O le Malosi e Agai Ai i Luma
Sa ou lagona le le agavaa ma sa tele naua lou ita. O le a se mea e mafai ona ou faia e aga’i ai i luma?
Ina ua maliu le ma pepe muamua ma lo’u toalua, sa fai mai fomai o le a le mafai ona toe maua sa’u fanau. Sa ou mafatia. Sa ou faavauvau ma saili mo ni tali. Sa faavauvau foi lo’u toalua. Sa ma tatalo ma le iloaina o le taua o le avea ma se aiga e faavavau. Mulimuli ane, sa faamauina i maua i le Malumalu o Los Angeles Kalefonia.
Sa ou taumafai pea ia malamalama i le mafuaaga na maliu ai [pepe] ina ua ou manatuaina lou faamanuiaga faapeteriaka. Sa amata ona ou faitau i lo’u faamanuiaga ma maua ai se vaega sa matuai galo lava ia te au. Na fai mai o le a faamanuiaina au i atalii ma afafine. Sa ou manatu na i ai se mea sese i mea na ta’u mai e fomai ia te au. Sa ou alu atu i le fomai ma toe fai mai foi o le a le mafai ona toe maua sa’u pepe.
Pe a ma le lima tausaga talu ona maliu le ma pepe muamua, ae ma filifili loa e taumafai e faaaoga le auala faatekenolosi e faafeusua’i ai sua ola. I le siaki faatulagaina muamua, sa faaalia ai i se suega o le maitaga le mautinoa ua [ou] maitaga. Sa le mafai ona ou talitonu i ai. Sa latou toe faia isi su’esu’ega ma faamausali ai, ua ou maitaga. O le iva masina mulimuli ane, na ma faafeiloaia ai le ma tama teine i lo matou aiga. O le taimi lenei, o a’u o se tina i ni tamaiti ofoofogia se toafa.
O le isi luitau na o’o mai i nai tausaga talu ai ina ua ma tetea ma lou toalua. Sa faateia au i lenei mea. Sa ou le iloa pe faapefea ona ou tali atu i lena mea. Sa ou faapea na i ai so’u aiga toaitiiti atoatoa. Sa ou alu foi i le aoga fa’i nifo i lena taimi. Sa ou tuua le aoga e taulai atu i lau fanau. Ou te lagona o le filifiliga aupito sili lea. Sa ou le faanoanoa ai. Ae sa tele lo’u ita. E faapefea ona tuua e se tasi se faaipoipoga ma se fanau ofoofogia e toafa?
Sa ou fefe foi po o le a le mea o le a tupu ia te a’u ma la’u fanau. Sa ou tagi ma ou lagona se lagona ole popolevale, ma mafauau pe o faamauina pea i latou ia te au. Sa ou talanoa i lo’u epikopo, ma fai mai o ia ua folafola mai e le Tama Faalelagi e faapea, ua faamauina i matou mo le faavavau atoa, ae o lo matou faitalia o le a fuafua i ai pe o le a matou toe faatasi e faavavau. Na aumaia ai ia te au le toomaga, i le iloa o lau fanau o loo faamauina pea ia te au.
Ae sa ou lagonaina pea le ita ma lagonaina sa ou le agavaa e alu i le malumalu. E mafai faapefea ona e alu i le malumalu ma le ita tele? Ou te lei fia alu foi i le malumalu ona ua tatala la’u faaipoipoga. Sa ou lagona e pei e le tatau ia te au ona sa tatau ona ou i ai pea i se faaipoipoga.
Sa ou toe talanoa i lou epikopo, ma sa ia fai mai e le o manao Satani ou te toe alu i le malumalu. E manao o ia e faatupu lou faanoanoa ma ia lagona ou te le agavaa. Sa ofoofogia le taimi na ou toe ulufale ai i le malumalu. O le alu i le malumalu ou te maua ai le fiafia ma le malosi sili atu. O le iloaina o loo fesoasoani mai le Tama Faalelagi ia te au ia avea o se tina, e le o tuua na o au, ma o le a Ia le tuulafoaiina lava au po o lou aiga, ua aumaia ai ia te au le malosi faateleina. O le taimi lenei, ou te faamautinoa o loo aoga pea lou pepa faataga o le malumalu.
“Ou te iloa e manaomia ona ou agai pea i luma ma faalatalata atili atu i le Tama Faalelagi i aso taitasi. O le auala lenei o le a ou faatasi ai ma lau fanau e faavavau.”
E ui lava e le o i ai lo latou tamā i le ata, ae e masani ona ou tauina i lau fanau ou te i ai iinei mo i latou. Matou te o i le lotu, o loo fai a matou suesuega o tusitusiga paia, ma o loo matou tatalo. E i ai so matou malamalamaaga i le taua o le aiga ma e manaomia ona matou faamagalo atu i le tasi ma le isi, lagolago i le tasi ma le isi, ma faafiafia le tasi ma le isi.
Ua fesili mai tagata ia te au pe o le a se mea ou te faia pe a ou maua se isi itula faasili i aso taitasi. Mata o le a ou moe? Pe o le a ou ai? O le a se mea o le a ou faia? O le a ou maua le 15 minute o le taimi taua faatasi ma lau fanau taitoatasi.
Ou te alofa tele i lau fanau, lea e ui i se lototiga maoae mai le sootaga ma le latou tama, sa aoga le mauaina o i latou. O le taua lena o i latou ia te au.
O le mautinoa e malosi lo matou faatuatua ua uunaia ai i matou o se aiga. Afai e faia la matou vaega, e fai foi le vaega a le Alii o Ana faamanuiaga ma folafolaga. O se mea lena o loo ou ola ai, ma e ese le faamanuiaina o au.
Ata na pueina e Christina Smith