fesoasoani i tagata uma i soo se taimi latou te manaomia ai le fesoasoani.”

• Ia mautinoa e talanoa ma i latou e uiga i le meaalofa o le Agaga Paia, ma faasoa atu ni aafiaga na e oo i ai, i se taimi na faamanuiaina ai lou olaga e le Agaga Paia.

Atonu e popole nisi o tamaiti e uiga i le papatisoga ona latou te le manatu ua lava le malosi o la latou molimau. Fesoasoani i lau tama e manatua ia lagona lelei na latou maua a o faia se mea agalelei, pepese i le Peraimeri, po o le talanoa e uiga i le talalelei. Faamalosiau ia i latou e mafaufau i ni auala latou te iloa e alofa ai le Tama Faalelagi ia i latou. Faamalamalama atu o mea uma nei o amataga ia o se molimau ma o a latou molimau o le a tuputupu ae i le aluga o taimi a o latou faia pea filifiliga lelei.

Faaali Atu Mea e Faamoemoe i Ai

Afai e popole lau tama e uiga i le papatisoina—pe tusa lava pe latou te le o foliga mai i ai—e mafai ona aoga le talanoa e uiga i mea ua faamoemoeina. O se nofoaga lelei e amata ai o le saunia lea o i latou mo le faatalanoaga o le a latou faia ma lo latou epikopo po o le peresitene o le paranesi. O le fesoasoani i lau tama e tali fesili e pei o le, “Aisea e taua ai le papatisoga?” ma le “O le a le uiga o le ave i ou luga o le suafa o Keriso?” e mafai ona fesoasoani ia i latou ia saunia ai mo lenei talanoaga. Fesoasoani i lau tama ia manatua o le i ai o le epikopo iina, e fesoasoani ia i latou ia saunia, ae le o le suesueina o i latou. Ma ia manatua, e mafai lava ona outou o atu ma le lua tama i le faatalanoaga, pe a manao ai.

O le isi mea ia sauni i ai lau tama, e mo le mea e faamoemoeina faaletino i le aso o le papatisoga. Faaali atu ia i latou le auala e tutu ai pe a i ai i totonu o le faatanoa. E mafai foi ona e valaaulia le o umia le perisitua o le a papatisoina lau tama e faataitai le faiga faaletino o le papatisoga a o i fafo o le vai, ina ia iloa ai e lau tama pe faapeī le fufui ma toe faatu ae i luga. Faamatala i ai le mea o le a tupu i le taimi o le faamauga.

Afai e fefe lau tama e alu i lalo o le vai, ia mafaufau ma le agaga tatalo i ni auala e mafai ona e fesoasoani ai ia i latou e faatoilalo lena fefe ae le’i o’o i le papatisoga. Atonu e mafai ona oulua matamata ma lau tama i le papatisoina o se isi tagata e vaai ai i le puupuu o le taimi latou te i ai ai i lalo o le vai. Atonu e mafai ona oulua faataitaia ma lau tama le pupuniina o lua isu ma tuu faatasi lua foliga i totonu o le vai mo ni nai sekone i le taimi. Atonu e i ai se tagata i lo outou eria e aoaoina fanau e aau o le a i ai ni ana fautuaga. Po o le a lava lau mea e fai, ia mautinoa e te faia ma le alofa ma le onosai.

O le tele lava o le saunia e lagona e se tamaitiiti e uiga i faamatalaga faaletino o le papatisoga, o le tele foi lea o le latou to’a lelei ma taulai atu i le feagaiga faaleagaga o loo latou faia.

illustration of temple

Taulai Atu i le Alualu i Luma, Ae Le o le Atoatoa

O nisi taimi, atonu ona e matele ina tatou talanoa e uiga i le vaega faamamaina o le papatisoga, e le malamalama ai tamaiti ma manatu ai e tatau ona latou atoatoa pe a uma le sauniga. O se tasi o tala e masani ona tatou faalogo i ai i le Uo o le popolevale lea e oo i ai i se tamaitiiti pe a latou faia se mea sese mo le taimi muamua talu ona uma ona papatisoina. A uma ona lagonaina le mama ma atoatoa, o le finau ma se tei po o le galo foi o se feau, e mafai ona latou lagona ai e pei ua latou faaleagaina lena lagona lelei e faavavau!

I le avea ai ma matua ma taitai, e taua lo tatou fesoasoani ia malamalama a tatou fanau i le mataupu faavae o le salamo. Pe ua malamalama a tatou fanau o le iloaina o a tatou mea sese ma aoao mai ai, o se vaega lea o le auala tatou te aoao ma tuputupu ae ai i lenei lalolagi? Pe ua latou iloa e mafai ona latou tatalo mo le faamagaloga i soo se taimi? ma a latou aai ma feinu i le faamanatuga i vaiaso taitasi, ua latou faafouina na feagaiga na latou osia i le papatisoga? Molimau atu o le avanoa e salamo ai o se faamanuiaga ma se meaalofa. O le papatisoga e le o le atoatoa i le taimi nei ae o le ulu atu i le ala o feagaiga ma faia laasaga i aso uma ina ia avea atili ai e faapei o Iesu Keriso.

O Se Amataga Matagofie

Nai lo le vaai i le papatisoga ma le faamauga o se taunuuga, e mafai ona tatou fesoasoani ia tatou fanau ia vaai i ai o se amataga matagofie—o le amataga lea o se olaga fou o se soo o le feagaiga a Iesu Keriso. E tusa pe lagona e lau tama le fiafia, popole, po o sina mea o mea uma e lua, e mafai ona e mautinoa latou te le savavali na o i latou i lenei ala. E ala i le tatalo, loto i ai, ma onosai, e mafai ona tatou fesoasoani ai i a tatou fanau ia lagona le olioli a o latou uia lenei laasaga e toe foi atu i lo latou aiga faalelagi.

E mafai ona outou faitau ma le lua tama i mea uma e faatatau i le papatisoga i le lomiga o le masina lenei o le mekasini o le Uo ! O nisi nei o punaoa atonu e te iloa e faapitoa ona aoga:

• “Mauaina o le Molimau a Sapurina.” A o latalata mai lona papatisoga, sa iloa e Sapurina e tele atu lana molimau nai lo le mea sa ia mafaufau i ai. (Tagai i le itulau e 4.)

• “Salamo ma Toe Taumafai.” Ua iloa e se tamaitiiti e le faapea e tatau ona ia atoatoa ina ia papatiso ai. (Tagai i le itulau e 20.)

• “Fai Sau Lava Tusi o le Papatisoga.” Tuu atu i lau tama e ooti ma valivali itulau o lenei tamaitusi ina ia fesoasoani ia i latou e manatua ai vaega faapitoa o o latou papatisoga. (Tagai i le itulau e 24.)