Matutua ma le Faamaoni

Faamanuiaga ma Luitau o le Faaipoipo ua Matutua

Saunia e Christy Monson

E alala le tusitala i Iuta, ISA.

Ni nai tala ma motugaafa mo le faamalolosia o faaipoipoga i soo se matua.

O le faaipoipo ua matua e mafai ona aofia ai nisi o femilosaiga ma ni feliuaiga tulaga ese. Ae a o savalia e ulugalii lenei ala ma le faatuatua, o le a mafai ona latou maua le olioli sili ma atiina ae uiga auaumama faaKeriso. O lesona nei e tolu o le olaga mai ia i latou o e na mauaina le alofa faamamai ae ua matutua o latou soifua, ma sosoo ai ma ni motugaafa se tolu mo aiga ua tuufaatasi. Ou te faamoemoe o le faasoaina atu o lenei mea o le a fesoasoani ai i ulugalii fou ua matutua—po o i latou o loo faatalitali pea mo se faaipoipoga—ia iloa e le o tuua na o i latou i la latou malaga. O nei mataupu faavae pupuu e mafai ona uunaia ai ni manatu mo le faamalolosia o soo se faaipoipoga, pe ua 50 tausaga pe 5 masina o lua faatasi.

Ia Tausisia se Vaaiga e Faavavau

Na leai se manatu o Mona (ua suia igoa) o le a ia maua se soa e faavavau i le mavae ai o ni faaipoipoga faatoilaloina se lua. Ona ia mei atu lea i se nofoaga o tagata ua litaea ma feiloai ai ma Papu. Na avea i laua ma se uo, ma sa ia faailoa atu ia te ia le talalelei. E o’o ane i le taimi na la faamau ai, ua maua Papu i le kanesa. Sa ia fesili ia Mona pe manao pea e faaipoipo ia te ia.

“Ioe,” sa ia fai atu ai. “Ou te faaipoipo ia te oe mo le faavavau, ae le na o le olaga nei.”

Sa faaipoipo le ulugalii, ma sa papatisoina Papu. Sa i ai i laua uma i nofoa faataavalevale a o faamauina i laua i le malumalu. Na fai mai Mona na i ai se malamalama faaselesitila ia Papu i lena aso. Sa ola o ia i le isi ono masina, ma olioli i aso taitasi ma lana manamea. Ua le mafai ona faatali Mona seia toe faatasia i laua.

Faataitai Fesootaiga

Ina ua alofa Cassie ia Alapati, sa popole o ia i le pa’u atu i mamanu o fesootaiga le lelei ia sa ia vaaia i lana faaipoipoga muamua. O lea sa laua aveina faatasi ai se vasega o le faaipoipoga, lea na laua aoaoina ai:

E faataitai tomai o le faalogo.
E faasoa faamaoni ia lagona.
Ia feoeoeai, ae le o le faatautava.
Ioe e le ioe pe a tatau ai.
Talanoaina le puleaina o tupe.

“O le fausiaina o se faaipoipoga faamanuiaina e manaomia ai le faataitai pea, ae ua lava le tele o lo ma alolofa o le tasi i le isi e fai ai ia manuia,” o le tala lea a Cassie.

Faatautai Suiga ma le Alofa

Sa le malamalama Amanda i lona faamanuiaga faapeteriaka. Sa fai mai o le a avea o ia ma se faatosinaga tele i lana fanau ma a latou fanau, ae ua tea mamao tausaga e mafai ai ona fanau ma e lei faaipoipo lava. Ona ia feiloai atu lea ia Patrick, o se pailate. Sa la fiafia e faalogologo i musika ma taaalo tapolo faatasi. Ina ua mavae se taimi, ona la faaipoipo ai lea.

Na maliu le faletua muamua o Patrick, lea sa i ai lana fanau teine e toatolu. E ui lava ina sa latou faanoanoa i le maliu o lo latou tina, sa iu ina latou masani i le alofa mafanafana o Amanda. Sa mavae tausaga.

I se tasi aso, na alu ai Patrick e lele ma sa lei toe foi mai ai lava. Ina ua mavae ni vaiaso o sailiiliga, sa maua le vaalele i se vaituloto lata ane. Na iloa e Amanda sa na o ia le mātua o loo ola na totoe o afafine o Patrick. Sa ia faia se taumafaiga faaopoopo e lagolago ai ma fesootai ma i latou, aemaise lava i lo laua faavauvau.

Ua i ai nei se latou sootaga malosi ma lana fanau teine la ia. Latou te valaau atu ia te ia mo se fautuaga ma liliu atu ia te ia pe a mavae se aso faigata. Faatasi ai ma le lotomaualalo ma le agaga faafetai, ua iloa ai e Amanda ua iu lava ina faataunuuina lona faamanuiaga faapeteriaka.

O Motugaafa e Tolu mo Aiga Tuufaatasi

Taaalo faatasi. O Teri ma Lusila ua ta’ilua a la’ua faaipoipoga. E fiafia atalii la ia o Teri e tapolo, o lea latou te fuafuaina ai se tafaoga tapolo i vaiaso taitasi. E faatulaga e Lusila se vaega faapitoa mo tusi, taaloga, ma paso mo fanau a fanau pe a latou asiasi mai.
Ia onosai. Ina ua uma ona faaipoipo Cassie ma Alapati, sa mumusu le fanau a Cassie e asiasi mai i le Kerisimasi. Sa filifili le ulugalii e momoli atu pea i ai meaalofa, tuu atu se opo i fanau a fanau, ma faailoa atu i tagata uma e talia fiafia i latou i soo se taimi. Sa lei leva ae lagona e le aiga atoa le alolofa ia Alapati ma amata ona faapotopoto mo aso malolo.
Taumafai malosi pea e fesootai. E faitau atu e Amanda ni tala i fanau fou a ana fanau i le komepiuta ma e saunia foi ni lesona saienisi faigofie mo i latou. O le isi tina e faia se talanoaga i luga o le initoneti e tasi i le masina faatasi ma tagata o le aiga e taape solo i le atunuu.

O le alofa ia i latou o e o mai i o tatou olaga—e pei o taitoalua ma fanau fou—atonu e le faigofie, ae o le faaipoipoga ma aiga fou e mafai ona suia ai le tuuatoatasi i le olioli. A tatou ole atu i le Tama Faalelagi e faamanuia i tatou i le alofa mama, e mafai lava, i soo se matua, ona tuputupu ae ma le agavaa faateleina e faafetaiai lo tatou Faaola.