O Uluai Tamaitai o le Toefuataiga

Sa Saunoa Eliza ma le Pule

Saunia e Jennifer Reeder

O se faatumutumuga mai le soifuaga o Eliza R. Snow.

O i tatou, e pei o Eliza R. Snow, e mafai ona faafetaiaia lo tatou fefe ma tautala atu ma le lototele.

Ata

illustration of Eliza R. Snow

Ata na tusia e Toni Oka

I le aso 18 o Aperila, 1884, sa tulai ai se tamaitai ua matua le soifua ma ni foliga mafatia e saunoa atu i uso o le Aualofa i Iuta. O le Peresitene Aoao lenei o le Aualofa o Eliza R. Snow, ma o le a lipoti mai e se nusipepa e faapea, e ui ina 80 tausaga o le soifua, ae sa ia “saunoa atu ma le mana tele ma le faamaoni, ma sa foliga malosi lona leo ma sa faatumulia ai le fale tele.”¹

Ina ua papatisoina Eliza, sa ia folafola atu i le Atua o le a ia “viia pea Lona suafa i le faapotopotoga o le au paia.”² Sa tumau faamaoni o ia i lena folafolaga, ma na tuuina atu le silia ma le afe o lauga i lona soifuaga atoa. Peitai, o i latou sa maua le avanoa e faalogologo ai ia te ia, e ono tetei i le iloa o le tautala atu i tagata lautele na matuai atuatuvale tele ai o ia. E oo lava a o faiaoga i le aoga i Navu ma tusifaamaumauina minute o fonotaga a le Aualofa iina, sa musu lava o ia e tautala atu.

O se valaaulia e faafetaiai lona fefe na oo mai i le 1868, ina ua talosagaina e Peresitene Polika Iaga ia Eliza e fesoasoani e faatulaga Aualofa i Iuta atoa. “Ou te manao ia te oe e a’oa’o ia tuafafine,” na ia saunoa atu ai. O lea manatu sa matuai taufaafefe na faapea ona faamatala e Eliza na misi se tata o lona fatu.³ Ae sa ia maua le lototele e faia ai le mea sili na ia mafaia, ma i le aluga o taimi na ia iloa ai o le taliaina o valaauga luitauina na faatumulia ai o ia i le malosi e sili atu nai lo lona ia lava malosi.

I se tasi vaega, na faamatala ai e Eliza e faapea, na valaauina o ia e le Peresitene o le Ekalesia e alu i se misiona, ma sa ia molimauina e faigofie atu “le faia vave ma le le faatuai o le mea o loo manaomia mai ia i tatou.”⁴ I se isi vaega, sa tautino atu ai e Eliza na te lei lagonaina e mafai ona tautala atu. “Ae faatasi ai ma lo outou faatuatua ma tatalo ma le agaga o le Alii, atonu o le a mafai ona ou tautala atu ai i se mea o le a faamafanafanaina ma faamanuiaina ai oe.”⁵ Sa ia aoao e ala i aafiaga ina ia saili le Agaga ina ia mafai ai ona ia tautala atu ma le mana.

Na faamalosiau atu Eliza i tamaitai ina ia maua le lototele e tutu ai ma faasoa atu a latou molimau: “O le tautala atu i o outou manatu sili o le a faateleina ma faamalolosia ai i latou.”⁶ Sa le gata ina sa ia aoao e saunoa atu o ia lava ma le pule, ae sa ia aoaoina isi ia faafetaiaia o latou popolega ma tatala o latou fofoga.