Faavae o le Talalelei

Na Fetalai Mai le Atua ia i Tatou Ia Papatisoina

Na faia e Iesu Keriso se faataitaiga o le papatisoina e se tasi o i ai le pule a le Atua.

Ata

baptism

E ui e le tele ni faamatalaga auiliili e uiga i le soifuaga patino o Iesu Keriso, ae ua tatou iloa sa papatisoina o Ia ina ua tusa ma le 30 tausaga o Lona soifua (tagai i le Luka 3:23). O nisi nei o mea ua tatou iloa e uiga i le papatisoga mai i Lana faataitaiga.

Mo Tagata Uma

Afai ua o tatou matutua ma ua lava lo tatou matutua e iloa ai le eseesega i le va o le sao ma le sese, e finagalo le Tama Faalelagi ia tatou papatiso (tagai Mataupu Faavae ma Feagaiga 18:42). O Iesu sa atoatoa, ae sa filifili lava o Ia e papatiso e mulimuli ai i poloaiga a le Atua (tagai i le Mataio 3:13–17; 2 Nifae 31:7). E oo lava ia i latou ua maliliu e mafai ona talia le papatisoga. Tatou te ofoina atu ia i latou e ala i le papatisoina mo i latou i totonu o malumalu. (Tagai i le Mataupu Faavae ma Feagaiga 27:15–18.)

Ata

confirmation

Faia i le Pule

Sa lei soona papatisoina Iesu e so’o se tasi. Sa faapitoa lava ona maliu atu o Ia i Lona tausoga o Ioane, o lē sa i ai le pule o le perisitua mai le Atua. Ina ua maliu Iesu ma fasiotia Ona soo, sa faapea ona aveesea ai le pule o le perisitua mai le lalolagi. Ona oo lea i le 1829, na faaali mai ai Ioane le Papatiso ia Iosefa Samita ma tuu atu ia te ia le pule e papatiso ai i le suafa o le Atua. Talu ai ona o lena toefuataiga, ua tatou maua ai le avanoa e papatiso ai i le pule i aso nei.

O Se Folafolaga e Ala Lua

O le papatisoga e aofia ai se folafolaga e ala lua, po o se feagaiga, i le va o i tatou ma le Atua. Tatou te folafola atu:

E ave i o tatou luga le suafa o Iesu Keriso.
Ia Manatua pea o Ia.
Ia tausia Ana poloaiga.

O le taui, ua folafola mai e le Atua o le a faatasi pea Lona Agaga ma i tatou. O upu o le tatalo o le faamanatuga e faamanatu mai ai ia i tatou lenei feagaiga i vaiaso taitasi. (Tagai i le Mataupu Faavae ma Feagaiga 88:77–78.)

O le Agaga Paia O se Vaega Taua o le Papatisoga

Ua tau mai e tusitusiga paia ia i tatou ina ua uma ona papatisoina Iesu, sa faaali ifo le Agaga Paia i foliga o se lupe (tagai i le 2 Nifae 31:8). I aso nei, a uma ona papatisoina se tagata, e faamauina i latou. O lona uiga latou te maua se faamanuiaga faapitoa lea e valaaulia ai i latou ia maua le meaalofa faamama faaleagaga o le Agaga Paia (tagai i le 2 Nifae 31:17). E mafai e le Agaga Paia ona lapataia i tatou i tulaga lamatia, faamafanafana i tatou, taiala i tatou e faia faaiuga lelei, ma fesoasoani ia tatou lagona le alofa o le Atua (tagai Mataupu Faavae ma Feagaiga 39:6).

Ata

sacrament

E Mafai ona Tatou Salamo i Taimi Uma

Na silafia e le Atua o le a tatou faia ni mea sese i aso uma. E ui i a tatou taumafaiga sili, o le a tatou agasala ma le ausia ai le ola e tusa ai ma a tatou folafolaga o le papatisoga. O lea ua Ia tuuina mai ai ia i tatou taitoatasi le avanoa e salamo ai. (Tagai i le Mataupu Faavae ma Feagaiga 18:13.) O aso uma lava e mafai ona tatou faia ai le mea sili tatou te mafaia e faatoese ai ma fa’asa’o soo se mea sese. E mafai ona tatou tatalo ma ole atu mo le faamagaloga a le Atua. Ma, pe a tatou aai ma feinu i le faamanatuga ma le loto maualalo, e mafai ona tatou maua le Agaga Paia faatasi ma i tatou (tagai 3 Nifae 18:11).

O le A le Tala a Tusitusiga Paia e uiga i le Papatisoga?

E tatau i matua ona fesoasoani ia a latou fanau e saunia mo le papatisoga (tagai i le Mataupu Faavae ma Feagaiga 68:25).

O i latou e laiti ifo i le valu tausaga le matutua e le manaomia ona papatisoina (tagai i le Moronae 8).

A uma ona tatou papatiso, ua tatou folafola atu e “loto ina faanoanoa faatasi ma e faanoanoa; … ma faamafanafana i e ua tatau i ai le faamafanafanaga, ma laulaututu e fai ma molimau a le Atua i aso uma, ma mea uma, atoa ma nuu uma” (Mosaea 18:9).

I Luga o Oulua O’u Uso a Auauna e, saunia e Michael Malm ma Linda Curley Christensen