Autalavou Matutua
Agai i Luma ma le Faamoemoe i Taimi e Lei Mafaufauina
Pe a tatou lagonaina le fefe ma le le mautonu e uiga i le agai i luma i le olaga, o lo tatou faamoemoe ma le faatuatua ia Keriso e mafai ona faamalamalama ai le ala.
E leai se tasi o i tatou na faamoemoeina le aafia ai o le lalolagi atoa i le faama’i o le KOVITI-19.
E pei o mea uma i le lalolagi na taofi, ma o mea uma mo se taimi e le mailoa, na mafua ai e le le mautonu ona puaoa o o tatou mafaufau e uiga i le lumanai.
Sa ou foi mai i le fale mai lau misiona i Arisona, ISA, i le taimi na faatoa amata ai ona pepesi le faama’i i le lalolagi. I nai vaiaso mulimuli o la’u misiona, sa ou fatufatuina ai se vaaiga mamao mo le mea sa ou manao e alu agai i ai lou olaga pe a ou toe foi atu i le fale. Sa ou faia ni fuafuaga ma ni sini faapitoa ma sa ou sauni e amataina! Sa ou fuafua e alu i le aoga faatausimai, e amata ni gaoioiga ou te fiafia e fai ma saili ni uo fou, ma faaaoga le tele o avanoa e oo mai i le taimi o le talavou matua. Sa ou lagonaina se lagona o le toafilemu ma le faamautinoaga sa taialaina au e le Atua ma sa i ai ni mea maoae o loo teuina mo au i le maea ai o la’u misiona.
Na suia lena mea i le taimi lava na ou taunuu ai i le fale.
Na taitasi ona faaleaogaina au fuafuaga ona o le KOVITI-19. Sa amata ona ou fesiligia ma masalomia faaiuga ma sini na ou faia. Sa ou filifili e amata ona sue se galuega a o faatalitali mo le amataina o vasega i luga o le initoneti, nai lo o le siitia atu i le isi setete e amata ai le aoga e pei ona sa ou muai fuafuaina. E lei leva, ae ou lagonaina ua leai sou faamoemoega ma maumau ai le tele o le taimi. Sa ou masani i le tele o fuafuaga e masani ona ou pisi ai o se faifeautalai, ma o lea sa faafuasei ai ona ou lagonaina le tuuatoatasi, faamiimiiē solo, ma le leai o se aoga.
Sa ou le tulimatai atu i le lumanai. Ou te lei manao e fetaiai ma lenei suiga o le olaga. Sa ou manao e toe foi i tua i aso ua mavae, e toe foi i faauooga ua mavae ma nofoaga sa faafiafiaina ai au. O le vaaiga mamao ma fuafuaga na ou faia mo lou olaga i ni nai vaiaso na muamua atu ua mouese atu, ma na ou lagonaina na pei ua le mafai ona ou gaoioi ona o le pogisa, fefe, ma le lotovaivai. Sa ese o’u faalagona mai lou tagata na masani ai. Na faatoa uma atu lava sou aafiaga aupito sili ona ofoofogia o le auauna atu i le Alii mo le 18 masina, ae o lenei ua ou lagonaina le faanoanoa tele nai lo o se isi lava taimi i lou olaga.
Sa ou mafaufau pe aisea na sese ai mea uma ma po o fea na i ai faamanuiaga folafolaina a le Alii. O faamautinoaga na ou lagonaina i vaiaso faaiu o lau misiona na foliga mai ua mouese atu.
Ona oo mai lea o le konafesi aoao, ma sa ou iloaina le tele o mea na ou le mauaina i se vaega faapitoa o le olaga—faamoemoe.
Na tuuina mai e Elder Jeffrey R. Holland o le Korama a Aposetolo e Toasefululua se lauga na faaautuina “O Se Malamalama Atoatoa o le Faamoemoe” (konafesi aoao o Aperila 2020 ), ma sa faapitoa le tulagaese ia te a’u. Sa ou iloaina ona o lo’u faatuatua ia Keriso, e mafai ai ma e tatau ai ona ou faamoemoe mo mea e sili atu e oo mai. Ona o loo soifua le Keriso ma o loo galue pea i lou olaga, sa ou iloa ai o lou lumanai o le a pei lava e faatumulia i vavega ma faamanuiaina tele e pei ona sa i ai lou olaga ua tuanai.
Ona sa lagona ma manumalo le Faaola i mea uma o le a fetaiai ma au, e mafai ona ou talitonu, e ui lava i mafuaaga uma e le talitonu ai, o le a lelei mea uma—e tusa lava pe na suia faafuasei a’u fuafuaga i nisi o taimi.
Ua ou iloa afai ou te manao ia maua le olioli, manuia, ma le faamalieina i le olaga, e tatau ona ou pipiimau pea i le, ma agai i luma ma le faamoemoe, tusa lava pe feagai ma le le mautonu. E faigofie ona togi le solo ma faanoanoa. E faigata ona tauave o tatou mafatiaga ma le onosai ma talitonu ia i tatou lava, ma le mautinoa mausali, o loo tu le Atua i le foe ma o le a lelei mea uma. Ae e pei lava ona fautua mai Peresitene Thomas S. Monson (1927–2018), “Ia tatou matua filifili i le mea faigata e sa’o, nai lo le mea faigofie e sese.”1
Ia faatuatua o loo atiae oe e le Atua e tusa lava pe e te lagona ua e vaivai. Ia faatuatua i le iuga, o le a lelei mea uma, aua e galulue faatasi mea uma e lelei ai i latou o e ua alofa atu i le Atua” (Roma 8:28).
Pe a siomia i tatou i ao pogisa ma tatou lagonaina le fefe ma le le mautonu e uiga i le agai i luma i nei auala e ave i ai i tatou e le olaga, o lo tatou faamoemoe ma le faatuatua ia Keriso e mafai ai ona tatou faamalamalamaina le ala ma mafai ai ona tatou faia e tau lava o se laa itiiti se tasi i luma. Ona o Ia, e mafai ai ona tatou maua le olioli i le taimi nei e tusa lava po o o tatou tulaga e le o mea ia sa tatou mananao i ai pe mafaufauina.
Afai e te iloaina ua e lavea i le va o fesuiaiga o le olaga po o ua faaleogatasi foi mea ma le ala na e manao e o ai, ia manatua e i ai se fuafuaga a le Tama Faalelagi mo oe lea atonu e le mafai ona e mafaufau i ai. E tusa lava pe foliga mai ua filemu o Ia i nisi taimi, o loo galue malosi o Ia i lou olaga. Ua Ia silafia le iuga mai le amataga. Afai e te faalagolago ia te Ia ma faaauau pea i luma, i le faia o le mea sili e te mafaia i ou tulaga o i ai nei, o le a sili atu ona lelei lou olaga nai lo le mea na e manatu e mafai ona i ai.
Aua le fiu gofie. Ia taumafai pea e tusa lava pe le o mafai ona e vaai i taunuuga o au taumafaiga ma leai se mea e foliga mai o le a faasolo manuia. Faaauau pea tusa lava pe le ogatasi ia mea e tusa ai ma le fuafuaga. Vaavaai mo le aao o le Alii i lou olaga ma ia iloa Lona agalelei. Saili le taitaiga a le Agaga ma le faamoemoe e faatino Ana fetalaiga. Fai le mea sili e te mafaia, po o a lava foliga o lena mea i aso nei. Pipii mau pea. Faaauau pea ona agai i luma. Ma faamoemoe pea i le, faatasi ma Lana taitaiga o le a lelei mea uma.