Mataupu Faavae o le Auaunaga
Auauna Atu ia i Latou e i ai Luitau o Mea Tautupe
E mafai faapefea ona tatou fesoasoani atu pe a oo i taimi faigata?
Ata na tusia e Allen Garns
O Oh Jin Sook, o se tuafafine i le uarota a Chum-dan i Korea i Saute, sa feagai ma se tete’aga faigata ina ua mavae le tele o tausaga o le lototiga. I le taimi o le tatalaga o le faaipoipoga, sa faalatalata atu ona uso o auaunaga ia te ia, ma ofoina atu la latou lagolago. Sa amata ona fesoasoani le Peresitene o le Aualofa ma le epikopo ia Sister Oh e atinae ni filifiliga mo le avea ai ma se tagata ola tutoatasi. Sa laua fautuaina atu, ina ia mafai ona ia taulimaina ona manaoga patino, e pei o meaai, lavalava, fale, ma isi mea faapena, atonu e manaomia lona mei atu i se nofoaga e laitiiti ifo, ma taugofie.
A o auai ai i se vaega o le ola tutoatasi i le amataina ma faatupulaia o lau pisinisi, sa mafaufau ai Sister Oh e faaaoga ana taleni e ala i le amatalia o se faleotiulu ma teuulu. Sa faamalosiauina ma lagolagoina o ia e ona taitai ma uso o auaunaga a taumafai o ia e amata lana faleotiulu.
I le taimi muamua, na foliga mai na lofituina suiga. Ae ui i lea, sa faatuatuaina e Sister Oh le Atua, sa galue malosi, ma iu ai ina tatala lona lava faleoloa e faaaoga ai si ana tupe itiiti sa i ai.
I le taimi muamua, sa le lava le tupe maua e tausi ai lona aiga. Ae o le fale teuulu sa taua i le tuuina atu ia te ia o le talitonuga ma le lototele e iloa ai e mafai ona tutoatasi o ia ma ia ola faalagolago ia te ia lava.
Sa aumai e uso ni taumafataga ia te ia, valaau mai ia te ia e aumai ni upu faamafanafana, ma fefautuaai faatasi ma ia i lana pisinisi fou, ma auauna atu ma le alofa i le tele o auala eseese. O se tasi o tuagane na lolomiina ma tufatufaina le faitau afe o pepa faalauiloa e faalauiloa atu ai lona faleotiulu. O isi tagata o le uarota na a’apa atu i lana fanau i le alofa, faauo, ma le lagolagosua.
Sa itiiti ni ana meatotino faalelalolagi, ae sa ia lipotia e faapea, na avea ma vaitaimi sili ona fiafia o lona olaga. O le pogai o lona fiafia o lona faatuatua lea ia Iesu Keriso ma tagata o le Ekalesia o e sa faaalia ia te ia le alofa faaKeriso. E oo lava foi i taimi o ona tofotofoga, sa ia lagonaina le alofa tele o le Alii mo ia e ala i faataitaiga ma auaunaga a lona aiga faaleuarota.
Fautuaga mo auaunaga ia i latou o loo i ai ni luitau o mea tautupe:
-
Ia alofa ma aua le faamasino atu. Ia mataala i lapataiga a le Tupu o Peniamina e uiga i le faamasinoina o tagata o loo tauivi ma mea tautupe (tagai Mosaea 4:17–19).
-
E finagalo le Atua e faamanuia i tatou i le faaletino faapea foi ma le faaleagaga. O le faaalia o le faatuatua e ala i le faia o mea i Lana ala o le a suia ai o tatou olaga ma i latou o siomia i tatou.
-
I au taumafaiga e auauna atu, ia faaeteete ia aua nei faia mo i latou mea e mafai ona latou faia mo i latou lava pe aveesea ai ni avanoa e ola tutoatasi atili ai.
-
O le tuuina atu o tupe e le o le tali lea i faafitauli tautupe uma. O le tele lava o taimi, o le alofa, po o isi galuega o le auauna atu o ni fofo ia e sili ona anoa. Mo se faataitaiga, o le ofo atu e fesoasoani i le vaaia o tamaiti po o le galue i le fanua e mafai ona sefe ai tupe faaalu i le vaaiga o tamaiti po o le teuina o le fanua. O le valaaulia o i latou e faasoa atu se taumafataga e mafai ona sefe ai le tau o meaai. E le gata i lea, o le sootaga patino e mafai ona lagolagoina ma faamaloloina.
-
I lou mana’o e auauna atu, mafaufau i ou lava tulaga tautupe. O le a faamanuiaina i tatou e le Alii mo le ositaulaga ina ia faamanuia ai isi, ae ua fautuaina i tatou e aua nei faia ni mea e tele atu nai lo mea e mafai ona tatou faia (tagai i le Mosaea 4:26–27). O le auai i se vaega o le Ola Tutoatasi ina ia aoao atili ai e uiga i mea tautupe a le tagata lava ia e mafai ona faaleleia ai lou gafatia e fesoasoani atu ai i isi.
-
Ia nofouta, ma aua nei sopoia tuaoi e le tatau ona e taumafai e avatu faamalosi ai lau fesoasoani i isi, e tusa lava po o le a le lelei. Faataga i latou e fai mai, “Leai, faafetai,” pe afai o le mea lena latou te lagona e sili ona lelei mo i latou.
-
Auauna atu e aunoa ma se faamoemoe e faafetai mai. E faigofie ona lagona e tagata le faalumaina ma le maasiasi i faafitauli tautupe, lea e mafai ona faigata ai ona faailoa atu le faafetai. Ofo atu lou alofa ma lau auaunaga e aunoa ma le faamalosia. O nisi taimi o se fesoasoani e le mailoa o le a agalelei atu i lagona ma’ale’ale o isi.