O Se Atoatoa o le Olioli
E faigata ona faamatala le olioli ofoofogia na faatumulia ai lou agaga a o ou tuua le falemai i lena aso.
A o nofo ai i se potu faatalitali i le falemai, sa ou matauina ai se tina ma sana tama teine. Sa fai e le teineitiiti se tali foliga ma sa tale i le tele o taimi. Sa o’omo ona mata, ma sa sesega ona foliga. Sa le mafai ona taofiofi lou faanoanoa alofa mo ia. Sa foliga mai sa matua lelavā lona tina.
O le potu faatalitali e laitiiti tele, o lea na ou lagona uma atu ai ana tala sa fai. Ina ua uma ona ia totogia le vaaiga o i laua, sa faamanatu atu e le teine ofisa ia te ia se paleni e le’i mae’a ona totogi, e sili atu ma le faaluaina o le totogi o le vaaiga o ia i le taimi lea.
Sa faamatala e le fafine, faatasi ai ma le faigata ona taofoiofi o ona lagona, o le a le i ai sana tupe e totoe seia oo i le masina e sosoo ai. Sa ia fai atu sa toetoe lava a le lava le totogi o lana lisi. Sa tau atu e le teine ofisa ia te ia e tatau ona ia taumafai e totogi lana paleni i se vave e mafai ai. Ona faasino atu lea o le tamaitai ma lana tama i le pito i tua mo le la vaaiga faatulagaina.
A o ou saofai ai iina, sa le mafai ona taofi lou mafaufau i le tamaitai ma lona tulaga. E le o au o se tagata mau’oa, ae a ou mafaufau i le agalelei tele o le Alii ia te au ma lo’u aiga, sa ou lagonaina ai se manao lofituina e fesoasoani i lenei tamaitai ma lana tama teine.
Sa ou alu atu i le teine ofisa, ma mafaufau pe mata e mafai le mea na ou manao e fai. Sa ou faamalamalama atu na ou faalogo i le tulaga pagatia o le tamaitai ma ou manao e totogi lana paleni o loo totoe. Sa faateia le teine ofisa ae sa fiafia foi e faamamalu lau talosaga.
Sa ou fai atu ia te ia e tau i le fafine ua uma ona totogi le paleni ma e le manaomia ona toe popole i ai. Sa ou tau atu foi i le teine ofisa e aua nei ta’ua i ai po o ai na totogiina. Ona ou totogiina lea o le paleni ma faaauau ai i lau siaki faatulagaina. Ou te lei toe vaai i le fafine po o lana tama teine, ae sa ou tatalo ina ia vave ona faaleleia mea uma mo i la’ua.
E faigata ona faamatala le olioli ofoofogia na faatumulia ai lou agaga a o ou tuua le falemai i lena aso. Leitioa a fetalai le Faaola e uiga i le i ai o se atoatoaga o le olioli (tagai Mataupu Faavae ma Feagaiga 11:13). E sili atu nai lo se isi lava taimi muamua, na ou iloa ai sa ou manao ia ou avea atili e faapei o lou Faaola, ma ia ou lagonaina soo le olioli lea e sau mai i le auauna atu ia te Ia.