Mauaina o le Malosi ma le Lototele e Lele Ai

Saunia e Cristian Gabriel Iraheta Portillo, San Salvador, El Salvador

O le avea ai ma fanau a le Atua, o lo tatou natura paia ua aumaia ai ia i tatou le gafatia e lele ai faaleagaga.

I se taimi e lei mamao atu, na amata ai e se paaga o lupe ona fausia se faamoega i totonu o se laau i la’u togalaau. Sa ou matauina a o laua aoina mai ni lala la’au laiti e fatu ai se mea o le a iu ina avea ma o latou aiga.

I ni nai aso mulimuli ane, sa ou vaaia ai ni atigi fuamanu i luga o le mutia. E lua ni tama’i manu aulelei na fofoa mai ai. Sa vave lo la tuputupu ae, sa lei umi ae toetoe tutusa le lapopoa ma lo la tina.

I se tasi taeao sa ou matamata ai i se tasi o ia tama’i manu, o tu i le faatausiusiuga o le faamoega, ma faia ni taumafaiga e lele. Mulimuli ane, na alu atu le tama’i lupe, ma lele atu i le taualuga o lo matou fale. I totonu o ni nai aso, sa faapea ona toe lele ai lenei lupe lototoa faatasi ma lona tina.

Ae o le isi tama’i lupe, na o le matamata mai i le faamoega. Atonu o mafaufau e i ai se aso o le a faatasi ai ma i latou. Sa i ai ou masalosaloga. E foliga mai sa lei i ai se manao o lea tama’i lupe e lele.

Ae peitai, sa ou tei, i ni nai aso mulimuli ane, sa ou tau atu ai o savalivali le tama’i lupe i luga o le vao, i lalo ifo o le faamoega. O le mea moni lava, sa na taumafai lava e lele. Mo ni nai aso mulimuli ane, na tele ni taumafaiga vasi a le tama’i manu e lele. Mulimuli ane, na faamanuiaina, e lele atu i le faamoega ma aga’i atu ai i le lagi.

O le avea ai ma fanau a le Atua, o lo tatou natura paia ua aumaia ai ia i tatou le gafatia e lele ai faaleagaga. Ae peitai, atonu tatou te faia le mea sese o le fuaina o lo tatou alualu i luma i le ala sa ou fuaina ai le alualu i luma o le lupe pepe musua, i le alualu i luma o lona tei. A tatou faatusatusaina a tatou taumafaiga faaleagaga i isi tatou te mafaufau i le lototoa faateleina, atonu tatou te manatu tatou te le o alualu i luma.

E manao foi le fili ia tatou mafaufau e le mafai ona tatou alualu i luma faaleagaga. E manao o ia ia tatou talitonu e na o mea faaletino e taua, o lea na te faaosoosoina ai i tatou i mea faalavefau e pei o tifiga ma mea le aoga o le lalolagi.

I le taimi o lo tatou olaga faataitai faalelalolagi, tatou te oo ai i le tele o tofotofoga, faigata, ma le toilalo. Ae na fetalai mai o lo tatou Tama Faalelagi ia i tatou, “Ia e faamalosi ma loto tele; aua e te fefe, aua e te mata’u: aua o Ieova lou Atua o loo ia te oe i mea uma e te alu i ai” (Iosua 1:9). Pe a tatou le ausia se faamoemoega faapitoa, ua faamoemoe mai le Alii ina ia tatou taumafai pea, ia manatua o tatou gafatia, ma, e pei o lei tama’i manulele, ina ia taula’i atu la tatou vaai i le lagi.