Auauna Atu ia i Latou o E o Loo Faafalepuipuiina

Saunia e Marissa Widdison

Mekasini a le Ekalesia

O le taua o le agaga o se tagata e le faaitiitia i le solitulafono.

I le taimi nei, e sili atu ma le 10 miliona tagata o loo taofia i falepuipui po o toese i le lalolagi atoa.¹ O Iesu Keriso, o lē alofa i tagata taitoatasi ma e malamalama i faigata uma, ua fetalai mai ia tatou auauna atu i fanau uma a le Tama Faalelagi—e aofia ai i latou o e o loo faafalepuipuiina. “Ona tali mai ai lea ia te ia o e amiotonu, e faapea mai, Le Alii e, o anafea na matou iloa ai oe … i le falepuipui, ma matou o atu ai ia te oe?

“Ona tali atu ai lea o le Tupu, e faapea atu ia te i latou, E moni, ou te fai atu ia te outou, Auā na faia e outou i le tasi o e aupito itiiti o ou uso nei, o au lea na outou faia i ai” (Mataio 25:37–40).

E mafai faapefea ona tatou faia mea ua poloai mai ai le Faaola ma auauna atu ai ma le saogalemu ia i latou o e o loo faafalepuipuiina? Ua tuuina mai i lenei tusiga ni mataupu faavae autu e fai ma se vaega e amata ai. Talanoa ma le agaga tatalo ma taitai o le Ekalesia i le lotoifale po o a mea e talafeagai ma atamai mo la outou eria.

O Fanau Uma a le Atua

E ui ina eseese faiga o faamasinoga, ae o le luitau o le faafalepuipuiina ua laugatasia ai atunuu ma aganuu. Na pulea e Doug Richens le [polokalama] o le aapa atu i tagata faafalepuipuiina o le Ekalesia. Na te faamaopoopoa foi ma isi faatuatuaga ma vaega i le lotoifale e fesoasoani ia i latou na aafia i le faafalepuipuiina, e tusa lava po o a o latou talaaga po o finagalo faalelotu.

“O se faamatalaga e masani ai i latou o e faafalepuipuiina o le, o i latou uma e le talitonuina, saua, ma matautia,” o le tala lea a Brother Richens. “Ae peitai, ua ou iloa e le faapena le toatele o i latou. O le toatele e lagona le faanoanoa ona o a latou amioga. O loo latou taumafai e aloese mai filifiliga leaga o le taimi ua tuanai ma ola i ni olaga lelei. ”

I nisi o atunuu, e tusa ma le afa o tagatanuu uma e i ai se tagata patino o le aiga sa faafalepuipuiina.² O nei tei, matua, ma fanau e faafalepuipuiina e—ese mai le faauigaina e soo se sootaga faalelalolagi—o fanau a le Atua.

Faamasinoga Faaletino ma Faavavau

E ui o le olaga e manaomia ai ona tatou faia ni faamasinoga, ae ua na o le Tama Faalelagi ma Iesu Keriso e mafai ona faamasinoina atoatoa se tasi e faavae i lo latou tulaga, amioga, ma manaoga (tagai i le 1 Samuelu 16:7). O lena faamasinoga atoatoa o le a mautinoa lava e iloiloina ai tulaga e fananau i ai tagata ia e matele ina lilifa atu ina faafalepuipuiina, e pei o aafiaga matuia i le aiga, augatupulaga o le mativa, o se aganuu o le faaaogaina o fualaau oona, ma isi mea. O le tele lava o isi tulaga e mafai ona uunaia ai le mafaia e se tagata ona faia filifiliga lelei, e aofia ai lo latou soifua maloloina ma le soifua manuia.³ E ui e taua mo le lalolagi le faamalosia o tulafono e faatumauina ai le saogalemu o afioaga, e mafai ona tatou faia ma le agaalofa ma se vaaiga e faavavau, ma iloa ai e tele naua mea tatou te le malamalama i ai.

“Mafaufau pe o le a sou lagona pe ana faamasinoina oe i lou olaga atoa e faavae i se mea sili ona leaga sa e faia,” o le tala lea a Tanja Schaffer, o se tagata o le Ekalesia sa galue i se ofisa faaletulafono a o lei faavaeina se vaega e fautua mo pagota. “E pule lava le Atua e faamagalo i lē o le a Ia faamagaloina, ae ua Ia poloaiina i tatou ina ia faamagalo i tagata uma” (tagai Mataio 18:21–22).

O le mataupu faavae o le faamasinoga atoatoa a le Atua e mafai foi ona avea ma punavai o le faamafanafanaga mo tagata na aafia i solitulafono. O nisi taimi o tagata e faatiga i isi e le fetaiai lava ma le faasalaga i le lalolagi. Atonu e pagatia pea tagata na aafia ae ua leva ona uma le taimi na faafalepuipuiina ai tagata na solitulafono. O le toatele o tagata na aafia i le faafalepuipuiina ua avea ma se tagata na aafia faapea ma se tagata solitulafono i ni taimi eseese, e faamanatu mai ai ia i tatou o le olaga o se upega o mafutaga ma faaiuga faigata e aafia ai isi. E mafai ona tatou maua le mafanafana i le talitonu lea e malamalama uma i ai le Tama Faalelagi ma Iesu Keriso. O le a atoatoa lava la La’ua faamasinoga. O le faamalologa Laua te ofoina mai—mo le tagata le sala ma le tagata salamo—o le a atoatoa (tagai i le Faaaliga 21:4).

O le Faataitaiga Alofa a Taitai

Sa faamatala e Elder Gerrit W. Gong o le Korama a Aposetolo e Toasefululua se fonotaga lea sa laei papae ai tagata uma sa siomia o ia. Sa i ai pesepesega ma tatalo, ma sa faateleina le alofa o le Atua.⁴ E ese mai i le mea atonu e vaai faalemafaufau i ai le toatele o i tatou, sa le o se sauniga lenei o le malumalu. Sa o se asiasiga auauna atu i se falepuipui sa avea ai ofusoloatoa paepae o le toniga masani.

“E popole taitai o le Ekalesia i tagata uma e aafia i solitulafono ma le faafalepuipuiina,” o le molimau mai lea a uso Richens, i le faamatalaina o le auala e tuuina atu ai e se tasi o taitai lana lava kopi o se mekasini a le Ekalesia i se tagata na te asia i le falepuipui i masina taitasi. “Latou te asiasi soo atu i e faafalepuipuiina, lagolago o latou aiga, ma tausia ma le alofa tagata ua afaina ai.”

O auaunaga mo le toefaasa’oina o le tiutetauave lea o le peresitene o le siteki, e galulue ai ma taitai o le uarota e faailoa manaoga o i latou o loo i o latou eria. O a ni mea o loo fai e o outou taitai o le siteki e auauna atu ai ma faasoa atu ai savali faagaeetia i tagata o le ekalesia ua faafalepuipuiina? I nisi o nofoaga, e mafai ona valaauina tagata o le Ekalesia e asiasi atu ma aoao tagata ua faafalepuipuiina. Fai mai Brother Richens, e masani lava o na tagata ua valaauina e tuuina atu le lagolago, e popole i le taimi muamua, ae latou te toe iloa ai le matuai anoa o le valaauga ma latou le mananao ai e faamaloloina.

“O le amio Atua lea,” na ia fai mai ai (tagai i le Iakopo 1:27).

E ui e le tatau ona tatou lagona le faamalosiaina e asiasi atu i tagata e faafalepuipuiina tatou te le iloa, ae o loo i ai isi auala e mafai ai ona tatou auauna atu ma le saogalemu. O ni nai auala nei:

Ia aofia tagata ua faafalepuipuiina i au tatalo, aemaise lava soo se tasi e te iloa igoa. O le tatalo e matuai mamana lava!
Siaki i falepuipui po o toese o le lotoifale e vaai pe latou te manaomia ni aitema e foai i ai. O le tele o nofoaga e faatagaina ai le faitautusi, galuega taulima e pei o le tolosē, galuega faatino o faatufugaga, ma le sailia o talafaasolopito o aiga.
Afai e te iloa se tagata o faafalepuipuiina, mafaufau e tusi atu ia i latou ni tusi faagaeetia. Fai ni filifiliga saogalemu, ma atamamai, ao e talanoa i ai. Mulimuli i le Agaga ma faatumauina tuaoi talafeagai.
Taulima tagata o le aiga o i latou o e e faafalepuipuiina—aemaise lava fanau—i le alofa, faaaloalo, ma ia faaaofia ai. Manatua o tagata o aiga e masani lava o ni tagata ua afaina fua ae le sala. E mafai ona fesoasoani le Agaga Paia ia tatou iloa le auala sili e auauna atu ai i tagata uma o le aiga.

O le Agaga Paia E Le Faatapulaaina

O le faafalepuipuiina e mafai ona avea o se taimi sili ona faigata i le olaga o se tagata. Ae e le faatapulaaina le Agaga Paia i puipui, pa, po o filifili. O le tatalo, suesue i tusitusiga paia, ma le lotomaualalo e mafai ona valaaulia ai Lana mafutaga faamafanafana i se taimi vave i totonu o se potu o le falepuipui e pei foi o fafo o le falepuipui. Ona o lenei mea, e mafai ai ona avea le falepuipui ma se nofoaga o vavega.

O Portia Louder, o se tagata o le Ekalesia o lē na tusia ni tusitusiga i luga o le uepisaite ao faafalepuipuiina, na faamatalaina ai o se malaga faigata o le faatuatua ma le mauaina o le malamalama loloto i le tagata lava ia. “Sa ou oo i ni tauiviga ogaoga i lou olaga, ae ua mafai ona ou lagonaina lou faamaloloina e ala i se alofa e le mafaamatalaina,” na ia tusia ai mai le falepuipui. “Po o a lava ni luitau o loo feagai ma oe i le taimi nei, po o fea lava o e i ai i lau lava malaga, faamolemole aua e te fiu!”

O Garff Cannon, o lē sa avea ma peresitene o le paranesi i se falepuipui, na faamatalaina le ala na uunaia ai o ia e le Agaga e tautala atu ma le agalelei i se alii loto maaa na faafalepuipuiina, o lē sa oo i se olaga faigata. “O le mea sa e tau mai nei ia te au o upu aupito agalelei ia ua tautalagia mai ia te au i lou olaga,” o le tala lea a lenei alii. “Ou te le manatua se taimi na tautala agalelei ma alofa mai ai se tagata ia te au. Faafetai lava.” Sa la faaiuina la laua asiasiga i le tatalo muamua ua faalogo i ai lenei tagata i le tele o tausaga.

“Ioe, e mautinoa lava le i ai o le Agaga Paia i nofoaga o le toese,” o le molimau mai lea a Brother Cannon. “O loo i ai iina fanau a le Atua, ma e finagalo o Ia e toe fo’i mai i latou.”

E faia e le Atua ni folafolaga mamana i tagata uma o e filifili e mulimuli ia te Ia, e tusa pe na tatou muai aoao e uiga ia te Ia i le Aoga Sa po o totonu o se falepuipui. E pei ona fai mai le Esekielu 36:26 , “Ou te avatu foi ia te outou le loto fou, ma ou tuu i totonu ia te outou le agaga fou.”

O le Toeulufale Atu i le Tulaga o Tagata Lautele E Matuai Luitauina Lava

O le taua o le agaga o se tagata e le faaitiitia i le solitulafono (tagai Mataupu Faavae ma Feagaiga 18:10). Afai e manao se tasi e sui mo le lelei sili atu, tatou te faataga i latou e tuputupu ae ma ia faamagaloina?

Na saunoa Brother Richens, “O le alofa tunoa ma le agaalofa o le Atua e maoae.” “O nisi taimi e lagona ai e tagata na faafalepuipuiina ua leva ona faamagaloina i latou e le Alii, ona faatoa faamagalo ai lea o i latou e le malo, tagata lautele, po o nisi foi tagata o le Ekalesia.”

O le toe foi atu i le lalolagi i le uma ai o le faafalepuipuiina e faigata. O i latou ua faafalepuipuiina e masani ona i ai ni faafitauli i le mauaina o ni galuega po o fale. E mafai ona tatou fesoasoani ia i latou ia maua le saogalemu i nofoaga lelei ma tulitulimatagauina ni mea lelei e fiafia e fai. Atonu o le mea aupito sili ona taua e mafai ona tatou faia o le avea lea ma se uo lelei, ma faamalosiau. Ina ua saunoa Iosefa Samita e uiga i le toe faatulaga o le falepuipui a o tamo’e mo le Peresitene o le Iunaite Setete, sa ia aoao atu faapea “o le so’ona fai ma le fa’aesea o le a le mafai lava ona faia se mea tele e toe faatulaga ai le olaga lelei o se tagata e avea ma mafuaaga ma faauoga.”⁵

O le Agaalofa e Faia ai se Eseesega

Na faamalosiauina e Iuta le Au Paia ina ia “alofa atu” (Iuta 1:22). O ana upu ua toe ta’ua ai le augani a le Faaola ina ia manatua i latou o loo i le falepuipui. O le a faapefea ona tatou tali atu i nei valaaulia? Sei o tatou faia se taumafaiga e fafaga ai i latou o e ua aafia i le faafalepuipuiina—ma o latou aiga—i le agalelei o le Atua. O lo tatou agaalofa e mafai ona faia ai se eseesega.

Ata pue o pa na saunia e Peggy Marie Flores; ata pue o se ulugalii o loo savavali na saunia e Nancy Ann Kirkpatrick; o isi ata mai le Getty Images

Ata pue o le vulu na saunia e Auralie Jones