O Le Meaalofa o le Faamagaloga
Saunia e Elder Neil L. Andersen
O Le Korama a Aposetolo e Toasefululua
Ua ofo mai e le Faaola le faamagaloga oagasala mo i latou uma o e omai ia te Ia.
O Mai ia te Au, saunia e Eva Koleva Timothy
O le fiafia ma le olioli tumau e oo mai e ala i le faatuatua i lo tatou Tama Faalelagi ma Lona Alo o Iesu Keriso. O mea uma e lelei ma matagofie, o mea uma e paia ma mamalu, e sau mai ia i Laua. E aofia ai le faamagaloga, lea e faafouina ai o tatou loto ma faamautu ai le mea tatou te tutu ai faatasi ma i Laua.
I lo tatou muai olaga, sa tatou olioli i le avanoa e o mai ai i le lalolagi, maua se tino faitino, ma avea atili e faapei o lo tatou Tama Faalelagi (tagai i le Iopu 38:4–7). Ae peitai, sa tatou iloaina o le a tatou oo i le le fiafia, ma’i, tiga, le tonu, faaosoosoga, ma le agasala.
O nei luitau sa faamoemoeina i le fuafuaga o le Togiola a le Tama, ma sa valaau atu o Ia i Lona Alo Pele e Toatasi na Fanaua e avea ma o tatou Togiola ma Faaola. O le a afio mai Iesu Keriso i le lalolagi e le pei o se isi lava, ma e ala i Lana amiotonu, o le a Ia motusia ai noataga o le oti. A o tatou filifili e mulimuli ia te Ia ma salamo i a tatou agasala, e aveesea e Ia, e ala i Lana Togiola e le iu, a tatou mea sese ma agasala o loo maua i le tusi o le ola.
Tatalo ma le Faatuatua
O lo tatou salamo, sosoo ai ma le faamagaloga mai le Faaola o le lalolagi, o le faavae lea o a tatou tatalo ma taumafaiga e toe foi atu i lo tatou aiga faalelagi. Mo i tatou taitoatasi o e faatuatua ia Iesu Keriso, o a tatou tatalo i aso taitasi, o a tatou taumafaiga e mulimuli i le Faaola, o lo tatou aai ma feinu e le aunoa i le faamanatuga a o tatou tauave ma le loto malie i o tatou luga Lona suafa faatasi ai ma lo tatou manao e tuua le taaina a le lalolagi ae ia latalata atu e ala i lea laasaga ma lea laasaga i le Faaola.
E pei ona faamalamalama mai e Elder Neal A. Maxwell (1926–2004) o le Korama a Aposetolo e Toasefululua: “Afai tatou te filifilia … le ala o le avea ma soo, o le a tatou … mei atu mai le mea atonu sa o se faailoaga muamua o Iesu i le faamemelo ia Iesu, sosoo ai lea ma le alofa ia Iesu, ma iu ai i le faataitaia o Iesu. I lena faagasologa o le taumafai ia avea atili e faapei o ia … , e tatau ona tatou i ai i le tulaga o le salamo.”1
E avea le salamo ma se mafaufauga faaauau pea, o se taumafaiga faifai pea. Ua saunoa mai Peresitene Russell M. Nelson:
“E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani i aso taitasi i le salamo. …
“… O le lagonaina o le mana faamalosiau o le salamo i aso taitasi—o le faia ma le avea ma se tagata lelei teisi atu i aso taitasi.”2
I le tatalo tatou te iloiloina ai mea na tutupu o le aso, ma fesili atu, “O fea na ou vaaia ai le aao o le Alii i lo’u olaga? Na faapefea ona faaalia le faamaoni ma le le manatu faapito i au amioga? O ni isi mea na ono mafai ona ou faia? O a ni manatu ma lagona e manaomia ona ou puleaina? E mafai faapefea ona ou mulimuli lelei i le faataitaiga a le Faaola? E mafai faapefea ona faateleina lo’u agalelei, faateleina le alofa, faateleina le loto faamagalo, ma faateleina le alofa mutimutivale i isi? O a ni auala na ou le ausia ai le mea na finagalo lo’u Tama Faalelagi ia ou avea ai?”
Ona tatou taofi lea ma faalogologo. O a tatou tatalo faaletagata lava ia e tatalaina ai le faamalama i faaaliga patino mai lo tatou Tama Faalelagi.
Faatasi ai ma le faatuatua ia Iesu Keriso, tatou te faailoa atu ai ma le lemataofiofia i lo tatou Tama Faalelagi a tatou mea sese, mea ua sopoloa i la tatou vaai, ma gaoioiga le magafagafa agai i isi. Tatou te ole atu ma le faamaualalo mo le faamagaloga, faalogo i uunaiga filemu a le Agaga, ma folafola atu i lo tatou Tama Faalelagi o le a sili atu ona tatou gauai atu i na mea e mafai ona tatou faaleleia. Tatou te ta’uta’u atu a tatou agasala ma tatou te lafoaia (tagai Mataupu Faavae ma Feagaiga 58:43). Tatou te toefuatai atu mea e mafai ona tatou toe fuatai atu ia i latou ua tatou faatiga i ai pe faaitaina. Atonu o se faatoesega i se toalua po o se tamaitiiti, se savali i se uo po o se paaga faigaluega, po o se tautinoga e mulimuli i se uunaiga faaleagaga na le amanaiaina.
O lo tatou aai ma feinu i le faamanatuga ma lo tatou auai soo i le malumalu, pe a mafai, e faalautele ma faamalosia ai lo tatou faatuatua ia Iesu Keriso ma lo tatou naunau e mulimuli ia te Ia.
Mafaufau i Lili, saunia e Eva Koleva Timothy
“O Mai ia te A’u”
I le 3 Nifae, e maoae le tele o taimi e faafesootai ai e le Faaola toetu o Iesu Keriso le upu “salamo” i upu “o mai ia te au.”
“Ia salamo ia outou agasala, ma o mai ia te au ma le loto momomo ma le agaga salamo” (3 Nifae 12:19; faaopoopo le faamamafa).
“Salamo i au agasala, ma ia liua. …
“… Afai tou te o mai ia te au e maua e outou le ola faavavau. Faauta, ua faaloaloa atu ia te outou lou lima alofa mutimutivale, ma o soo se tasi e sau, o ia lea o le a ou taliaina; ma amuia lava i latou o e e o mai ia te au” (3 Nifae 9:13–14; faaopopo le faamamafa).
“Ai se e salamo ma sau ia te au e pei o se tamaitiiti, o ia lea o le a ou taliaina. … O lea ia outou salamo ai, ma o mai ia te au outou tuluiga o le lalolagi, ma faaolaina ai” (3 Nifae 9:22; faaopoopo le faamamafa).
Sa talanoa foi Iesu e uiga ia i latou, e ala i a latou lava filifiliga, po o tulaga, ua latou le toe auai ai i nofoaga o tapuaiga. Na fetalai o Ia, “O tagata faapena ia outou galulue pea i ai; aua tou te le iloa pe le liliu mai i latou ma le salamo, ma o mai ia te au ma le loto atoa, ma ou faamaloloina i latou” (3 Nifae 18:32; faaopoopo le faamamafa).
Na tautino mai e Peresitene Nelson, “[O] Iesu Keriso … tu mai ma aao mafola, ma le faamoemoe ma le naunau e faamalolo, faamagalo, faamama, faamalosia, faapaia, ma faapaia i tatou.”3
Ioe, o i tatou, o le a tatou mananao e faia mea uma tatou te mafaia. O lo tatou faanoanoa, lo tatou naunau e suia, ma lo tatou loto momomo, agaga salamo, ma le faanoanoa faaleatua e taua uma lava. O le a tatou mananao e sui a tatou amioga ma fai faaleleiga ia i latou ua tatou faatiga i ai.
Mo le Alofa o le Tasi, saunia e Eva Koleva Timothy
O Le Faamagaloga o se Meaalofa
Peitai, e ao ona tatou manatua, o le meaalofa paia o le faamagaloga e le mafai lava ona ausiaina; e na o le maua lava. Ioe, o poloaiga e tatau ona usitaia ma sauniga ia tausia ina ia maua le faamagaloga, ae o taumafaiga patino, e tusa lava pe o le a le maoae, e leai se taua pe a faatusatusa i le tau o le togiolaina. O le mea moni, e leai se faatusatusaga.
O le faamagaloga o se meaalofa, ma e na o le pau le Tagata e mafai ona tuuina mai le meaalofa o le Togiola ma le Faaola o le lalolagi, o Iesu Keriso (tagai i le Roma 5:1–12 aemaise lava o le 15–18; tagai foi Roma 6:23; 2 Korinito 9:15; Efeso 2:8). Ua Ia ofoina mai Lana meaalofa e le mafaatauina ma le loto malie ia i latou uma o e liliu atu ia te Ia ina ia taliaina (tagai Mataupu Faavae ma Feagaiga 88:33).
E pei ona saunoa mai Peresitene Nelson, “O le Togiola [a le Faaola ua mafai ona] togiola ai agaga uma mai faasalaga o le solitulafono faaletagata lava ia, i tuutuuga ua Ia [faatulagaina].”4
Ia tatou fiafia i le faigamalaga! Ua tuuina mai e lo tatou Tama Faalelagi ia i tatou nei upu moni: “Afai tou te salamo, ma le faama’a’aina o outou loto, ona ou alofa mutimutivale atu ai lea i luga o outou, e ala i lou Atalii e Toatasi na Fanaua; … [ma] o le a ia te ia le aia i le alofa mutimutivale e ala atu i lou Atalii e Toatasi na Fanaua, mo se faamagaloga o [au] agasala; ma o [outou] ia o le a ulufale mai i loʼu malologa” (Alema 12:33–34).
I le avea ai ma se tasi o Aposetolo a le Alii, ou te folafola atu ia te outou, e moni nei upu a lo tatou Tama. A o e taliaina i latou i lou olaga, o le a mamanuina e le Faaola e faavavau le taunuuga paia o loo faatalitali mai ia te oe.