O Paionia i Atunuu Uma
Olga Šnederfler
Uluai Faatina o le Malumalu mai Siekisolovakia
Na iloa e Olga o le a alu o ia i le malumalu i se aso.
Sa sioa atu Olga i le ata o le malumalu o loo tautau i luga o lona puipui. Sa mapuea o ia. Maimau pe ana mafai ona o lona aiga i le malumalu! Ae sa leai ni malumalu e lata ane, ma sa faigata tele le tuua o lona atunuu.
Na papatiso Olga i ni tausaga ua mavae. Ae na faamalosia loa ia faifeautalai e tuua le atunuu. Sa lei faatagaina tagata o le Ekalesia e toe o i le lotu. Sa le mafai foi ona latou talanoa i isi e uiga i lo latou faatuatuaga.
Sa tumau pea le ola o Olga i le talalelei. Sa faapena foi lona toalua o Jirí. Sa la tatalo ma faitau faatasi tusitusiga paia. Sa la faia afiafi faaleaiga ma aoao la laua fanau. I Aso Sa, sa fai ai le sauniga faamanatuga i lo latou fale mautotogi laitiiti. Sa latou tautau i luga le tele o ata o le malumalu.
Ma a lagona e Olga ma lona aiga ua tuua toatasi, na latou manatuaina sa i ai le faitau afe o tagata o le Ekalesia i le lalolagi atoa.
I se tasi aso na tupu ai se mea fiafia. Sa sau Peresitene Russell M. Nelson, le Peresitene Aoao o le Aoga Sa, i lo latou atunuu e asiasi i ai. Sa ataata Olga a o ia lulu le lima o Peresitene Nelson. Ona ia faia ai lea o se folafolaga faapitoa ia te ia. “Tuafafine, e i ai se aso e te sau ai i le malumalu.”
Sa lagona e le loto o Olga le mafanafana. “Faafetai lava,” na ia musumusu atu ai.
Na mavae atu masina. Faapena foi ma tausaga. Sa tilotilo faananau atu Olga i ata o malumalu o loo tautau i luga o puipui. O le alu i le malumalu na foliga mai e le mafai!
Ina ua mavae le fa tausaga, sa valaaulia ai Olga ma Jirí e o i le konafesi aoao i le aai o Sate Leki, Iuta, ISA. Sa popole Olga o le a le mafai ona latou o. O mea i lo latou atunuu sa faigata pea. O le a tele ni pepa e faia e malaga ai. Ae peitai sa sologa lelei mea uma. Sa lagona e Olga le popole i lona manava a o malaga ese atu le latou vaalele mo le Iunaite Setete. O se vavega lava!
Sa o atu Olga ma Jirí i le konafesi ma faalogo i le perofeta. Sa laua vaai i le lotoa o le malumalu ma o atu i le nofoaga autu mo tagata asiasi. Ae o le vaega sili ona lelei o le alu i totonu o le malumalu!
Sa laei papae, sa lagona e Olaga e pei o loo i ai o ia i le lagi, a o ia faia ni folafolaga faapitoa faatasi ma le Atua. Sa faamauina foi o ia i a Jirí. Ua taunuu le folafolaga a Peresitene Nelson!
Sa toe foi atu Olga ma Jirí i le fale. A o mavae atu le taimi, na faasolo ina feololo mea i lo latou atunuu. Mulimuli ane sa mafai ona latou o i le lotu, ma na mafai ona toe aoao atu faifeautalai.
I se tasi aso sa tatagi ai le telefoni. O Peresitene Thomas S. Monson. Sa ia valaauina Olga e avea ma faatina o le Malumalu o Freiberg Siamani. O le a avea Jirí ma Peresitene o le malumalu.
Sa ataata Olga a o tu o ia i lona ofu umi, ma paepae i totonu o le Malumalu o Freiberg. Sa foliga mai i se taimi sa mamao ese atu le mea na i ai le malumalu. Ae o le taimi nei ua mafai ona ia faapelepele i ai i aso uma! O se miti matagofie ua taunuu.
O le eria sa nonofo ai Olga na mulimuli ane avea ma vaega o le Ripapelika o Siekisolovakia.
E faitau selau ni olo o loo i totonu o le Ripapelika o Siekisolovakia.
O le faatina o le malumalu o se taitai tamaitai i le malumalu.
O Olga na sili atu ma le 20 ata o malumalu i lona fale mautotogi.
O ia ma Jiri e i ai se la atalii ma se afafine.
Sa ia teuina se tusi ata ma ni ata o faifeautalai na aoaoina o ia.
Ata na tusia e Shawna J. C. Tenney