E Na’o Tusiga Faatekinolosi: Talavou Matutua
Fetuunai i Suiga i le Uma ai o La’u Misiona
Atonu e le atoatoa le olaga pe a mae’a se misiona, ae e mafai lava ona tatou maua le olioli ma le faamoemoega a o faaauau pea ona avea i tatou ma soo o Iesu Keriso.
Sa ou fiafia i la’u misiona i Kolomupia. O se vaega sili lea o lo’u olaga ua oo i ai. Ou te alofa i tagata sa ou feiloai i ai ma i latou sa ou aoaoina. Ou te alofa foi i a’u soa, ma e tele mea ua ou aoaoina mai ai! Ou te mafaufau i la’u misiona i aso uma.
Ina ua mae’a au aoaoga faamasani i le nofoaga autu e aoao ai faifeautalai, sa ou faapea ua ou sauni mo la’u misiona, ae sa tele mea e ao ona ou aoaoina i totonu o le galuega faamisiona. Ma o le mea lava lea e tasi na tupu ina ua uma la’u misiona—sa ou manatu sa ou aoaoina mea uma sa manaomia ona ou iloa e uiga i le olaga. Sa ou faapea sa ou saunia mo mea uma o i ai e tau’ai mai ia te au. Sa ou manatu o le a lelei atoatoa mea uma.
Peitai, atonu e te ono mateina, e lei tupu.
A’o ou i ai i la’u misiona, sa faia se taotoga o le uso o lo’u tina o Cecilia, ma sa ma’i, ma maliu ai. Ina ua uma ona ou tatalo e uiga i ai, sa tonu i o’u matua e faatali le ta’uina mai ia te au e uiga i lona maliu seia ou foi mai i le fale pe a maea la’u misiona. O le iloa ua maliu o ia na taugā ia te a’u. Sa avea pea o ia ma uso o lo’u tina e sili ona ou fiafia i ai, ma sa nutimomoia lo’u loto ona sa ou le i ai i le aiga e faatofa atu.
Ae e le na o le pau lena o le mea na suia a’o ou alu ese atu. Sa ou faamoemoe o le a auauna lo’u tuagane i se misiona a’o ou faamisiona foi, ae na suia lona mafaufau. Sa faigata lenei mea i ou matua, ma sa faigata foi ia te au.
Ma sa le tutusa mea ma a’u uo e pei ona sa i ai a’o lei alu la’u misiona. Sa masani lava ona ou valaauliaina au uo le lolotu i le lotu, ae ina ua ou taunuu i le fale ma amata ona toe valaaulia i latou, sa matuai ese lava o latou tulaga faaalia. Sa latou le toe mananao i soo se mea e fai i le Ekalesia. Ou te lei mautinoa po o le a se mea ua suia, ae o loo ou tatalo pea mo i latou ma faasoa atu ni savali faaleagaga ma i latou. Ae na ou lagona moni le tuuatoatasi ma e peiseai ua leai ni au uo.
Sa tele naua mea na suia a o ou alu ese mai, ma o se fetuunaiga i na suiga ina ua ou foi mai i le fale sa faigata.
O Le Taua o le Auauna Atu
I le taimi o la’u misiona, soo se taimi lava ou te lagona ai le lotovaivai po o le manatu e le mafai ona ou faaauau, sa ou tatalo mo se fesoasoani. O lea na ou iloa e mafai ona ou toe faalagolago i le Tama Faalelagi e fesoasoani ia te au e faamasani i lenei suiga fou o le olaga.
Sa ou maua le uunaiga e manaomia ona ou auauna atu. O le auauna atu sa avea ma fesoasoani faifaipea i taimi uma ou te lagona ai o loo i ai so’u faamoemoega. Sa ou alu e vaai lo’u epikopo ma ta’u atu ia te ia lo’u manao e auauna atu. Sa ia valaauina au e avea ma failautusi a Tamaitai Talavou.
I ni nai masina mulimuli ane, sa ou fai atu i le Tama Faalelagi, sa ou manao e alualu i luma ma aoao atili i lo’u olaga, ma sa ou ole atu mo Lana fesoasoani. O le aso lava na sosoo ai, na tofia ai au e avea ma fesoasoani lua i le Au Peresitene o le Peraimeri a le siteki.
O le mafai ona auauna atu i tamaitai talavou ma tamaiti i le Peraimeri, sa fesoasoani tele ia te au e faamasani ai i le olaga ina ua mae’a la’u misiona. Sa mafai ona ou taulai atu i le fesoasoani ia i latou ia liliu atu i le Faaola nai lo le taulai i o’u luitau. I le aluga o taimi, na faigofie au fetuunaiga a o ou taumafai malosi e auauna atu.
O Mea Ou Te Tu Ai Mo
O se isi mea na fesoasoani ia te au na fetuunai ai le olaga i le misiona o le faasoa atu lea o la’u molimau i soo se avanoa ou te maua. O nisi taimi sa ou maua ai le avanoa e faasoa atu ai ou talitonuga i le taimi o le aoaoga i la’u vasega o le Iunivesite.
Ina ua uma ona tofia au e lou polofesa filosofia e faia se aoaoga i le faamasinoga tonu ma le saolotoga, sa ou faaalia se vitio o le Ekalesia na ta’ua “Filemu, Lo’u Agaga.” O le vitio e faatatau i se tamaitai ua pue faapagotaina ona o le faaaogaina faatautala o fualaau faasaina. A o i ai o ia i le falepuipui, sa ia misia lana fanau. Ina ua uma ona faia se aoaoga e faaleleia ai, na ia toe foi atu i le aiga o se tagata fou.
Sa faaiu la’u aoaoga i la’u molimau. Sa ou fai atu ua ia i tatou uma so tatou faitalia na tuuina mai e le Atua, ae ua ia tuuina mai ia i tatou poloaiga e fesoasoani ia tatou malamalama ai pe faapefea ona tatou le faatiga ia i tatou lava po o isi. Ou te molimau atu foi o loo soifua o Ia.
E lei tetee le matou polofesa ma tamaiti o le vasega e faasaga i soo se mea lava na ou fai atu ai. Ma o la’u molimau na tuua ai i latou ma se lagona o le manatunatu. Ua ou aoaoina e te le iloa lava pe ono manaomia e se tasi lou malamalamaaga ina ia mafai ona talitonu o loo soifua moni lava le Atua ma Iesu Keriso.
O le aotelega, o le faaauau pea ona faalatalata atu ia Keriso ma fesoasoani atu i isi e o mai ia te Ia na fesoasoani ia te au e fetuunai ai i le olaga ina ua mae’a la’u misiona. Ou te le o toe avea ma se faifeautalai faamisiona, ae e mafai lava ona ou tatalo, auauna atu, ma molimau atu i le moni o le talalelei a Iesu Keriso. O loo mafai lava ona ou fesoasoani atu i isi ma faia le mea sa ou faia i la’u misiona — ma i se isi lava auala e ese mai.
O le fetuunai i le olaga pe a mae’a se misiona e mafai ona faigata, ae e mafai lava ona tatou maua le olioli ma le faamoemoega a o tatou manatuaina mea na tatou aoaoina a’o avea ma ni faifeautalai ma a o faaauau pea ona avea i tatou ma soo o Iesu Keriso. O le a fesoasoani mai le Tama Faalelagi ia i tatou ia faamanuiaina a o tatou taumafai e mulimuli ia te Ia.